راعية_بانكوك
11-12-2022 - 04:11 pm
السلام عليكم ورحمة الله وبركاته ..
اخواني اعرف انكم بتساعدوني ولا واحد منكم بيقصر معايه .. تاخرت زيارتي لليابان لاني ما حصلت الاجوبه و الاستفسارات اللي طرحيتها ..
ارجو منك اتساعدوني ..علما انه زيارتي لليابان امنية من الامنيات اللي اتمناها ..
اولا :-
ان شاء الله بتكون مدة اقامتي 3 - 4 ايام ..و الكل اقترح عليه اروح طوكيو بدل اوساكا ..
اللي اباه منكم :-
اي منطقة في طوكيو اسكن ؟ اريد شي قريب الاسواق والمحلات والمطاعم ؟ يعني حددولي الفندق و اسم المنطقة ؟ لاني ما اريد استخدم تكاسي وايد
وين اروح في طوكيو ؟ او وين تقترحون اذا حابه اطلع خارج طوكيو يوم و ارجع ؟
كم الميزانيه للشخص الواحد ؟ بدون السكن و الطيران ؟ لمدة 4 ايام
علما من اللي قريته اني شفت اسعارها مقاربه للندن ولا انا غلطانه ؟؟؟ بس وانا اتصفح على الانترنت قريت في احد المواضيع انه سعر كوب الشاي 100 درهم هل هي فعلا غاليه ولا كيف ؟؟
و اسمحولي اخواني اذا ثقلت عليكم
والسموحة أختي لأني مارديت على الموضوع الثاني بس شوي انشغلت ...
المهم أول شيء 3-4 أيام بصراحة صعب جداً تروحين اليابان لهالفترة البسيطة
يعني لو قلتي اسبوع اقل شيء ممكن لأن المسافة بعيده وبعدين أي مكان في اليابان يبيله وقت وايد ...
لو تعطينا بالضبط او تقريبا اي شهر او اسبوع افضل ... التاريخ اللي ناويه تروحين فيه لليابان وراح نعطيج جدول مرتب ان شاء الله مع الفندق والتنقلات والمصروف اليومي .. بس كل شيء في النهاية يعتمد عليكم ان شاء الله
ولو المده بالضبط بس مثل ما قلت .. أقل شيء اسبوع لو رايحة بس طوكيو يكون أفضل
بس بالنسبة لكوب الشاي ب 100 درهم
لا لا لا بس يمكن فندق معين ... الاسعار بشكل عام معقولة وقريبة من بعض اسعارنا في الامارات.. مثلا يعني "ستاربكس" و"ماكدونالدز" وبعض الاماكن يمكن تفرق 2-4 دراهم .. والماي اقل شيء يمكن 4-5 درهم .. يعني لاتحاتين هالموضوع .. وبالعكس يمكن اوروبا اغلى شوي ... في النهاية كل شيء يعتمد عليكم انتوا والاماكن اللي تروحونها
.. يعني انا نصيحتي للشخص الواحد تكفي 100دولار كمصروف يومي للمترو والاكل ... الا اذا الواحد يحب يصرف بزيادة هذا شيء ثاني ... انا 100 دولار كانت تكفي وتزيد احيانا
اتمنى اكون اضفت بعض الافادة
تحياتي