أخي أبو ظبي . . وسائل الإنتقال من الإسكندرية إلى شرم الشيخ المتاحة هى: الطيران والأتوبيسات وأخيراً سيارة خاصة أو تاكسي
في تقريرى خمسة أيام عسل في شهر العسل اقتبست هذه الجمل فيها الرد الوافي لسؤالك:
"حاولت أحجز طيران لشرم الشيخ لقيت مفيش ولا مكان ولا حتى على درجة رجال الأعمال
بس برضه عرفت الأسعار عشان المنتدى "مش زي ما قال أعضاء قبل كدة خالص ب350 إلى 400 جنيه"
التذكرة من الإسكندرية إلى شرم ذهاب وإياب ب 750 جنيه
وعلى درجة رجال الأعمال ب 1250 جنيه
لكن برضه مفيش ولا حتى فى قائمة الإنتظار "كان مفروض أحجز بدرى" ومدة الرحلة ساعة ونصف رايح وساعتين راجع
ما كانش قدامي حل غير الأتوبيسات وهم من الإسكندرية 3 شركات
السوبر جت ب 110 جنيه ذهاب فقط وزمن الرحلة 10 ساعات ونصف وبيعدى على القاهرة وبيقف فى 4 محطات داخلها وبيطلع من إسكندرية الساعة 9 مساءً
غرب الدلتا أو شرق الدلتا أو البولمان ب 85 جنيه ذهاب فقط وزمن الرحلة 9 ساعات ونصف ومباشر إلى شرم لا يقف في أى محطات وبيطلع من إسكندرية الساعة 9 مساءً
الجونة ب 110 جنيه ذهاب فقط وزمن الرحلة 8 ساعات ونصف وبيعدى على القاهرة وبيقف في محطتين داخلها وبيطلع من إسكندرية الساعة 12 مساءً
أكره السوبر جت عشان كراسيه ضيقة والبولمان كراسيه واسعة والجونة معرفش عنها حاجة
فحجزت على البولمان :112:
أجاركم الله صفيحة ومركبين لها 4 عجلات
مليان ناموس والباب اللي بالخلف مش مقفول على الآخر فمدخل صواريخ هوا مثلج، ولَا الحمام حاجة ما يتحكيش عليها والكراسي مش واسعة زى ما ركبت فى البولمان اللى بيروح المطار قبل كدة "
بس للأمانة وأنا راجع "صحيح ما ركبتش البولمان بس لقيت أتوبيس بولمان رائع كان رايح شرم الشيخ موديل 2008 "يظهر قدري جه فى أتوبيس وحش بيطلعوه صدفة ولا حاجة"
وأنا راجع ركبت أتوبيس الجونة "رائع" ب 110 جنيه للفرد