- نبدأ في قطار KL Monorail
- قطار Kelena jaya line
سلآم عليكم ..
يسعد ربي اوقاتكم وان شالله يكون الجميع بخير ..
صراحه شفت موضوع يخص القطارات ورديت رد ططويل وللاسف انمسح .. ف قلت انزل موضوع منه يستفيد اخوي الي حاب يعرف الاجابه ويستفيد الجميع ..
وهالموضوع للقطارات والتوفير وبعض النصائح ..
قطارات ماليزيا الي بالعاصمه KL Monorail , Kelena jaya line
هذي القطارين المهمه والسهلين .. في قطار يوصل من سلنقور قريب من الصن واي براميد , الصن واي لاقون .. بس يلخبط ولحسه ف افضل عدم ذكره ..
نبدأ في قطار KL Monorail
راح اذكر اهم المحطات والمنطقه السياحيه القريبه منها واعذروني اذا نسيت شيء او ماذكرت شيء ..
- محطة IMBI ..... تنزل من القطار تلقى نفسك بالتايمز سكوير ..
- من نفس المحطه الى محطة Bukit bintang ........ شارع العرب سعر التذكره اقل من 1.20 RM
- محطة Chow kit ..... سوق قديم وبصراحه ماانصح اي شخص يروحه لانعدام الامان بهالمنطقه ولقلة الاشخاص الناطقين بالانجليزية .. انا رحت وتورطت وندمت ولا انصح اي شخص بالذهاب له ..
- محطة KL Sentral المركز الرئيسي للقطارات .. وكل القطارات تمر على هالمحطه وتعتبر المحطة الرئيسية .
قطار Kelena jaya line
- محطة KLCC .... اول ماتنزل من القطار تلقى نفسك بالبرجين والمحطه تحت البرجين بالظبط " بتروناس توين تاورز "
- محطة Pasar sini ... تمشي مسافه بسيطه جدا 3 دقائق وانت بالسوق الصيني او بالاصح الحي الصيني " تشاينا تاون "
- محطة Gombak او بالمسمى الاخر Terminal putra ونطقها تمينا بوترا يعني اسحب على حرف R لول .. المحطه هذي تعتبر اخر محطة بالقطار وقريبه عن الجامعه الاسلامية وعن جنتنق .. طبعا بس تنزل من المحطه هذي اسأل على مكتب جنتنق واحجز تذكره وروح ب 35 او 40 يوصلوك للتلفريك والتذاكر عليهم واظن اللعب عليهم .. ابرك لك من تكسي ب 200 ولا 300 .
محطة Masjad Jamek ....... وهذي المحطه قريبه من عدة اشياء .. المسجد الجامع الكبير بس صراحه ماعرفه ولا رحته ههه .. محطة الباصات بودورايا سنتر .. التشاينا تاون بس بعيد شوي يبيلك تمشي مسافه 7 دقايق .. يعني بزار سني اقرب ..
المهم ..//
قمت بذكر اهم المحطات الي اعرفها واذا ماذكرت وحده مهما ف يعني ذلك جهلي لها او نسيانها ..
ملاحظه مهمه جدا جدا .. عند الركوب للقطار راح تقطع تكت وتروح .. طبعا البعض حريص يسأل والبعض يقرأ والبعض يركب ع البركه ههه ..
خليك حريص بالنسبه لركوب القطار يكون قبل ماتطلع الدرج بتلقى لوحتين .. لوحة بلات فورم 1 .. بلات فورم 2 .. طبعا انت بتشوف المحطه الي تبيها بتروح بلات فورم 1 ولا بلات فورم 2 .. طبعا اذا كنت بتروح محطه تبيها ورحت العكس لازم تغير القطار عشان مايضيع وقتك ع الفاضي ..
اسعار تذاكر القطار من 1 رنقت الى 2.50 رنقت او 3 رنقت مستحيل تتجاوز هالمبلغ .. كل محطه لها سعر ..
وبالنسبه للقطارين كل 3 دقايق الى 6 دقايق يجي قطار ويروح قطار ..
نيجي للباصات ..
اذا تبي تروح لنكاوي لاتروح بتكسي يرحم امك رح بطيارة اوفر لك ولا رح بباص ..
ركبت مع تكسي سألته عن السعر لنكاوي قلي 600
طبعا اسعار التذاكر بالنسبه لطيران من 270 الى 370 رايح جاي من كوالا لمبور .
الباص 43 رنقت ويوصلك ل مدينه اسمها كوالا كدحا او كوالا بيرسل وتاخذ الفيري " قارب " ب 18 رنقت لين لنكاوي .. يعني التكلفه اقل من 70 . والمده 7 او 8 ساعات ..
