اشوف الناس محتاره وحالتها حاله في فنادق باريس !!!!!!!! البعض يعتقد ان باريس كبر الرياض والا جده
ترا باريس كلها ما تجي كبر ربع جده او واحد من عشره من الرياض
صغيره مره بشكل ما تتوقعون , طولها 12 كم وعرضها 7 كيلو متر
تخيلوا الرياض يوصل طولها الى اكثر من 120 كم وعرضها اكثر من 80 كيلو متر
الحين قارنوا واعيدوا على نفسكم السؤال ( هل موقع الفندق في باريس بيكون مهم لهذي الدرجه ؟)
بعدين اسئل نفسك انت كم ساعه في اليوم بتجلس في الفندق ؟
بالكثير وقت النوم وساعه او ساعتين تريح فيها بعد الفرفره
يعني المجموع كله على بعضه ما يجي 8 ساعات وبالكثير 10 ساعات !
هل تستحق اني ادفع 1500 ريال في الليله عشان بس مكان انام فيه ؟ بس لمجرد انه قريب من الشانزلازيه ؟
اقدر احصل فندق نظيف ومرتب و ب 500 ريال وبعيد عن الشانزلازيه واوفر على نفسي 1000 ريال في اليوم ولو تضربها في عدد ايام اقمتك راح توفر كثير
الفكره هي ان انت مسافر يعني اغلب وقتك خارج الفندق والتاكسي موجود والمترو موجود ليش ادفع مبالغ طائله على شي ما استفيد منه ؟
اما اذا القصد هو فشخره , فصدقوني اهل الكاش عارفين فنادقهم ومحجوزه لهم من قبل الصيف وما يسئلون عن السعر يعني لا تتعب حالك يا عزيزي وتحاول تفشخر لانك منت محصل من الفشخره الا وجع القلب بعد ما ترجع من السفر وتشوف حسابك بالناقص
يعني الواحد يسافر وحاط ميزانيه 20 والا 30 الف ويبي يصير ابهه ما يدري ان غيره يجلس الصيف كله وميزانيته ما تقل عن 200 الف ريال
الخلاصه , السياحه تغيير جو بحدود مقدرة الشخص ولا تحملون انفسكم مبالغ على شان قولة اني سكنت في الفندق الفلاني والا استاجرت السياره الفلانيه .
لازم السائح الخليجي يفيق من نومه ويعرف انه مستغل وان صرف مبالغ طائله بدون مردود لا يعتبر ميزه او شي يزيد من قيمته بل انه شي يجعله في صف المغفلين
وبهذي المناسبه ادعوا جميع الشباب الزقرتيه( زقرتيه جمع تكسير مفردها زقرت وتعني الشاب المندفع للحياه ايزي قوينق على قولة الانجليز ) ان نسوي مجموعه سفر وناخذ خيام وقدر ضغط وروح نخيم في باريس عشان نوفر