اخوي اطلب اكل بحري حلال 100% واطلبه مشوي او مقلي بزيت نباتي لتجنب دهون الخنزير
بعض الماكولات مثل البطاطس وغيرها من خضار تقلى بزيوت نباتيه في مطاعم الفاست فود
في قائمة بالمطاعم الحلال في اليابان ممكن تستعرضها خلال المواضيع المثبته
تحياتي لكم

مشكور يالغالي ويعطيك العافيه ، يعني بفتقد هناك فعلا الدجاج واللحم صح؟ الله يكون بالعون ،، واتمنى من اللي عنده اضافه يفيدنا

اخي الكريم القطري حفظك الله
كثير من موظفي راس لفان عموما وقطر غاز خصوصا ذهبو الى اليابان لفترات طويلة او محدودة
.. لكن المشكلة في الغالبية انهم مايستفسرون عن البلد يعني احد الاخوان مهندس في قطر غاز وابتعث سنة الى اليابان واول مارجع كان يشتكي من الغلاء ف قلناله ليش
.. قال السكن غالي والمعيشة غالية ومن هالكلام
.. اتضح ان الاخ ساكن في برج فاخر مايسكنونه الا vip ومستأجره بالشهر ب 100 الف ريال
.. مع ان بمقدورة ارسال ايميل واحد للعلاقات العامة بالشركة المستضيفة وسؤالهم عن مناطق السكن معقولة السعر وتكون بمواصفات كذا وكذا
.. صدقني يمكن بالشهر مايوصل سعر الشقة 10 الاف ريال
.. بالنسبة للاماكل والمشرب هناك مطاعم عدة اسلامية في جميع انحاء اليابان غير هذا في محلات تبيع الاكل الحلال من دواجن ولحوم حلال وكل شي متوفر
لكن بالبحث كل شي يبين وانا صراحة احييك على هالخطوة انك سالت وإن شاء الله ماتركب الطيارة الا كل المعلومات عندك وماعليك امر ابيك تكتب في ردك القادم الامور اللي تبي تستفسر عنها كلها عشان اذا جاوبنا عليها تسويلها برنت ومن توصل تكون متطمن

يعطيك العافيه اخوي Stranger Man
ماقصرت على تشجيعك ومعلوماتك وانا ان شاء الله بجرب وبعطيكم عن تجربتي هناك باذن الله ورعايته ، للعلم انا مب مبتعث من راس غاز : )
ومشكور مره ثانيه ولا تنسانا من الدعاء

سلام عليكم
اخوي بالنسبه للاكل باليابان راح تتعب وياه اذا انك ماتحب المأكولات البحريه . بس اذا تحب المأكولات البحريه فأمورك انشالله راح تكون تمام واذا ودك تاكل دجاج او ماكولات بحريه عليك بالمطاعم الهنديه فيه مطعم موجود في اغلب مناطق اليابان مثل هيروشيما واوساكا اسم المطعم " تندوري " بصراحه اكله حلو وطعمه مقارب لاكلنا بالخليج والعيشه باليابان حلوه بلد حلو وترتاح نفسيا فيه بس المشكله الاكل والأكل انحلت مشكلته في مطاعم تندوري بالنسبة لقيمة الاكل فغالي نوعا ما . السكن رخيص باليابان ماعليك من اللي يقولك غالي دامك بتسكن في فندق الاربعه نجوم لانها تعادل فنادق الخمسه نجوم اللي عندنا بالخليج بس فيه شي غالي المواصلات غاليه فحاول انك تسكن في منطقه قريبه من المنطاق الحيويه وتقلل من التكاسي .
ولا تطوفك هيروشيما مرها يوم ووسع صدرك فيها ومر حديقة القنبله .
وبالتوفيق انشالله

القطري7779
الله يعافيك ياخوي وهذا اقل مايقال عنه حق وواجب بإن اخدم لو بشكل يسير ولاترا لايردك الا السانك بس اسال وبإذن الله يقدرني على إفادتك وبالنسبة للابتعاث اسمحلي ان اغلب الي يروحون اليابان عن طريق عملهم من شركات الغاز وانا لست منهم والله يوفقك في عملك لان حتماً انك بتستفيد منهم وبتفيد بلادنا العزيزه قطر
الله يوفقك في حلك ورتحالك ويوصلك لقطر واهلك سالم غانم اللهم امين

ابو خلوفي
ولا تطوفك هيروشيما مرها يوم ووسع صدرك فيها ومر حديقة القنبله .
وبالتوفيق انشالله
هلا وغلا اخوي ،، اي عادي الاكل البحري ان شاء الله ماعندي مشكله ، هني آكل هامور وربيان وهالسوالف بس مب جامد.. ان شاء الله هناك نتعود
مشكور عالنصايح يالغالي ،

stranger man
الله يرحم والديك الشيخ ،، اهم شي لا تنسانا من دعائك الصالح ، وللعلم البعثه من شغلي وحاليا اشتغل في قطاع حكومي .. ;)
الله يوفقك ويوفقنا وياك يارب

هلا أخوي أنا مثلك إن شاء الله مسافر لليابان ولفيت أكثر من موقع ويمكن أقدر أخدمك هذي مجموعة بسيطة من المطاعم الحلال باليابان وللأمانة المشاركة منقولة من منتدى آخر وكل الشكر للأخت تراميسو
المطاعم الحلال :
المطاعم الحلال كثيرة في اليابان نذكر منها :

• مطعم علاء الدين : مطعم إيراني يقع بالقرب من محطة روبونجي خلف مبنى التلفزيون .
• مطعم كراتشي : مطعم باكستاني يقع في شنجكو بالقرب من بناية محلات ( ) لبيع أجهزة الكومبيوتر .
• مطعم السندباد : مطعم عربي في منطقة شينجوكو .
• مطعم العين : مطعم عربي يقع في مدينة يوكوهاما القريبة من طوكيو .