السلام عليكم ورحمة الله وبركاته
مساكم عسل مع هذي الأجواء والأماكن الرائعة في مدينة ألانيا بالقرب من مدينة أنتاليا
طبعا عندي كلام كثير ودي أحكيلكم من أول ما أقلعت بالطيارة إلى هذي اللحظه الجميله لكن لا يسعني الوقت لأنني الآن في مكتب سياحة لأقارب صديقي في السعودية .
ولكن بعطيكم شئ بسيط من إللي صادفني من بداية هذي الرحلة :
أول شئ لقيت أستقبال ولا أروع ( تقول إني واحد من جماعتهم وأعرفهم من زمان) طبعا هذي بسبب توصيات صدقيقي التركي إللي عايش في جدة .
سكنا في فندق 3 نجوم لكنه رائع , طبعا السكن مع الأكل والشرب ولاقيت بجوار الفندق حلاق تركي كان شغال في الظهران وزوجة الرجال كوفيرة في نفس الحلاق ( ينعن اوم الفله حلاق عوائل) ههه
ورحنا كمان للقلعة وهذي المنطقة جميلة جدا , وطريقة الذهاب لهذا المكان أو حلاوة الذهاب وطريقة التمشية في هذا المكان هو إن التاكسي أو السيارة إللي معاك يوصلك لأعلى القلعة وأنت تنزل مشي لأسفل القلعة وأنت ماشي في الطريق فيه أماكن جميلة جدا ومناظر خلابة وفيه محلات في الطريق ومطاعم وكوفي شوب < إي شئ تبغاه بتلقاه .
الموقف المضحك إللي واجهناه هناك هو إننا بعد ما جلسنا في إحدى المطاعم وطبعا ما عرفنا نطلب إلى شاهي أو كوفي أو عصير والأكله الوحيدة إللي أعرفها بالإنجليزي هي (تشكن) يعني دجاج ههه
بس المدام أحرجتني وتبغى تطلب سمك ( ينعن أوم الحشرة صدق ) طبعا بعد ما تقلب وجهي ألوان قوس قزح وجلست أقولها إن السمك عندهم مو زين وكذا كله عشان ما انحرج ولا اعرف أطلب سمك قدامها لكن أصرت المدام على إنها تآكل سمك (أمرنا لله عاد) وطلبت الرجال وأبغى أقوله سمك وتذكرت إن اسمها بالإنجليزي (فرش أو فش ) < حاجه زي كذا . وجلست أقوله سمك , فرش , فش . إللي يعيش في المويه ههه بس ما فهم
والحمدلله أنقذتنا حرمه كانت جالسه مع زوجها وأولادها بتقول تبغو سمك؟ قلت ايه ايه وينك من زمان ( طبعا الحرمه هنا ماتت ضحك ) بس حسابها بعدين في جدة إن شاء الله ههه
وماقصرت الحرمه طلبت لنا سمك وكل شئ كان نفسنا ناكله , وجلسنا نتكلم معاها طلعت أصلا يمنيه متزوجة تركي وعايشه في هولندا ( ابوك والحوسه صدق) .
وبعدها نزلنا مشي وكل شوي نوقف ونصور نوقف ونصور إلين ما خلصت بطارية الكاميرا وجانا الرجال وأخذنا من أسفل القلعة وجينا هنا في المكتب .
ولنا تكلمة إن شاء الله
اتمنى أني وفقت في النقل الحي المباشر .
فمان الله