اخوي ابو أحمد السلام عليكم ورحمه الله وبركاته
أولاً: تروح وترجع بالسلامه
لكي اعفيك من عناء البحث في المواضيع السابقه واختصر المواضيع السابقه انصحك بالتالي
بخصوص المبالغ الماليه: يفضل الدولار لسهوله وثبات صرفه في اغلب الدول ومنها المغرب
بطاقات الفيزا كارت لا انصحك باستخدامها نظراً لعمولتهم الزائده التي يأخذونها على كل عمليه والبديل الأفضل في نظري الكاش (النقدي)
الفنادق : ماشاء الله عليك احسنت الإختيار . لايعلى على فندق الحياة ريجنسي(سعرة 1400 درهم) والشيرتون(سعرة 160-180 دولار) بالرغم من رحابه الشيرتون وسعة غرفه إلا اني اميل إلا الأول اكثر لقربه من الخدمات ومن نوافذة تطل على الشارع المغربي :unsure:
ايضا فندق رويال منصور وهو ايضا قريب لفندق الحياة وهو من الفنادق الممتازة
المواصلات: والله يابواحمد ما انصحك بتاكسي لأن اغلب التاكسيات بدون مكيف وقديمه احياناً تحس إن المكينه تحتك من الصوت والأهم من كذا إنك ماعرفت شئ فالبلد بعكس لما تستأجر سياره تمشي متى ماحبيت. ناهيك عن تكاليف الطاكسيات
الأسواق: طبعاً الأسواق في كازا وخاصه الشعبيه تتميز بالصناعات المحليه وأخص على سبيل المثال الجلابيات المغربيه التي تميز بها المغرب من قديم الأزل وتجدها في سوق الحبوس
اباريق الشاي من الهدايا التي يحرص زوار المغرب شرائها
باب مراكش(سوق شعبي ) بجانب فندق حياة ريجنسي ///كذلك اسواق المعاريف
المراكز التجاريه ومنها التوين سنتر
وأعذرني على التقصير هذا مايحضرني عن الأسواق لإني لا احب إرتياد الأسواق حيث انه مهلكه للجيب
هذا الرابط من مشرفنا القدير القلب الكبير فيه اغلب ماتود معرفته عن المطاعم فله الف شكر
موجز عن المطاعم https://artravelers.com

أخي أبو أحمد
أخوي الفيصل ماقصر بالأجابه على معضم الأسئله ، وهو السباق دائما .
لي اضافه ممكن تفيدك بعد بخصوص الأماكن في كازا أو القريبه منها والمطاعم ، سجل عندك شاطئ عين ذياب وفيه مطاعم بالهبل ، ومنطقة طماريس (على فكره لا يفوتك كفته اللحم في المطاعم في طماريس أشتر اللحم بمعرفتك وهم يطبخونه) ، الميناء (وفيه مطاعم السمك) ، مطعم الأمين للأسماك ،ولا يفوتك مطعم (السعد) المقابل لميامي عنده سندويشات لاتفوتك ، والمحمديه مدينه صغيره قريبه من كازا يمكنك زيارتها والعوده لكازا في نهار .

أخوي أبو أحمد
نتمنى لك سفرة سعيده ، ومين قال مافيه شئ عن كازا ، صدقني أكثر شئ كازا ، أنا أتمنى منك أن تأخذ فره على البوابة وتستخدم ماكينة البحث ، وشوف إذا ما تجد كل مبتغاك وأكثر بعد ، وعلى مسئوليتي الشخصية ، ومن بعد ذلك أبشر باللي ما لقيته وودك تعرف عنه نخدمك بعيوننا ، ونصيحة صغيرة والكبيرة جايه بعدين ، خذ معك 500 درهم مغربي تمشي بها أمورك والباقي سعودي شكل 1 ، 5 ، 10 ، 50 ، 100 (كثر منها) ، 200 ، 500 ريال ، تعرف ليش لأن الحج جاي والفلوس السعودية عليها طلب عالي وتعزز تلقى المصارف تلحق وراك والسعر فوق فوق ، وخل عنك الدولارات وغيره خاصة في هذه الفتره من السنة ، وأنا اصلا أفضل أن أستخدم بطاقة حسابي الدولية ليس غيرها ولكن تأكد من البنك ألا يكون يأخذ عمولة عاليه مثل بطاقات الفيزا ، وإذا عندك بطاقات ذهبية أو مميزه فدربك خضر أعتمد عليها هي ولا غيرها وزي ما قلت الكاش السعودي له طلب الآن. ولنا لقاء بعد تصفحك للبوابة.
الأخوان الفيصل و ولدالدرب
ما شاء الله عليكم عيني باردة عليكم بصراحة وفيتوا وكفيتوا ، والله لا يحرمنا من تواجدكم بيننا دوما وليس يوما.
وتقبلوا تحياتي
المسافر

