1. السيارة مهمة جدا جدا والباص ما هو لنا يالخليجين..


2. الأشياء اللي لازم تحرص عليها ولا تفوتك:


3. خوانيق زغمودثن لا تفوتك .. روعه..

اكتب لكم من النمسا ....
أنا طيار وبحكم عملي زرت العديد من الدول والأماكن وبحكم متابعتي لأخطاء بعض من واجهتهم في النمسا وبالذات في ترتيب جدول الزيارة وترتيب الأولويات خرجت بهذه الإستنتاجات وتظل وجهة نظري الشخصية:

السيارة مهمة جدا جدا والباص ما هو لنا يالخليجين..

سالزبورج ما تستاهل أكثر من نهار ولا تستحق حتى المبيت ولو لليلة واحدة, النهر عادي وسوق المشاة تافه والمقاهي والمطاعم دون المستوى المطلوب.والمدينة القديمة مقلب !!
المغارة الثلجية ( عقوبه) ومن أراد العناء وبدفع المال ايضا فليذهب إلى هناك( من جد معاناة ) وليحذر من معه أطفال أو كبار سن أو مرضى من الذهاب صعود شاق جدا للجبل ثم صعود مئات الدرجات الخشبية في الداخل رغم نقص الأوكسجين والنهاية فلان وصل هنا في تاريخ كذا وحفر الطريق في سنة كذا ... لكم ترحمت على عوائل أحضروا رضع وصعدوا بهم مئات الأمتار والنزول فيه حقه أيضا ( الله لا يشق بنا )
موندسي والبحيرات الثانية لا تحرص عليهن بحيرة زيلامسي تكفي عنهن وتوفي من جد روعه..
منطقة الكابرون وزيلامسي هي الزبدة دع كل أو معظم جلوسك في النمسا فيهن ولا تقل المدة عن خمسة أيام لكثرة الفعاليات والأماكن القريبة وإذا معزم وتبي منطقة قريبة من سالزبورغ لكن أونس وأبرد وأجمل منها عليك بوادي ( باد قايستن ) ذا الشلالات الرائعة ...
السدود والبحيرات الصناعية في كابرون لا تستحق الزيارة بنظري ( مضيعة للوقت والمال على الفاضي )
السكن في كابرون أجمل وأهدأ من زيلامسي والمنطقة أشرح وأقرب للفعاليات وبيني بينكم أبعد عن الجماعة اللي بالي بالكم اللي على بحيرة زي لام سي اللي مغير ترزز وشغل خز وقز بعضهم في بعض.

الأشياء اللي لازم تحرص عليها ولا تفوتك:

الجبل الثلجي بالقوة حكيت عيالي منه بس لاتنسى تستأجر زلاجات وعصيهن من محلات التأجير في القمة الثانية لا تغلط غلطتي قالوا لي كل شئ فوق ومجاني رقيت مالقيت الا حقات البزارين لكن ما يمنع كفت ووفت وماحد عليه من أحد واللبس .أهم شي قبع عن الشمس خله معك دايم وملابس وبوت ضد الرطوبة وكل ماتبكر كل مايكون احسن انا اول ما فتحوا لقوني عند الباب لعبنا ثلاث ساعات ونزلنا والعربان توهم يتقاطرون ( الجبل يفتح الساعه 0815

خوانيق زغمودثن لا تفوتك .. روعه..

الزحليقة الصيفية في سالفيدين هي أحسن وحده لقيناها لكن أخوكم راح فيها زلوق ومشوخ وهذا للتنبيه : أذا بتتزحلق لا يكون عليك قبع أو معك في يديك شي أول ما انطلقت طار القبع ولحقته والباقي بتعرفونه خمسة أيام وأنا أون الله لا يوريكم .. خللك متعنقط في المقبض حق الزحليقة لا تفكه لين توقف ...
الطيارة غالية كثير كلفتنا أربعة أشخاص 20 دقيقة 1200 ريال وفي الحقيقة اذا قسنا المتعة مقابل السعر أقول ماتصلح الا للي فلوسه واجد ولا يهمه ...
المطاعم علي بابا وبس وابتعد عن مطعم علاء الدين : نفس خايسه ,اكل زي وجيهم.. ميزتهم الوحيده إننامن ثالث يوم قررنا نطبخ في البيت ...
طريق جبال الألب من قرية فوش روعة لا تفوت.
سفينة بحيرة زيلامسي والقوارب الكهربائية جدا رائعه...
الآيس كريم ( بنظري وبذوق عيالي ) أزين محل في زيلامسي محل ( سيقاس ) مقابل للقراند
وآخيرا نصيحة للمسافرين من فرانكفورت إلى ميونخ الطريق جدا بعيد وشاق وخصوصا للمواصلين وأنصح بالقطار ( 5) ساعات ما هي بسيطة والعالم يسرعون سرعة نروع , نمشي 170 ويشطفونك تقول كنك تسوق حراثه..
هذي نصائحي وواجب علي أنقلها لإخواني للعلم والإحاطة والله من وراء القصد ... وتظل ( وجهة نظر )