صورها لسكن وباين فندق البنسويلا عالزاويه احنا مقابل الفندق المبنى الثاني

اسفه حجم الصور صغير وحضرتي غشيمه بالصور ضغطوا عالصوره يمكن تكبر .
اليوم اللي بعده 26/6/2008 قلتا ناخذ لفه عالمحلات القريبه من السكن ولقينا محل تاجير سيارات اجرنا سياره قولف 2007 ولفينا فيها على شواطئ الهوت باي الطرق كانت خيال ولما بعدنا شوي جتنا طرق جبليه والبحر تحتنا والروعه لاتوصف سبحان الخالق وفيه باعه عالطرق تبيع جلود حيوانات وقواقع وتحف ومشغولات يدويه

وهذي صور لبعض الباعه اللي عالطريق مع اني محرجه جدا من الصور بسبب الحجم

وبعدها صار الجو عجيب قلنا نلروح نتغدى بالوتر فرونت وتغدينا بمطعم فشر مان وكانت النوارس تشاركنا الاكل وفعلا مو وقته لما تكون ميت من الجوع وتجي النوارس تاخذ الربيان وتطير فيه
بعدها خذينا لفه بالسوق المحلات راقيه وحلوه اخذنا فكره وشرينا شغلات بسيطه للاولاد وطلعنا اخذنا لفه بالبحر وقت الغروب وانتهى اليوم ورجعنا الشقه

27/6/2008 الصبح الساعه 11 الجو حلو ومغيم شوي قلنا نبي نروح حديقه النعام وسالنا عنها قالوا لنا بعيده التاكسي افضل اتصلنا على ارقام السواقين اللي بتقارير الاخوان بس كلهم اعتذروا قلنا الله يسهل ووقف لنا باص عام قال اوديكم ب 300 راند كاسرناه ب250 راند ووافق وصلنا المزرعه واول ماوصلنا سالنا الموظف اذا الزياره تبونها مع وجبه الغدا من لحم النعام والبيض وتمشينا فيها والمرشد يشرح عن النعام ومنتجاتها ويخليك توكل النعام وتركب عليها وتوقف على بيضها واخيرا اكلنا لحم وبيض نعام وكانت الطواويس تدور بالحديقه على راحتها محد يزعجها او يلحقها وهذي بعض الصور

هذا الطاووس اللي يتمشى بالمزرعه وبعدها رجعنا البيت ريحنا شوي واخذنا سيارتنا تمشينا بالمنطقه ورحنا عشينا الاولاد ورجعنا للراحه لانه الجو بارد جدا والصغار تمللوا وانتهى يومنا
السبت 28/6 بدا اليوم بشمس مشرقه والسما صافيه ومافي غيم والبراد اللي يرد الروح قلت فرصه نروح جبل الطاوله وبالفعل رحنا وصعدنا بالتلفريك الى القمه صار الجو ابرد بكثير عن البرد اللي تحت وسبحان الله تحس انك تلامس الغيوم وبدت تمطر شوي وللاسف اغلب الصور بجبل الطاوله شخصيه بس صوره وحده واحنا صاعدين بالتلفريك راح احطها لكم

الحمد لله على السلامة
إن شاء الله تكونون استانستوا بسفرتكم
وآآآآآآآآآآآآآآه يا جنوب أفريقيا
كنت بنفس الوقت بكيب تاون والاجواء كانت أكثر من روعة

رجعنا تقريبا الساعه 3 العصر ريحنا شوي بالبيت ولفينا بالسياره بمنطقه القرين بوينت ولقيت سوق شعبي كانه بسطات يبيعون فواكه واشياء بسيطه ومقابل السوق افرع لمحلات وولد وورث وايدجر وتسكر عالساعه 6 المغرب ردينا وكنا ملينا من اكل المطاعم والاولاد اشتاقو للعيش قلنا نروح البيت ونتعشى عشى بيتاوي
يوم 29/6 كان يوم احد طلعنا الساعه 11من البيت رحنا سوق الاحد ماكان فيه شي غريب بس شريت البومات صور اعجبتني واخذت سوار افريقي خشب ملون للذكرى واعجبني فنجان قهوه مع الصحن ملون الوان ورسومات افريقيه بعدها رحنا الوتر فرونت وكان فيه عروض تقام يوم الاحد وصدفه كان الجو حلو وفرق تقدم عروض افريقيه وقعدنا شوي وبدت السماء تمطر قلنا نروح الكانال ووك وشفنا بالخريطه انه على طريق N1ومسكنا الشارع ودايركت لقينا روحنا امام مدخل كانال ووك والعاب راتنجا تبين من بعيد شافوها الاولاد وطبعا لازم يروحون وراحو والعبوا الالعاب مو غريبه عاديه بصراحه نفس العاب المدينه الترفيهيه بالكويت وصار برد ماكملنا باقي الالعاب رحنا تغدينا بالكانال ووك وسرعان ماظلمت الدنيا وماشفت المول من بره قلنا لازم لنا رجعه مادام دلينا طريقه وسيارتنا تحت ايدنا وايضا كان المول زحمه حيل لانه يوم احد وعطله .
الحين اخليكم مع بعض الصور للعروض اللي بالووتر فرونت ومره ثانيه سامحوني على حجم الصور

ابو الجوري الله يسلمك وطبعا انت عايش الشعور نفسه بس يالله استعيد معاي ذكريات جنوب افريقيا
والحين خلني اكمل التقرير لاني ملزمه اخلصه اليوم