- 1- توقيت سفرتي هل هو مناسب.؟ بيكون برد او خريف او كيف الجو.؟
السلام عليكم ورحمة الله وبركاته
أسعد الله أوقاتكم بكل خير أحبائي .. ويعطيكم الف عافيه على المجهودات والمساعدات اللي تبذلونها لاخوانكم التائهين مثلي ههه مالكم بالطويله
بإذن الله زواجي قريب .. ماحدد تاريخ بالضبط لكن احتمال كبير يكون بشهر 1 هجري يعني ديسمبر تقريبا بالميلادي
وحاب اخطط واشوف الاوضاع من بدري خبركم خويكم غشيم ماله بالسفر كثير .. وعارف لو رحت ماليزيا او دبي بتكون الامور علي أسهل لانهم معروفات أكثر ولكن بسوي فيها متميز ونغير عن العالم خصوصا ان تركيا خاشه مزاجي وحاب اشوفها باذن الله
أبي منكم الله لايهينكم ويبارك فيكم أي شي ممكن يفيدني وعلشان اختصرها عليكم بحطها على شكل أساله وانتظر اجاباتكم الله يبيض وجيهكم ويجعلها بميزان حسناتكم
مع العلم ان سفرتي بخليها 10 أيام ممكن تزود او تنقص يوم على حسب الجداول المقترحه
1- توقيت سفرتي هل هو مناسب.؟ بيكون برد او خريف او كيف الجو.؟
2- أبغى تخطيط وجدول للسفره الله لايهينكم يعني وش ابدا فيه وش انتهي فيه ابدا بالطيران الخارجي بعدين الداخلي بعدين الفنادق مثلا او وش الراي.؟ واروح مكتب سياحي ويتزهل بكل شي والا اسوي كل شي بنفسي عن طريق النت افضل.؟ صحيح بيريح راسي المكتب بس كان فيها زرفه كبيره ماعندي مشكله اسويها بالنت بس عساها تكون الامور واضحه يعني
3- الميزانيه المقترحه.؟ مادري عن اسعار التذاكر صراحه ولا الصرف ولا الفنادق.؟ ابغى احد يقولي التذاكر للشخص تكلف كذا بالريال والفنادق كذا والصرف اليومي كذا وهل اسواقهم غاليه لو حبيت اشيل هدايا للاهل.؟ .. يعني يقسمها لي وبعد كذا يعطيني التكلفه للرحلة كامله مشكوراً
مع العلم اني حريص صراحه مااتعدى من 15 الى 20 الف ريال للرحله كامله
السكن يكون فندق نظيف وعادي مو شرط فل اوبشن لانه بيكون للنوم فقط ولامانع من ليله بفندق فخم
4- بالنسبه للتنقلات وش افضل طريقه.؟ التكاسي كم تكلف تقريبا هل هي غاليه.؟ يعني اخذ لي سواق يوم كامل افضل مع اني احس ماتستاهل الامور لسواق والراي لكم.؟
5- طبعا المدن المقترحه ودي مدينتين او ثلاث بالكثير مابي نتعب بالتنقل .. اسطنبول وحده منهم طبعا والثانيه مانستغني عن مشورتكم فيها وكيفية الذهاب لها.؟ ايضاً الاماكن السياحية المقترحة لاهنتم
6- هنا اهم سؤال عندي لاهنتم .. وهو وش السلبيات او المشاكل اللي لاقدر الله ممكن اواجهها.؟ معروف ان تركيا مليئه بالايجابيات ماشاء الله لكن يهمني برضو اطلع على السلبيات والمشاكل اللي قد تواجهني.؟ اياً كانت بالفنادق مثلا او اشوارع او المطاعم او الناس انفسهم اي شي ممكن اكون حذر منه لاتبخلون علي فيه لاهنتم
عارف اني طولت بالاسئله لكن حبيت احط كل شي بخاطري مره وحده وانتم ماراح تقصرون باذن الله
واي شي ماذكرته يمكن تفيدوني فيه اسدحوه لاهنتوا ههه
لكم خالص الشكر والله يوفقنا واياكم وانتظر ردودكم ومشكورتكم ,,
