السلام عليكم ورحمة الله
اخي الكريم حيرتك نفس الحيره التي اصابتني عندما دخلت المنتدى فلم اجد اي مواضيع مثبته عن فينيسيا
عموما انا رجعت من فينيسيا قبل اسبوعين تقريبا وقضيت فيها خمسة ايام كانت كثيره عليها
فينيسيا مدينة تسحرك بتصاميمها الفريده وتأسرك بجسورها وجندولاتها مدينة تستحق انك تزورها لانها مميزه فعلا بكل مافيها
لكن يعيبها اشياء كثير
منها الغلاء هي اغلي مدينة اروبيه زرتها اغلى من سويسرا والنمسا
ثانيا كان الجو جدا جدا حار لدرجه ان ممكن تجيك ضربة شمس لو طولت فترات النهار
ثالثا تعامل الايطالين مو نفس باقي دول اروبا فكن حذر
اعطيك مثال احنا ركبنا تاكسي مائي اول ماوصلنامحطة القطار وطلبنا منه يوصلنا الفندق كان المسافه 10 دقائق او اقل طلب منا 80 يورو ونزلنا في منطقه بعيده جدا في فندقنا ولما سالناه وين الفندق قلنا قريب في اللفه ولما نزلنا اكتشفنا ان الفندق جدا بعيد وان المفروض ينزلنا عند باب الفندق لان الفندق مطل علىممر مائي (القصه للعبره )
بالنسبة للمده انا اشوف فينيسيا يومين كفايه عليها تزور كنيستها المشهوره وساحة سان ماركو وجسر الراتيلو
واليوم الثاني ممكن تزور جزيرة المورانو لصناعة الزجاج وتتمشى في الاسواق والازقه
اتمنى اني اقد افيدك اكثر عموما انا امس رجعت من السفر وان شاء الله انزل تقريري المفصل عن رحلتي

هلاوغلا مساك الله بالنور
الحمدلله رجعت قبل يومين تقريبا من ايطاليا والنمسا
بس بصراحه في ايطاليا مازرت لا ميلان ولا روما
كله بين الارياف والجبال والجو الخيال :rain:
لان ميلان وروما جوهم حار ومدن كبيره واحنا منحاشين عن الزحمه والعرب:biggrin:
اذا كنت تبي ازعاج المدن والزحمه والتسوق روح لميلان وروما
اما اذا تبي الجو والطبيعه والهدوء والامطار روح للارياف
بس طبعا مافوتنا فينيسيا على قولتك بلد العشق والغرام و الخ
جلسنا فيها ليله وحده بس لان جوها حر في النهار شي لايطاق بصراحه:shocking:
بس ياحلاة جوها بالليل رهيب
واخذنا جوله بالجندول لمده 45 دقيقه تقريبا حسابنا طلع 750 ريال
بس على الشخص لان احنا كنا 6 اشخاص
يعني الشخص الواحد من 20 الى 30 يورو تقريبا
بس احس يومين بالكثير تكفي لفينيسيا
سوري ع الاطاله اتمنى افدتك بشئ

ما فيها الا ساحة سان ماركو والجندول الاسود وشويرعات ضيقه فيها محلات
وتقدر تروح جزيرة الليدو فيها شاطئ بحري اذا ودك تسبح

غرور الكون
يسلموو علإفادة الحلوه ذي
ذكرت (((( واخذنا جوله بالجندول لمده 45 دقيقه تقريبا حسابنا طلع 750 ريال
بس على الشخص لان احنا كنا 6 اشخاص
يعني الشخص الواحد من 20 الى 30 يورو تقريبا)))
سؤالي هو هل ال 750 قيمة استاجار الجندول سوار بشخص واحد او 6 ......... ولا كل شخص وقيمتة يعني السعر للشخص الواحد 25يورو تقريباً إن كنا اثنان اضرب في اثنين وإن كنا ثلاثة اضرب في ثلاثة

النمر.
مشكور يالغالي ماقصرت والله العالم إن سبب عدم تخصيص موضوع لفينيسيا هو كما ذكرت قلة الأماكن التي تزار هناك قياس بميلان وروما

مرحبا اخوي
طبعا على عدد الاشخاص يعني الشخص الواحد مثل ماقلت تقريبا يوصل 25 الى 30 يورو
يعني كلامك مضبوط 100%

غرور الكون
شكراً

هلا اخويه
انا زرت ايطاليا ... في بداية شهر سته الحالي
وكانت اول زياره لي ...
اول شي نحن نزلنا دايركت في مطار فينيسيا ..... وعشان نوصل للفندق لازم ندخل المدينة بالقارب التاكسي
بالنسبه للاسعار حد ولا حرج ... كنا شخصين وخذ عليما 90 يورو .. حرامي والله عاد نحن ما نعرف اول مره
وعاد اونا حاجزين في فندق راقي ... صراحه جربنا فندقين فيها .. الفنادق على قد حالها .. وضي يقه
المدينه ما فيها مناطق وايد بس تتمشى بالقارب ... و ساحة سان ماركو وعدالها كنيسه ورحنا مصنع الزجاج اللي هوه في جزيره بروحه
صراحه ما تنفع للي عنده عيال .. لانه وايد تنقل فيها وبالقوارب يبالها حد خفيف
جوها زين بس فيه رطوبه
اتمنى اكون افدتك

السلام عليكم
أخوي أنا قبل اسبوعين تقريبا راجع من السفر وزرت خلال رحلتي فينيسيا
وكنت كتبت بداية تقريري هناك لوتحب تطلع على الأماكن اللي تزورها وباختصار
هي مدينة جدا جميلة وتستحق الزيارة بس كافي عليها يومين مثل ماتفضلوا الإخوان
لأن النشاطات هناك محدودة الصعود لبرج الكنيسة وجولة في الجندول وساحة سان ماركو
وجسر الريالتو
احنا قضينا فيها يومين وكانت حيل كافية لرؤية معالمها السياحية
بس أهم ملاحظة احرص على السكن في فندق له بوابة مائية حتى تتجنب تسحيب الشنط
بالتوفيق