بلاد الطليان
27-11-2022 - 02:01 pm
السلام عليكم ورحمة الله وبركاته
اخواني محتاج مساعدتكم بخصوص السفر إلى بلاد الطليان
1 - يعني ماهي النصائح والطريقة والإجراءات اللازمة + وكم تكلفة التذكرة
2 - أفضل موسم للسفر إلى إيطاليا
3 - أنا المدن اللي محددها حتى الأن 3 مدن ميلانو وروما والبندقية أبي المدن أو الاماكن الجميلة
4 - تكلفة الرحلة ل 4 أشخاص شباب فقط لمدة 7 - 10 آيام
شباب نصائحكم من ناحية الحجز والشقق او الفنادق + أنا سمعت أنه فيه بعض الفنادق يجي فيها غرفتين كل غرفة سريرين سينقل ودورة مياة (اكرمكم الله) ومطبح تحضيري
لان تعرفون الشقة بتكون للنوم فقط لانه شباب مو عوائل
أبي تسوون لي جدول لمدة 7 أيام الى 10 ايام مع ملاحظة أنه يوم بروح أحضر مباراة للإنتر في الجوزيبي مياتزا
شباب أحس أني ضايع أبي رايكم بصراحة حلمي من فترة أروح إيطاليا والاهم التكلفة التقريبية
وأخر أستفسارين
فارق التوقيت كم يفرق عن السعودية والنهار كم ساغة أنا سمعت أنه طويل يعني الشمس تشرق متى وتغرب متى
السوال الآخير ://
للأشخاص اللي لغتهم الأنجليزية ضعيفه كيف التعامل هل هو سهل او صعب
وهل تنصحوني أستخرج فيزا للحجز والسفر أو كيف الطريقة
عليكم السلام ورحمه الله وبركاته
قبل كل شيء انا ما سافرت لأيطاليا و ناوي اسافر لها قريب لكن من خلال متابعتي للتقارير في هذا المنتدى و تجميع الأشياء المهم و المفيده اقدر افيد لو شيء بسيط و صحيح عن تجربه اعضاء كثيرين سافروا لأيطاليا ..اولا اخي لازم تطلع فيزا (الشنغن) من بدري او يعني قبل السفره ب شهرين اقل شيء تجنباً اي تعقيد تواجهه و من ثم عندك وقت تعدل وضعك , بخصوص التذكره هي ع حسب المواسم يعني ممكن الفتره هذه اغلى من باقي الفترات لكن لا تشيل هم التذاكر بسيط
الأيام هذه طبيعي الأجواء حاره ممكن خصوصا روما و كل ما انتقلت للشمال الجو يعتدل طبعا ميلان بالشمال
المدن ألي محددها انت من افضل المدن و هي تكفيك للتمتع بأيطاليا لكن احب اضيف لك مدينتين و هي قريبه من ميلان الأولى جزيره الكومو و جزيره لوقانو طبعاُ لوقانو ع الحدود السويسريه كل جزيره ممكن تروح لها و ترجع بنفس اليوم يعني تحدد لك اي يوم و الجزيره و انت بكيفك ..
التكلفه سلمك الله ع حسب وضعكم هنا ما اقدر افيدك لكن لو كان الوضع تمشيه و اكل وشرب من غير مشتريات مثل هدايا ممكن 10 ألف للواحد او اقل شامله التذاكر طبعاً , لأن في الأخير انتو موضوع الفنادق بتحجزون و تقسمون السعر ع اربعه عشان تقل القيمه و كذا انتو المستفيدين ...
نصيحتي لك شوف موقع بوكينق و الله موقع روعه و انت اختار أي مدينه وشوف الأسعار و المكان و الأماكن القريبه من الفندق حتى السعر انت حدد كم مثلا تبي و نصيحه لا تنظر ألى عدد النجوم طالما انك تبي السكن للنوم فقط مش شرط يكون 5 ستار اهم شيء النظافه و مكانه و السعر طبعاً ..
الفيزا اهم شيء يا خوي لأنك ف الأخير بتحجز الفنادق بالفيزا و انصحك تطلع فيزا الراحجي (تسوق) ممتازه جداً ولا فيها اي مشاكل .
التنقل بين المدن انصحك باستخدام القطارات و هي وسيله الأفضل و الأرخص و المترو يكون داخل المدينه
اللغه يا خوي موب شرط يعني ما بتحتاج لها كثير مره الشعب هناك متعصب للغه الأيطاليه لكن مثلا في الفندق و وقت حجز القطار مثلا طقطق عليه بكم حرف اهم شيء توصله له المعلومه و امورك ف السليم ..
اما موضوعك لحضور المباره و مشاهده فريقي و عشقي الإنتر هنا يبيلك تنتظر و تشوف متى ينزل جدول الدوري عشان تنسق لك وقت حلو و تحضر فيه مباره الديربي مع الميلان او اليوفي او روما , يعني مباره قويه هذا شيء ممتع و انا انتظر الجدول عشان انسق وضعي لحضور مباره الديربي او اي مباره قويه لكن ابيها من بعد شهر 12 ميلادي يعني الشتاء , هذا الوقت من افضل اوقات عندي تحس شغف التحدي و حماس المباره و ابضا في منتصف الدوري بتكون وانت بكيفك عاد و بخصوص تذاكر المباره في موضوع لأبو طلال الله يسلمه خاص بالتذاكر بتلاقيه هنا بالمنتدى و التذاكر بتوصل للفندق ألي بتحجز عليه لا تشيل همها لكن الجدول ما نزل ولا شيء للحين باقي
ع العموم ان شاء الله اني قدرت اساعدك لو بشيء بسيط و اخواني بالمنتدى ما يقصرون و بيساعدوك اتمنى لو عندي شيء موب واضحه او ملاحظات يتم تعديلها