1. # المواصلات :


2. # الاتصالات :


3. # الأكل والشرب :


4. # السكن :


5. # مناطق قريبة :

مدينة ماينز (Mainz) نصائح وملاحظات لكل زائر او مريض ,,
السلام عليكم
هذا الموضوع ليس له علاقة بالعلاج أو بمستشفى .. الموضوع عبارة عن نقاط ونصائح من واقع تجربة لي في هذه المنطقة بعد رحلة علاج استمرت لشهرين .. ولا راح أتطرق لاماكن السياحية أو أماكن التسوق ..
منطقة ماينز هي منطقة صغيرة بالقرب من فرانكفورت تبعد بالقطار تقريبا 35-40 دقيقة .. منطقة هاديه وحلو والسكان محترمين ، ويوجد فيها المستشفى الجامعي إلي اغلب العرب يعالجون فيه ..
قبل لا ابدا في البداية إذا كنت رايح علاج فلا تحتاج مترجم لان الأمور سهله وميسرة ومتفهمين لكل شي في المستشفى او في المدينة ، لان استغرب أشوف ناس وياهم المترجم بكل مكان حتى بالمطعم يجلس مع أهلهم !! يا أخي رتب أمورك بنفسك ما تحتاج لكل هذا التعقيد ومنها تأخذ راحتك مع اهلك وعيالك وتوفر فلوسك .

# المواصلات :

· استخدم القطارات الرخيصة لان تكلفتها لا تقارن بالسريعة ويفرق عنها فقط كثرة الوقوف . · عند وصولك إلي مطار فرانكفورت تستطيع أن تستغل القطار وهذا الأفضل حيث المسافة قريبه ، تركب قطار اسمه S8 أو RE يوصلك لي ماينز (Mainz HBF) · سعر تذكرة القطار من المطار 3.5 يورو ومثلها لي العودة . · ضروري تكون عندك خريطة فرانكفورت لي القطار والاندرقراوند وهذي تحصلها عن اي مكتب استعلامات . · في ماينز لا يوجد الاندرقراوند فاعتمادهم على الباصات ، فأنصحك انك تشتري تذكرة شهرية وقيمتها 55 يورو مفتوحة بأي وقت مع استخدامها في منطقة فيسبادن ، أو تذكرة أسبوعية بقيمة 20 يورو ، لان التذكرة الوحدة تقريبا 2.60 يورو فقط ذهاب ، ومكتب تذاكر الباصات بالقرب من محطة القطارات فقط اسأل عليه ولا تنسى خريطة الباصات لأنها مهمة ، ولحد يفكر بالتاكسي لان مكلفة جدا ولا تأجر سيارة لان المدينة صغيرة ومواقفها صعبة . · محطة القطار وساحة الباصات تعتبر منطقة حيوية كل شي فيها فقط اسأل عن إلي تبيه .

# الاتصالات :

· أما بخصوص التلفون ، إذا كنت تبي انترنت جوال حق الايفون راح تختار شركة o2او فودافون لان فيهم الكرت الصغير الي يركب حق الايفون ، طبعا في شركات وايد بس هالشركتين مجربين اكثر ، تشتري الكرت من محل اسمه SATURN وهو محل الالكترونيات موجود بسنتر المدينة يبيع الكرت ب15 يورو فيه اشتراك نت لمدة شهر و4 يورو رصيد مع العلم الاشتراك بطيء بس ممتاز حق الواتس أب والتويتر وفي سرعات أعلى بتكلفة أكثر ، أما المحل الثاني فهو محل انترنت واتصالات عادي تحصله بعد المحطة القطارات فيه واحد افغاني يبيعه ب 10 يورو من غير رصيد ويركبه ويضبطه لك ( ميزة شركة o2ان الاتصال مجاني مع اي واحد عنده خط o2 وهذي مجربة ومفيدة جدا جدا ) . · أما الاتصال دولي فهو مكلف ولكن تستطيع استخدام برنامج الفايبر او سكاي مع وجود بعض التقطيع .

