- مسار الرحله ...الرياض – جنيف – انترلاكن – جنيف الرياض
- الاماكن اللي اروح لها؟ ....مطاعم رومنسيه وراقيه ؟
- ميزانية السكن في المدن
- ميزانيه المعيشه والتنقلات
- نقاط مهمه ومو واضحه لي لحد الان
السلام عليكم ...في البدايه احب اشكر مشرفين المتندى والاعضاء على الجهود اللي يسوونها والمعلومات اللي يقدمونها للاعضاء والزوار
قريت مواضيع كثيره في القسم وخرائط واستفسارات الاعضاء الثانيين وكانت مفيده لي جدا لكن مع كثره القراءه وكثرة الاستفسارات تلخبطت شوي ههه وعشان سفرتي راح تكون شهر عسل انشالله حرصت بعد ماكونت فكره عامه عن البلد والمدن والاسعار وطريقة التنقلات اني اكتب هالموضوع للاستفاده من خبراتكم ومعلوماتكم بشكل دقيق ومرتب ومتاكد انشالله انكم ماراح تبخلون علي بمعلوماتكم المفيده ونصائحكم والله يعطيكم العافيه ومشكورين مقدما
تاريخ الرحله 16-17 /5/2010 والعوده 30-31/5/ 2010 ( المده قابله للنقص يوم او يومين على حسب البرنامج اللي تقترحونه علي )( اخترت هالتوقيت لانه بدايه فصل الصيف او الربيع بمعنى اصح والجو بيكون انشالله ممتاز هناك ) ( يهمني رايكم ؟)
مسار الرحله ...الرياض – جنيف – انترلاكن – جنيف الرياض
الخطوط ....مبدئيا على السعوديه ( سعرها 3600 تقريبا للشخصين ) مميزاتها بالنسبه لي انها دايركت والشي الثاني اني عضو في الفرسان وحاليا عندي تذكره سياحيه لندن مجانا على الاميال اللي عندي حاليا بس تخطيطي اني اخلي الاميال هذي مع اللي اجمعها من سفراتي واستخدامي للكردت كارد انشالله تطلع لي تذكره درجه اولى على اوربا للسنه الجايه لشخصين
سؤالي هو هل فيه خطوط ثانيه ارخص من السعوديه او سعرها مقارب واهم شي تروح دايركت لجنيف ؟ ( نصائحكم ؟)
هل اقص تذاكري الان بالسعر الموجود على الخطوط السعوديه او انتظر شهر زياده على امل انه تنزل العروض حقتهم لاني شيكت هاليومين على موقع الخطوط وكاتبين على العروض قريبا ؟
تقسيم الرحله بين المدن ...جنيف ليلتين ( 3 ايام ) ...يوم الوصول ويوم استكشاف المدينه واليوم الثالث المغادره لانترلاكن ...رسمت التقسيم بناء على تقارير الاعضاء انها كافيه لجنيف لان مافيها شي كثير وايضا لاني برجع لها من انترلاكن وبجلس فيها ليلتين للتسوق والراحه قبل المغادره للرياض ...ابي نصايحكم في تقضية هالايام ؟
انترلاكن 8 ليالي ( 9 ايام ) حطيت هالمده لان انترلاكن تقريبا صايره في نص سويسرا وتقريبا اغلب الاماكن الحلوه موجوده قريب منها ...اسئلتي هي ...هل المده كافيه او قصيره او كثيره ؟ وش الاماكن اللي اروح لها لاني بصراحه قريت كثير وداخ راسي واسماء القرى صعبه ...يعني لو احد يتكرم ويرتب لي الجدول بناء على الايام اكون شاكر له كثير الشكر مع الاخذ بالاعتبار اني مابي اضغط جدولي بشكل كبير عشان الارهاق وعشان ماتفقد السفره الجو الرومنسي فيها لانها شهر عسل يعني بالعربي مهوب كل يوم اقوم 6 الصبح وطلعه لهالاشياء الى 8 بالليل ههه...طرق التنقل بين انترلاكن والاشياء القريبه منها ؟ وطريقه حجز القطارات وهالاشياء ؟
جنيف ( ليلتين – 3 ايام )
الاماكن اللي اروح لها؟ ....مطاعم رومنسيه وراقيه ؟
ميزانية السكن في المدن
بعد بحث طويل في موقع بوكنق لقيت معدل الاسعار في المدن من 900 ريال الى 1200 ريال ..وحسبتها على تقريبا 15 يوم يطلع المعدل 1000 ريال يوميا ...بالنسبه لمواقع الفنادق في جنيف ماحرصت كثير لاني شفتها في الخريطه تقريبا قريبه كلها من بعض والاسعار متقاربه ( بحثي كان على فئه 4 نجوم ) بالنسبه لانترلاكن بحثت بحرص زياده وتقريبا استقريت على 3 فنادق من فئه 3 نجوم و4 نجوم وكان الفكره الاساسيه في البحث هي موقع مميز ومطل تماما على البحيره من الغرفه نفسها وانشالله راح اسئلكم عن الفنادق هذي ووش ترشحون منها بالتحديد اذا فيه احد جربها من قبل ...
ميزانيه المعيشه والتنقلات
هل مبلغ 1000 ريال يوميا كافي للاكل والتنقلات وتذاكر دخول الاماكن وهالاشياء ؟ طبعا تخطيطي بالنسبه للاكل راح يكون في مطاعم عاديه يعني حلوه بس مو غاليه مره وراح اخصص 3 مرات في السفره راح يكون فيها العشا في مطعم حلو وراقي ؟ كم التكلفه بالتفصيل اذا سمحتوا ؟
نقاط مهمه ومو واضحه لي لحد الان
عشان اطلع الفيزا هل السفاره يقبلون التذاكر الالكترونيه او يدقرون فيها ؟ لاني احتمال كبير اشتريها من موقع السعوديه ارخص واريح من المشاوير لمكاتب السفر خصوصا اني ماراح اخذ منهم شي لان حجزي للسكن وهالاشياء بيكون من طريقي انا ...الشي الثاني هل صحيح يطلبون تاكيد حجزك للسكن بان الفندق هناك يرسل لهم فاكس بحجزك؟ وش الطريقه في هالوضع ؟
قريت كثير عن بطاقه سويس باس وهالاشياء بس الحقيقه مافهمتها بالضبط ( اللي فهمته انها تعطيك خصومات في التنقل وهالاشياء ) طيب وش البطاقه المناسبه لمده رحلتي ؟وكم سعرها ؟ ومن وين اشتريها ؟
الف الف شكر لكم مقدما وماراح انساكم انشالله بدعوه صادقه لكل من ساعدني بمعلومه او نصيحه او تعديل في البرنامج ولاتحرمونا من ردودكم
وانا بالخدمه