السلام عليكم ورحمة الله وبركاته
كيف حالكم
أعود إليكم بتقرير قديم نوعا ما ولكن قلت أشاركم الفرحة والصور
المهم
أنا سافرت مع زوجتي في شهر 1/2009 لأسبانيا وفرنسا ..وخلينا من فرنسا لانها كانت للتسوق اللي افتقرنا منه
رحلت اسبانيا كانت لملقا وبرشلونة
6 ليالي ملقا و 5 ليالي برشلونة
طبعا طلعت الاسعار عليه أنا وزوجتي شامل تذاكر الطيران والطيران الداخلي والفنادق وتأجير سيارة في ملقا 21 ألف درهم مع فرنسا طبعا .
والسعر اي شخص اخبره عنه يقول سعر خيالي
وكانت الرحلة على الطيران الفرنسي.
وكانت السفرة من اروع السفرات اللي سافرتها ... طبعا السنة هذي كلها سفرات الا سياحة والا شغل (الله يكفينا شر سفرات الشغل لانها متعبه جدا)
واترككم الان مع بعض الصور اللي التقطتها عدستي (اطلع يا ابو عدسة)
صورة بانورامية لقصر الحمراء
هذه الصورة في قصر الحمراء .. واكيد تقولون شو هذي الصورة مقلوبة ولا ...طبعا الصورة التالية توضح معنى الصورة
الصورة السابقة انعكاس على الماي .. (طبعا انا ذليت زوجتي على الصورة...شوفي كيف انا خطير) وفي الاخير انا مصور ولا ادري كيف طلعت الصورة
وهذي صورة لاحدى ازقة قصر الحمراء
الجو جميل وشاعري ...هالله هالله
جو مال رقاد
وصورة بانورامية أخرى لمنطقة ميخاس .. والله منطقة حلوة
توقف السيارة في الموقف وتتمشى ... والحمير حواليك
ودخلنا مطعم أكلنا أصابعنا من لذة الاكل
ومكان جميل جدا
ونحن رادين الفندق في ملقا .... شكل وعلق النيف قيشن وضعنا وجلسنا اندور في منطقة جبلية وموب عارفين نطلع
وقصتنا قصة مع هذا النيف قيشن ... كل مرة قصة
ومن القصص انه اول ما وصلنا مطار ملقا حطين اسم الفندق طلع موب موجود في الجهاز .. ولكن طلع فندق مشابهه لاسمه ونفس العنوان بالضبط
قلت اطلع عليه ومن هناك بنتفاهم
ويوم وصلنا المنطقة اللي ساكنين فيها
الجهاز يعطيني الف طريق ولكن هذا الطريق ممنوع
يخرب بيتك من جهاز العاقل ما بيلف هذا الطريق
وجلسنا ساعة ندور حوالين المنطقة ونروح ونرجع موب امحصلين طريق يوصلنا للفندق كل الاتجاهات ممنوع الدخول
وقلت خلني اغامر وادخل من هذا الطريق
والله وكيلكم
دخلت منطقة الناس تمشي فيها
زوجتي تقولي الحينة الشرطة بيلحقونك
قلت لها خايسه خايسه خلنا انغامر
الاسبان فيهم عرج عرب بيمشونها معنا
والمهم ونحن في هذي المعمعه شفت لافتت الفندق
وما في غير البريك (فرامل) في نص الطريق وارجع للخلف وسوي زحمة وهرنات
ووقف عند الفندق وانزل
وخلصت الحتوته يالله وقت النوم
صورة من متحف نادي برشلونة
صورة لبعض الكؤوس والدروع التي حصل عليها النادي
صورة بانورامية لملعب نادي برشلونة
هذي صورة ونحن طالعين من النادي وباتجاه المترو .. وحصلت القطوة .. وقلت اصورها والناس اطالع شو يسوي الحبيب لاني فجأة وقفت وزوجتي المصونة تمشي ولا تدري اني وقفت
صورة بانورامية اخر لملعب برشلونة وفي اجواء مباراة برشلونة وديبرتيفو
بس الحبيب اللي طالع في الصورة شو سالفته
فضول يبا يعرف شو يالس اسوي
بس وحليلة مشجع برشلوني من خاطرة
كان يصارخ وينفعل موب مثل هذاك اللي في مباراة برشلونة وبايرن ميونخ
شكلي انا في كل مباراة لي قصة مع احد المشجعين
ويالله بس تعبت من الكتابة
وحياكم الله