الفيصل وعليكم السلام ورحمة الله وبركاته،،،
ياخي من ردك ممبين عليك خبير ماشاء الله عليك
واشكرك على ذكر هذه النقاط المهمة والنصائح الحلوة...
ولد الدرب ماشاء الله عليك
ماخليت شئ بخصوص ذكر المطاعم
اجابة وافية
الله يحفظك...
المسافر ( دائما هذي ردود المشرفين الله يخليكم لنا )
بس ترى استخدمت البحث (بتربو) وتصفحت قبل لاأسال
وكان تصفحي على السريع
واعتقد بعض اسالتي
ماتطرق لها الاخوان في مواضيعهم السابقة
وبعد موضوع المطاعم المثبت في البوابة
صدقني حست فيه ماعرفت المطاعم في اي مدينة
وخفت اسجلهم عندي واذا وصلت كازا
اقول للطاكسي ودي المطعم الفلاني
والرجال مايكذب خبر
ياخذني لاغادير
المهم ماقصرت اخوي ومشرفنا المسافر
طيب وصلنا للجزء الثاني....

• بصراحة واحد من الشباب قالي كون حذر من موضوع السرقات

وخاصة في الاسواق الشعبية.. .؟؟؟؟!!!!! (صح أم خطأ ) -- صار اختبار --

• ماهي أماكن الكوفي شوب والجلسات الحلوة..؟؟ طبعا أفضل المغلق منها
• وأي خدمة من المغرب وخصوصا كازا مهما كانت...

