- مختصر رحلتي إلى بانكوك
- وجبتين طلعوا علينا مال 600 بات
- اليوم الثاني:
- قلنا له ما عليه..بروحك اللي تبرعت
السلام عليكم والرحمة وبركاتة
مختصر رحلتي إلى بانكوك
اقلاع الطيارة على القطرية للطيران بتاريخ 256200 الساعة 7:55 مساء من مطار بوظبي الدولي ووصلنا بانكوك اليوم الثاني الساعة 7:45 صباحا وسعر التذكرة للشخصين كان 3680 درهم
الطيارة من الدوحة إلى بانكوك كانت واسعه وكراسيها مريحة ويديده..وفي نهاية الطيارة فاضية يعني ترتاح في رقدتك..بس يوم ردينا من بانكوك إلى الدوحة الطيارة كانت جديمة وكراسيها ضيقة..وما قدرت ارقد مع انها فاضية في الاخير
التاكسي من المطار, قالوا لي 1200 بات..وتميت الف من مكان لين الثاني..لين ما نادني واحد وقال انا بوصلج..وقطيت عمري في التهلكة وركبت معاه,, وختمت القران وانا في الطريج من الخووف لول..وخذ مني 600 بات..والحرامي قال لي السعر مع الهاي ووي,,بس الجذاب ما وداني على الهاي ويي دخلنا في الزحمه
والرده من الفندق إلى المطار, خذ مني التاكسي 400 بات مع الهاي ووي >> كان شيبة ومطيرنا
اليوم الاول
وصلنا مطار بانكوك تاريخ 266 وحجزي كان في جيه دبليو ماريوت, ديلوكس روم بدون ريوق,, وكلفني الحجز مال 16.916 بات.
طبعا حجزت من تاريخ 25 لان وصولي يوم 26 على الصبح..وما حبيت اتعثر وانتظر في الرسيبشن لين الساعة 12 لان السفرة كانت متعبه
دخلنا الغرفة وكانت وايد حلوه..والفندق راقي ومرتب,استقبالهم حلوو..المهم ريحنا شوي
وقررنا نستكشف المنطقة..وسالنا عن شارع العرب ( نانا ) ومشينا ووصلنا له,,صرفنا وقكان سعر ال 100 دولار = 3390 بات
اليوع كافر..دورنا على مطعم .. واللي شفته بويهي كان مطعم ليالي زمان اضني اسمه جدي
المطعم مول ما عجبني اكله بايت ( مب فريش ) وخفت نتسمم ..دفعنا الحساب وطلعنا وهذي كانت اول تجربه مب حلوه لي. ونحن نتمشى شفنا مكتب موسى البانكوكي ودخلنا عنده وحجزنا إلى مدينة الملاهي ( the dream world).وكان لشخصين 2000 بات..رحنا الفندق وريحنا
وعلى العصر رحنا سيام براغون مول.ودخلنا الاوشن ورد وكان ب 1700 بات للشخصين, وللاسف شريط كاميرا الفيديو مخلص وياني احباط, بس المكان روعه, وسبحان الله تشوف اسماك غريبة وعجيبة..
خذينا لفه في المول..ودخلنا السوبر ماركت وشرينا بعض الاغراض ليوم ثاني الريوق,,وطلعنا ندور تاكسي..اثاريه Q اشطوله جدامنا..وقلنا ما عليه ننتظر لين ما يوصل دورنا..
طبعا من الفندق لين سيام بالتاكسي من 60 إلى 80 بات يعتمد على الزحمة..لان عدادهم يتحرك حتى لو السيارة واقفة
طبعا بتحصلون عروض من التوك توك..وهذيله حرامية , يعني يطلب من سيام براغون إلى الماريوت 200 بات..
وصلنا الفندق..وشفت في المنيو في اكل عربي ويوم سالنا الفندق..قالوا لنا موجود بس يسكر على الساعة 10 ..فقررنا نطلع ونروح شارع العرب مره ثانية..وانا اطالع المطاعم..صراحة ولا واحد يشجع..واخر شي قررنا نتعشى في المطعم الايراني
العيش كان لذيذ بس اللحم والدياي لهم ريحة طعم..وهالشي اللي كرهني في الاكل
وجبتين طلعوا علينا مال 600 بات
اليوم الثاني:
وصلت مرشدتنا مريم قبل الوقت وطلعنا معاها..وخذينا مال ساعة لين ما وصلنا الحديقة,,كانت الشمس حارة بس تمينا نلعب..وانا ادور الالعاب الخطيرة..وعلى الساعة 1 الظهر الدنيا تغيرت وغيمت مره وحده..وعلى الساعة 3 طق مطر .. وناسه >> عرب مب شايفين خير لوول
وصلنا الفندق على الساعة 5 العصر واليوع كافر ..وقلنا خلنا نجرب هالمطعم اللبناي اللي في البناية المقابلة للفندق,, واكله طلع فنان ولا يعلى عليه والدياي واللحم مالهم ريحه.. اسعارة معقولة
وعلى الليل رحنا سنترال وورد..بس من التعب اللي فينا ما قدرنا نكمل لفته..طلعنا وردينا الفندق
وكان لي جلسه من الاسترخاء..حجزت في Spa الفندق..جلسة مساج لمده ساعة ونص وطلت علي مال 4500 بات مع الضرايب >_>وبجذي انتهى اليوم الثاني
اليوم الثالث:خذينا لنا كوفي من ستاربكس..بعد في البناية اللي مجابلة الفندق..ورحنا شاعر العرب عشان نصرف..واحنا نمشي جان يلقطنا واحد من التاكسي >> مسود الويهه عرفنا بسرعه وتم يعرض خدماته
طبعا هذا شايفنا في الحديقة..واحنا ننتظر مريم اتييب السياره تموا يسولفون معانا..