# الأكل والشرب :

· بخصوص الماء وهذي مشكلة الكل يواجهها إذا سافر لأوربا بسبب عدم معرفة المياه الغازية من المياه العذبة ، فأنصحك بشراء الماء من السوبر ماركت كبير لوجود أنواع عديدة منها وتختار أي نوع بشرط أن يكون مكتوب عليه ستيل steel يعني من غير غاز وهم راح تحس بفرق وإذا شريت العلب تقدر تجمعهم بعدين تروح السوبر ماركت وتبدلهم يطلع عليك الماء بلاش . · وانصح بماء يبيعه محل انترنت يشتغل فيه إخوانا المغاربة بعد المحطة الرئيسية وهو ماء تركي علبة كبيرة جدا بس ماء نقي مثل الي عندنا وسعره رخيص ( وتقدر تشوف عنده خطوط النت بعد ). · أما بخصوص التسوق لأغراض البيت فأنصح بأي محل كبير ( جمعية – ماركت ) وأفضلهم هي Rewe وهي موجودة بالقرب من المحطة الرئيسية مشي 200م اسأل عنها ، او يوجد مجمع صغير في وسط السوق تلقى فيه بالسرداب ماركت كبير. · أما بخصوص الأكل فالمطاعم الحلال منتشرة ولله الحمد خاصة التركية ، وخاصة مطعم تركي يكون خلف المحطة الرئيسية بشارع( kaiserstraBe) لان المطعم حلو وشغل مرتب بالقرب من محل الانترنت المغربي الي قلنا عنه ، وبنفس الشارع يوجد بقالات عربية وإسلامية تبيع كل شي ( خبز- شاي- جبن- زيتون- خضار- فواكهه- لحم وغيرها) بس شارع خطر فيه وايد شباب وأجانب يعني ما ينراح بليل .. · وبالسوق في مطعم ماكدونلدز عند المسرح ، ويوجد مطعم في داخل السوق يبيع دجاج ورز وبالقرب منه محل بيتزات وأكلهم حلو ونظيف وحلال .

# السكن :

· إذا كانت الفترة طويلة شهر أو أكثر انصح بتأجير شقة ، وعليكم بموقع homecompany وهو ألماني يوفر شقق مفروشة وتقدر تشوفها بالخريطة وتحدد اذا كانت قريبة او لا ، طبعا حد في بالك إن يوجد تأمين على الشقة بنفس قيمة أجارها + عمولة الموقع تقريبا 25% +رسوم إضافية للتنظيف وهذا الإجراء يطبق في كل أوروبا ومع هذا تبقى ارخص من الفندق . · أما إذا كانت المدة قصيرة فأنصح بفندق انتر سيتي لان موقعه ممتاز بالقرب من المحطة ومحطة الباصات قريبة عنده وجديد من الداخل وحلو ويوفر تذكرة للباص والقطار طوال فترة إقامتك وهذي ميزة قويه، وسلبيته الوحيدة صغر حجم الغرف مع العلم اغلب فنادق أوروبا جذي ، أما الفنادق الملاصقة للمحطة الرئيسية فلا انصح فيها لأنها قديمة وصغيرة وخدماتها سيئة وبنفس الوقت أسعارها غالية.

# مناطق قريبة :

· بالقرب من ماينز توجد منطقة فيسبادن وتقدر تروح لها عن طريق الباص أو القطار وتكون مجانية إذا شريت التذكرة الشهرية أو الأسبوعية ، طبعا بالباص تأخذ نص ساعة أو أكثر لكثرة الوقوف وبالقطار 10 دقايق . · ومنطقة هايلدبرغ تقريبا بالقطار ساعة بس تستحق الزيارة . · زيارة فرانكفورت لتسوق وأنصحكم بشراء تذكرة خاصة بالمجاميع وهي عبارة عن تذكرة لي 5 أشخاص ذهاب وعودة واستخدمها في الاندرقراوند وبالباصات ليوم كامل بقيمة 25 يورو فقط يا بلاش
نصيحة أخيرة ,, أنصحكم بتنزيل برنامج القطارات اسمه DB يساعد على معرفة مواعيد القطارات وأماكن الوقوف وغيرها ، راح يسهل عليك الكثير وتستغني عن السؤال ، طبعا البرنامج لكل مناطق ألمانيا وهو هام جدا .وبالأخير هذا ما عندي وان شاء الله قدرت أفيدكم ولو بشي بسيط ,, وجاهز لأي استفسار ..
ولا تحرمونى من دعواتكم ..