- المهم اشتريت بالفيزا , وجلست 3 ايام الا هم موصلينها للفندق عندي..
- الشوط الأول دمار , وطفشت , انتهى صفر صفر. قلت عز يالدوري السعودي
- كان الفريق الروسي هو اللي ضاغط ولاعب احسن.
امسي على جميع اعضاء المنتدى بالخير
وحبيت انقلكم تجربتي بحظور مباراة بافضل بطوله عالمية وهي بطولة ابطال اوربا..
المباراة كانت بين بايرن يمونخ العنيد ضد سبارتاك موسكو
جتني فكرة حضور مباراة في هذه البطوله العريقه. وبحثت اولا عن المباراة القادمة في استاذ ارينا الواقع في ميونخ. هذا موقع ارينا في النت:
http://www.allianz-arena.de/de/index.php
وهذا اللينك للأحداث او المباريات القادمة التي سوف تقام على هذا الأستاذ:
http://www.allianz-arena.de/de/fussball/terminkalender/
وهذا اللينك لشراء بعض تذاكر المباريات: http://www.allianz-arena.de/de/fussball/terminkalender/
فوجدت مباراة بايرن ميونخ في ابطال اوربا, وانا اعشق هذا الفريق واعشق هذه البطوله.
وعلى طول حاولت اشتري التذكره من اللينك اللي فوق بس حصلت تذاكر هالمباراة ماتنباع خلال تلك اللنك.
وش سويت؟؟!!! قلت ما بدا هاش مالي الى موقع البايرن, وهذا اللينك: http://www.fcbayern.t-com.de/de/index.php?fcb_sid=582b19afaadd67fd82d16bd6379d2faf
طبعا لازم تسجل اول عشان تقدر تشتري التذاكر, والتسجيل هنا لازم تحط عنوانك الحقيقي عشان يوصلون لك التذاكر بالدي اتش ال ولا اي ناقل ثاني... يعني مافيه لعب ومعلومات خطا ... لازم كل شي دقيق..
طبعا انا سجلت وحطيت معلوماتي وعنواني بكل دقه. بعدين دخلت باليوزر حقي عشان اشتري التذاكر. واشوف في الموقع الى تذاكر خالصه اللي على الأطراف. واسوي رفرش , الا فيه تذاكر, وادخل ثاني الا خلصت, وانتظر شوي الا فيه ؟؟؟؟!!! قلت وش السالفه اسهم؟؟!! ولا الموقع مخبط... المهم واحاول احجز تذكره والحمدلله حجزت, واشوف الا كاتبين اذا مااشتريتها خلال عشر دقايق راح تروح عليك !! فعرفت ليش التذاكر تزيد وتنقص
المهم اشتريت بالفيزا , وجلست 3 ايام الا هم موصلينها للفندق عندي..
سعر التذكرة 40 يورو ( الموقع على الأطراف الدور الثالث) اللي تحت سعر التذكرة 50 يورو بس خالصه. وسعر التوصيل 7 يورو.. يعني المجموع طلع علي 47 يورو ( توي اعرف ليه لاعبينهم يلعبون زين, اثري جمهورهم يدفع , مو زينا عشرين ريال ( 4 يورو) ونزعل نقول وش هاللعب )
وعاد اليوم كان موعد المباراة , يوم جت الساعه 7 بالليل وانا احرك للملعب من مارين بلاتز , او اي محطة يمر عليها U6 وتروح شمال لمحطة اسمها Frottmaning . وهي اخر محطة بالوقت الحالي, بس يمكن يمددون الخط مستقبلا.
وقفه اعلانيه: ترى تقدر تروح للأستاذ حتى لو مافيه مباراة تتفرج .
المهم وصلنا الأستاذ وانا بيني وبينكم خايف لايصير زحمه ودف ( جايتني عقده نفسيه من المباريات اللي باستاذ الملك فهد)
يوم اشوف الا فيه ناس كثار بس مافيه دف ووقفه وزحمه.. كل الناس تمشي . الله حق اللي وقفت بس عند بوابة الدخول عشان التفتيش يعني يمكن عشر دقايق. ودخلت.
واشوف الا الأستاذ روعة من داخل, والله اوشوف المباراة , المباراة بدت الساعه 8:45
الشوط الأول دمار , وطفشت , انتهى صفر صفر. قلت عز يالدوري السعودي
كان الفريق الروسي هو اللي ضاغط ولاعب احسن.
يوم جا الشوط الثاني , الا اشوى لعبو زين , الظاهر استحو , قالوا فشلتونا فيه ناس جايين وضاربين مشوار من السعوديه. واشوى سجلو اربع اهداف كلها بايرينيه ميونخويه. والله كسر خاطري الفريق الروسي مع اني اشجع البايرن.
- اللاعب الأيراني علي كريمي دخل قبل ماتنتهي المباراة بعشر دقايق, وبدع .. بس ضيع فرصتين اقوال. المهم انه يلعب بأبطال اوربا وحنا لاعبينا الله يخلف.
- محمد شول , والفر كان لاعبين مخضرمين كان لهم حظور قوي بالمباراة.
والحمدلله انتهت المباراة وانبسطت وتأخرت شوي قلت خل الأندر قراوند يفضى شوي. ورجعت بالسلامه بتجربة جديدة علي.
ملاحظه: كنت بظيف صور بس ماعرفت. وشكلي ماراح ارجع للموضوع الى بعد فترة طويلة بكون مشغول. بس قلت على الأقل افيد الأعضاء بمعلومات التذاكر واسعارهم وطريقة الذهاب والعوده من الملعب.