اول شي قالوا لنا وين ساكنين وقلنا لهم في الماريوت جان يشاهقوون انتوا وايد اغنياء..من الخوف قريت قل اعوذ برب الفلق ..بيحسدونا على قلة البخت
المم قال بيوصلنا إلى البارغون ب 100 درهم..ولاول مره بالتاريخ انا اكاسر قلت له نوو 50 بات قال اوكي..وشوي والحبيب عرض خدماته..قال بوديكم محلات تبيع شنط وسوع فيرست كوبي وبعدين بوديكم سيام براغون ..وكل هذا ب 50 بات
قلنا له ما عليه..بروحك اللي تبرعت
دخلنا المحل..وشفت السوع ومن وجهه نظري انها ما توسى لانها تبين تقليد..ف ما شرينا..رحنا صوب الشنط وشريت شنطتين وبوك هدايا..فطلع علينا ب 15000 بات..وقال بسوي لكم خصم لين 10000 بات..وانا قلت له لا عطني اياهم ب 5000
ويوم طلعت حسيت انهم قصوا علي واخذوا زياده >_>بعدين قال بوديكم مكان ..قلنا له لا ودنا سيام براغون..قال لا بوديكم محل وكله ب 50 بات..قلنا بنروح مب خسرانين شي..وطلع المكان مال المجوهرات
واول ما توصلون يتلقفونكم البنات وما يفجن عنكم..وتمت تلحقنا من مكان لين مكان..وطلعت الحبيبة تتكلم عربي شوي..وكل ما نقول لها هذا بكم..تعطينا سعره بالبات وبالدرهم الاماراتي >> مب هينه لوول
المهم تشرينا شووي..وبعدها طلعنا لسيارم براغون ودخلت مره ثانية الاوشن ورد
وهالمره معاي كاميرا الفيديو..وبعد ما خلصنا سوينا شوبينغ شوي..اشيا بسيطة شريناها...ردينا الفندق وتغذينا طبعا من عند مطعم بيروت
وعلى الساعة 5 العصر سوينا check out وما حسبوا علي فرق لاني حاجزة من تاريخ 25 وما وصلت الفندق إلا تاريخ 26 الصبح
وخذينا تاكسي وعلى المطار...
مطارهم كبير..والسوق الحره روعه..بعد تشرينا منها واخر شي رحنا إلى GATE
وبجذي ودعنا بانكوك
ملاحظات:1. ديرتهم حلوه ومرتبه..والخضرة في كل مكان بس عيبها زحمة الشوارع..تمل وانت في التاكسي
وشوراعهم مب طبيعية..4 سيدات تروح ووسيد واحد يرد السياره..حاولنا نفهم شوارعهم بس طلعت غبية لوول
2.تحذورا يوم بتعبرون الشارع..ترى نظامهم عكسنا يعني يمين..يعني مب طالع يسار ويوم ما تشوف سيارة تعبر..طلع من الصوبين واذا ما في احد اعبر..وتحذر تراهم ما يوقفون..عادي يدعمونك
3. فندقنا روعه..بس تحسفت لاني حجزت فيه..وقلت ياليتني حجزت في الانتركونتينتال..لانه قريب من السناتر..
4. شارع العرب وايدين مدحوه وانا ما عجبني..وصخ..ومطاعهم مب شي..وايد تحسفت على هالشي
5.تخطيطي للرحلة اكثر عن جذي كنت لازم اروح النايت بازار واسواق وايده..بس الوقت ما ساعدني ومني الارهاق لعب دور فيني..فتميت افكر كيف الحريم فيهن طاقة على التسوق
6.تقريبا صرفت في هاليومين 1050 دولار بدون حجز فندق وبدون التذاكر ..وطارن البيزات على التاكسي :112: والاكل..فلوسهم مافيها بركة..بسرعه تطير
7.في الرده ..كان في رعد وبرق ومطبات كثيرة..وعلى الرغم من هالشي..الكابتن على قولة عرب ( الدريول ) كان مسرع فينا ووصلنا قبل ساعه كامله..ونزلنا مطار الدوحه الدولي..وطبعا صغير ومتواضع والكراسي كلها محجوزة والتعب واصل حده وندور حمامات نظيفة عزكم الله
فقررنا نحجز في وحده من هالقاعات..وحجزنا في قاعة المها ب 280 للشخصين
والاختيار للاسف كان سيء لانها كانت كلها اجانب وشرب بيره وخمر وفل..ما اعرف كيف دخلتنا ..يادوب حصلنا لنا زاوية بكرسين ويلسنا فيها..ومرت ال 3 ساعات ببطئ شديد
واخر شي استانست في رحلتي...والدنيا مغامرات..وقالوا لي عن تقولين ما رحتي بانكوك ولا شفتيها
والصور ان شااء الله عن قريب بنزلهم لاني توني اليوم الفجر واصله على الساعه 4
واي سوءالات >> على قولة اللبنانية خ اي اسئلة حاضرين
اختكم