منتجع افا موسى الواقع بمدينة ملاكا .. يرحم امك لاتروح بتكسي ب 300 ولا ب 200 .. رح من بودورايا بباص ب 12 رنقت ههه ولا تدفع 300 على تكسي ..
اي مكان تبي تروحه بماليزيا اسأل عن وسائل المواصلات بتلقى الاوفر .. مهما كنت لو كنت تملك ملايين .. لاتصرف فلوس على شيء في بديل له .. وعلى فكره قطارات ماليزيا مكيفة وروعه وتشوف مناظر حلوة .. باصات ماليزيا مو زي حقت البطحا بالرياض .. باصاتهم كنك راكب الدرجه الاولى او البزنس ديقري بالطياره .. الكرسي مره كبير وتقدر تسدحه براحتك اتكلم عن باصات المدن وليس باصات النقل وسط المدينه RibedKL ..
بالتوفيق والله يهديكم يالسياح العرب في شي بداخلي ابيه يوصل لكل سائح عربي اتمنى يمرو على موضوعي ..
اتمنى من الله الهدايه لسياح العرب الي يروحو بدون لغه .. اتكلم الي لغته 0 .. لانك ماراح تقدر تمشي نفسك .. اقل شيء عشان تروح تكون لغتك مستوى 3 وفوق عشان تمشي نفسك وتكون عارف وش يصير ..
لمن تكون ب اي مكان وماتلقى الاسعار ثابته كاسر تعرف ايش تكاسر فاصل بالسعر .. اقسم بالله يااخوان ماهو عيب العيب انه يقولك سعر الشغله ب 200 وهي ماتسوى 20 وتشتريها .. والله يااخوان اشوف بعض السياح ودي انصحه بس اخاف يزبد لي يقولي وش دخلك .. تشاينا تاون سوق الحرميه لابد من المكاسره والمكاسره الاقوى من اي شيء بالعالم واذا قلك عطني سعر قوله انا مااعرف سعر البضاعه انت البياع اقولكم بالانجليزي وش تتكلمو ؟
Last price < اخر سعر يعني زي كم اخر كم اخر وانت تكلم هندي .. ترى هالكلمتين اختصار ل Give me last price بس كتبت لاست برايس عشان الي مايقدر يحفظها ..
واذا قلك عطني سعر واعطاك الاله الحاسبه كعادتهم الخايسه قوله عطني اخر سعر ولا امشي البضاعه بتلقاها ب محل وثاني وثالث لانهم كلهم نفس البضاعه ..
والله يااخوان مااتكلم الا من حرصي عليكم ولو منتو مثل اخواني ماكتبت هالكلام .. بس والله الواحد يتحسف يوم يشوف ابن بلده ولا ابن دينه وينضحك عليه وهو عارف ويسكت والله قوية .. واخر شي اقول الله يهديني ويهديكم ..
وانتبهوآ على انفسكم والحرص واجب .. كلامي كلامي كلامي مو معناه ماليزيا مافيها امان ..
بالعكس ماليزيا فيها امان وانا ادرس هناك وشفت الشين والزين وماتعرضت ل اي شيء ضايقني .. والشعب حاله حال نفسه اهم شي الواحد بس يكون حريص وينتبه من الباعه المتجولين بشارع العرب ..
والله يحفظكم ويسعدكم ويهنيكم ب ايامكم ويجعل ايامكم كلها سعاده .. وربي يفرج كرب المهمومين ..
المعذره من جميع الاخوان وارجع اقول ماليزيا اسيا الحقيقه .. والامان درجه اولى والحياه احلى حياه والدنيا احلى دنيا والجو احلى جو واحلى تحيه ل شعب مآليزيآ ولكل شخص يقرآ صفحتي المتوآضعه ..
ان آخطآت فهذآ مني ومن الشيطآن وإن آصبت فهذآ من المولى عز وجل ..
واتقبل اي نقاش بصدر رحب واي شخص وده يسب ويرمي علي حصا يقولي عشان اجيبها له ههه ..
تحيآتي للجميع .. وارجع واقول هذا لحرصي عليكم ولمحبتي لكم ..
وكتبت هالموضوع بسبب انه مافي موضوع مشابه والي ذكرني فيه اخ الله يجزاه الخير رديت عليه وانمسح الرد رحت كتبت موضوع لعيونه ولعيون الجميع ..
والمعذره ماقدرت انسق الموضوع لعدم استجابه رموز التحرير " التعديل "
دمتم بحفظ الله ورعايته ..
اخوكم ومحبكم / احمد .. واستقبل الدعاء بظهر الغيب واتمنى من الجميع الدعااء لي ...
WiTh BeSt WiShEs..
مواضيع يمكن تفيدك ../
https://artravelers.com/p/re/341573 OR
https://artravelers.com/p/re/347690د " الرياض "
والعذر والسموحه ..