عـبـدالعزيـز
06-10-2022 - 03:15 am
السلام عليكم ورحمة الله وبركاته
أخواني عشاق الساحرة سويسرا ..
عندي مجموعة استفسارات وتخوف من رحلتي لقضاء شهر العسل بإذن الله
بداية قرأت مجموعة تقارير عن سويسرا وجمالها وكانت سابقا هي حلمي
لكن مثل ما تعرفون عندنا ناس تعرف كيف تكسر المجاديف
اللغة صعبة كيف بتتصرف ؟ سويسرا ثلاث لغات وأنت E ما تعرف ؟
و و و
حاولت اشوف قروبات او مرشد سياحي بعد التحطيم لكن نفسيتي ما ارتاحت
(ياخي ابي اطنخ من راسي ) مابي امشي بشور أحد
مع العلم اني ما حجزت للحين ومخطط للرحلة ذهاب تكون ان شاء الله 14 يونيو 2013 والعودة بتكون 26 نفس الشهر
الذهاب من جدة والعودة مالقيت الا ترانزيت ع الرياض ومنها لجدة
المحطة الاولى جنيف وصول لكن مثل ما قرأت ما تصلح وانا من عشاق الطبيعة والأرياف والجو الرايق ..
وش أفضل مكان وقريب من جنيف ارتاح فيه اول ليلة وبعده أسيّر على انترلاكن .؟
مع العلم إني بستاجر سيارة..
وفيه تقارير كثيرة شفت إن اصحابها وضعوا انترلاكن نقطة انطلاق لرحلاتهم .. يعني يطلع الصباح منها ثم يرجع لها بالمسا .. وكذا حلو وتناسبني لأني مابي الهجولة
فما أدري وش الطريقة ؟
هل ضروري يكون عندي لغة ؟
وهل صحيح اقدر اتنقل من انترلاكن ؟
والبرنامج لهالفترة ماعندي خبرة فيه وش أفضل الاماكن اللي تستحق زيارتها ؟
كم الميزانية اذا كان شخصين ؟
وباقي الاستفسارات ما تحضرني الحين .. أحس إني متكهرب من الوضع والتحطيم ليتني ما استشرت اللي حولي
كنت متأكد ان الرحلة لسويسرا لها معادلة
تخطط مسبق وسليم + قارمن مع تخزين الاحداثيات + قراءة تقارير للفائدة والاطلاع + مشورتكم = رحلة موفقة
لكن خلوها بعيني مستحيلة الحل بس كلامهم زادني اصرار
ف لا تحرموني مشورتكم وخبرتكم رحم الله والديكم
وشكرا مقدما
ما عليك من كلامهم، وناس اعرفهم شخصيا ما يعرفون ولا كلمة ومشت معهم زي الحلاوة ما شاء الله.
ويبدو ماشاء الله عليك من الناس اللي تخطط و تظبط وتحسب لكل شي، والنوعية هذي من الناس ما ينخاف عليهم بإذن الله.
توكل على الله، ولا تقصر في قراءة التقارير.
وبالنسبة للجدول، صدقني ما فيه احسن من ان الشخص يعمل جدوله بنفسه، وذلك بعد قراءة التقارير و فرز الاماكن التي تناسبك.
انترلاكن او القرى اللي حواليها مناسبة لجعلها نقطة انطلاق، ولكن انتبه لنقطة مهمة جدا
وهي ان بعض القرى لاتدخلها السيارات، مثل muren , wengen, ....
وبالتوفيق