الشريف1
17-07-2022 - 05:32 pm
السلام عليكم ورحمة الله وبركاته
انا عضو جديد في هذا المنتدى الرائع.. مابي أطول عليكم..
انا الان أقضي ثاني الليالي في فيينا في أحد أرقى فنادق فيينا وأروعها.. نسيت اقول لكم اني عريس في
شهر العسل..ومخططي للرحله هو الرياض دبي فيينا ومن ثم بالقطار لزيلامسي وميونيخ ومنها العودة لدبي
فالرياض..رغم حماسي لهذا البلد "النمسا" طوال الفتره الماضيه انا وزوجتي"العروسه".. إلا اني تفاجأت بها
اليوم تعلن شعورها بعدم الارتياح بهذا البلد واستيائها الكامل من كل شي حولها..عارف ان أغلبكم بيحط
حرته بالعروسه وبيقول انها مدلعه وموب وجه سفر لاوروبا ومن هالكلام..بس البنت وعلى مايبدو لي كتمت
في نفسها من اول مادخلنا البلد الين الحين وصارحتني بعدم ارتياحها..حتى انها قالت لي ماقدر اطلع من
الفندق نهائيا اذا تبي تطلع اطلع تمش وانسبط وارجع لي,,قلت لها باقي يومين ونروح لزيلامسي هناك
الطبيعه والوناسه تقول لي انا كارهه البلد باللي فيه..مارتحت لطبيعة البلد ولا لشعبه..
انا الظاهر اني طولت عليكم وانا قلت بالبدايه مابي اطول عليكم..بس متضايق وحبيت افضفض شوي يمكن
ألاقي اللي يريحني بكم كلمة...قسم بالله حتى اني فكرت لو بلاقي حجوزات من بكره أرجع للرياض وأرتاح
والله يعوض علينا بقيمة التذاكر والفنادق اللي صرفناها..
تعوذوا من ابليس
وش اللي ترجع الرياض والخير قدامك
عروستك لاتحكم على البلد من الحين خلها تروح ل زيلامسي ويارب ترتاح نفسيتها هناك
بعدين يمكن العروس مشتاقه لاهلها خلها تكلمهم وتوسع صدرها معهم وان شاء الله مايصير الا كل خير
اما ترجع للرياض
نو والف نو
استهدوا بالله دنتوا بأول المشوار
وربي يوفقكم يارب وتكون سفره العمر