الرجاء ارسالي رسالة على الخاص ولاتترد..؟

1. أخي أبو أحمد

أخي أبو أحمد

ظلمت المشرفين قول أنا بس ما عندي مشكلة ، صدقني الود ودي أخدم الجميع ومن عيوني بعد ، وأنت لست جديد عن المنتدى وابخص بأموره ، تراك راعي محل ، ولكن ما أحببت ذكره هو أن أنا أو غيري من الأعضاء نكتب ونجيب ثم تتكرر الأسئلة أكثر من مره ونعيد الكره ، فصدقني لو بقينا كذا راح تلقى في البوابة ألف مشاركة لو فصلتها فراح تلقاها متكرره أي أن البوابة راح تفقد رونقها ، غناك عن أنه غير صحيح أن أبحث لك عن من كتب رد على نفس السؤال وأخذه من مشاركته واضعه تحت إسمي أو إسم غيري ، هذا ما أحببت أن أوصله لك وهذا ليس تقليل من حقك أو حق غيرك ، عموما خذ فره شوي شوي وراح تجد إللي تبيه ، وابشر الآن بأحل الكلمات المتقاطعة .
بالنسبة للأسواق الشعبية زيها زي لما تروح الحراج ببلدك والزحمة وأنت أبخص ولكن ترى الحذر زين هنا وهناك وفي كل وقت ، الواحد مو يخلي أموره مفلوته وما يبي أحد ينشله....
يا كثر القهاوي والكفوي شوبس بالمغرب عد وأغلط وعندك في شارع الجيش مقابل حياة ريجينسي وايضا في عين الذياب على الكورنيش وأفيدك الكوفي شوب تلقى فيه جلسات خارجية وداخلية وصدقني راح تعجبك الخارجية أكثر من الداخلية ، ويمكن يكون للبرد دور كبير في أنك تختار بين الفنية والأخرى الجلسات الداخلية ولكن أعتقد أنك راح تواجه البرد عطفا على المكوث بالداخل ، أما المطاعم فراح أبسطها لك ، شوف أخوي عين الذياب كلها مطاعم وفيها 2 ماكدونلدز و 1 كنتاكي في الجهة الأخرى مقابل وكالة هيونداي ، هذا غير المطاعم المقابلة لمطعم ماكدونلدز الثاني بعد السينما ووكالة نيسان ، وإذا بغيت مطعم سمك حلو عندك مقابل فندق ريجينسي سوق قديم إسمه باب مراكش أدخلة من الزاويه من عند الإشاره وراح تلقى كم مطعم سمك هناك أطلب على كيفك ويازين الرخص ....
وإذا عندك أي إستفسار آخر أبد لايردك إلا الكيبورد ، وتحت أمرك حبيبي. أما بخصوص أي طلب لي من المغرب وخصوصا كازا ، فصدقني والله روحتك ورجعتك لنا بالسلامة هي أكبر هدية لي من عند الله ، وإذا ما فيه كلفة ترى الشباب بإنتظار تقرير مفصل بالصور والأسعار والعناوين عن الدار البيضاء كما تقول فلو أتى من أراد الذهاب لها من بعدك فسيكون موضوعك مرجع له في سفره فلاتبخل عليهم. وربي يوفقك في حلك وترحالك.
تقبل تحياتي
المسافر

حبيبي والله ابو السفر (المسافر)
ياخي وكلامك على راسي
ماقصرت والله
والحين اطبع الموضوع واخذه معي
لاني بصراحة نسّاي
لكن بما إنك جبت سيرة السينما
فيه شئ يسوى وقت الفضاوه
وتكون سينما نظيفة والا لا...؟؟؟
وأوعدك ان شاء الله يكون اخر سؤال ..!!!

أخوي أبوأحمد
أسئل قد ماتبي ، مافيه شئ إسمه آخر سؤال ، نحن هنا في خدمتكم جميعا ، أبد لاتتردد فيه أسئله أكثر من عيوني.
عندك في عين الذياب سينما 100% ونظيفة وهي متقابلة مع مسجد الأمير عبدالله وبالقرب من وكالة نيسان ، الله يلعن الشيطان نسيت إسمها ،ولكن معروفه راح تشوفها ياكبره كبراه ، أتذكر إسمها وأقوله لك ولكن تراها واضحه كوضوح الشمس. وفيه الكثير والكثير في المغرب من الأماكن التي تستحق الزياره وإذا بغيت نصيحتي النوم بدري ، وتقوم الصباح بدري بين 7 و 9 صباحا ، وروح لف وتمش والله ما تمل أبدا وراح ترى المغرب وحلاته على كيف كيفك ، بعدين لا تقول هنا لا وهناك لا ، غامر وراح تنبسط ، ولكن إنتبه لنفسك و لاتقترب الأماكن المشبوهه وتذكر الله في سفرك ، وكن سفيرا لدينك وبلدك ، وهذه نصيحتي لك كأخ عزيز علينا جميعا. والدين النصيحة.
وتقبل تحياتي
المسافر

اقامة طيبة وسفرا سعيدا باذن الله
تحياتي

والله ماقصرت
وبارك الله فيك
ومن كل النواحي تطمن
وان شاء الله بعد العودة اوافيكم بالتفاصيل
لاكين فيه سوعال اخير
بالنسبة لمطار دبي المشكلة عندي ترانزيت مايقارب 8 الساعات اواكثر والعودة يمكن 5 ساعات
وين اقضيها وهل يعطوني غرفة في اي فندق للراحة
ماهي نصيحتكم طال عمرك..؟؟؟
(مع العلم بانني قد سافرت عن طريق مطار دبي)