عند شقق كثيره بالملز .. وافضل انك تاخذ بالملز عشان ماطب بزحمة طريق الملك عبدالعزيز وطريق الملك فهد خاصه معهد الاداره مايرحمون(بعد المحاضر ماتدخل القاعه) .. عندك بودل حلوه .. وعندك خيارات كثيره بحي الملز من الشقق وماتوقع عندك مشكله بالحجز اذا جيت طالع الشقق بنفسك وراح تلاقي كثير ...
نهاية الاسبوع اذا كنت عائله .. لاتفوت المولات مولات الرياض حلوه .. الفيصليه .. المملكه .. صحارى .. الرمال ..وغيرها .. وكلها فيها اماكن ترفيه .. ومطاعم ..
واذا كنت عزاب الله يعينك مالك الا شارع التحليه (مساء) .. جلساات .. كوفي .. واذا كنت من محبي البر .. اطلع الثمامه .. خاصه انك راح تجي باجواء ربيعيه بالنسبه للرياض .. وكذلك الفيصليه روح لها اوقات الغداء حلو فيها ويسمحوا للعزاب بالدخول .. وقت النهار ..
اذا مازرت المطل بالمملكه لاتفوت زيارته بالنهار راح تستمتع بالمشاهده .. من اعلى برج المملكه ..
بالاخير لاتنسى تفطر الصباح بمطعم معهد الاداره ... وبعدين راح تقولي رايك ..
راح يضيق صدرك ن الزحمه ... بس كلها يومين وتتعود ..ههه
تحياتي اي خدمه احنا جاهزين وان شاء الله الشباب يفيدوك اكثر ...

صراحة الأخ سلمان ما قصر طع شوره وما راح تندم ان شاء الله وموفق
والرابط التالي فية روابط لمشرفنا الغالي مهند ان شاء الله تكون مفيدة وياهلا ومرحبا بك:36_1_39:
https://artravelers.com/p/re/253075

1. بس مادام انك تفكر ببيوت الشباب شكلك عزابي :

أهلا وسهلا بزوار العاصمة ..
إذا معك عائلة : مثل ماقالو الي قبلي .. المولات بالرياض جدا حلوه ومميزة وفيها كل شي ( ملابس - اجهزة - مستلزمات البيت ...الخ ) ساحات المطاعم المتنوعه والمختلفة وكذلك اماكن لألعاب الاطفال ووناستهم .
ارشح زيارة المولات التالية : المملكة - الفيصلية - الرياض غاليري - رمال مول - صحارى - العليا مول.

بس مادام انك تفكر ببيوت الشباب شكلك عزابي :

اما تروح للكوفي شوب المنتشرة في كل مكان وأغلبها فيها انترنت عالي السرعه كمان ، اذا انت مهتم بالاثار والاماكن القديمة انصحك تزور سوق الزل وتشوف الرياض القديمة ومتحف الملك عبدالعزيز التاريخي تراه يستاهل الزيارة ،، ممكن تتسوق ووتتمشى بالمولات في ايام الاسبوع ماعدا الاربعاء الخميس والجمعه لانها عوايل.
الثمامة منطقة برية مسفلته ومخدومة تقدر تروح تغير جو هناك في أي وقت. وممكن تاخذ وجبتك وتاكلها هناك .
ممشى الملك عبدالله وهو طريق مهيأ للمشاة ، البس ملابس رياضية وامش هناك الناس رايحه جاية وحلو بصراحه اذا كان الجو معتدل ولطيف ، وفوائد المشي تكسبها وانت ماتحس !
فيه مكتبات عامه اذا تبي تستفيد من وقتك وتقرا : مكتبة الملك عبدالعزيز - مكتبة الملك فهد
يوجد في الرياض جوامع حلوه وفيها أئمة وقراءتهم جميلة تقدر تصلي فيها وأنصحك تجي مبكر وتسمع الاذان الخاشع مثل جامع الراجحي بالدائري الشرقي - جامع الملك خالد بأم الحمام
أتمنى لك قضاء ايام حلوه بالعاصمة ويكون تلهفك في محله
تحياتي/
أحسن واحد

الافضل تستأجر غرفة من الشقق والوحدات السكنية المفروشة ارخص بكثير من الفنادق وموجودة بجانب وبقرب معهد الادارة العامة .. واذا كنت حديث عهد بالرياض فعليك زيارة البطحاء تعطيك فكرة شعبية عامة .. ثم شارع التحلية في مساءات العطلة .. حيث الرقي والفخامة والمولات المتعددة على الطرق الكبيرة كحياة مول وكارفور وجيان ولاتنسى ان تخطف شيء من وقتك لزيارة الثمامة والمقاهي الشعبية هناك فهي متعة في هذا الوقت لاتضاهى .. وقتا ممتعا في الرياض ...