ماالفرق بين الشقق المفروشة التجارية المرخصة وبين الشقق الشخصية ؟؟ إذا كان السعر ؟؟ فيبدو أن سعر التجارية مع غلاءه أصبح أرخص !! أضف على ذلك الموقع المميز والخدمات وتوصيل الطلبات من المطاعم والمغاسل والتموينات وفوق هذا وذاك خدمة التنظيف للشقق ووسائل النظافة وباقي المميزات..
بصراحة أكثر يبدو أن الطمع يتلف ما جمع .. كثيرين اتصلت عليهم ويبالغون بالأسعار بشكل غريب يا ناس ياهوه ادخلوا على المنتديات الآخرى وشوفو عروض السفر والسياحة في سويسرا والنمسا ما ني قايل ماليزيا ولا اندونيسيا لأن الجميع يعلم أنها رخيصة أقول شوفوا أوروبا وريفها الساحر تأخذ منزل مميز في الريف فيه أربع غرف نوم وصالة ومطبخ بالإضافة الى الساحات الخارجية اللي ترد الروح بمبلغ لا يتجاوز 450 ريال
شيء غير معقول يا ناس اللي قاعد يصير عندنا هنا ؟؟ العام الماضي طلبت حجز شقة بالخبر مكونة من غرفتين وصالة وقالوا لي ب 1200 ريال لأن الآن موسم اجازة؟!! وشو عليه ؟؟ على الجو الحلو ولا على التعامل الراقي ولا على الصراصير والريحة الخايسة؟؟ يوم شفت الوضع كذا حجزت بأجنحة فندقية بدبي غرفتين وصالة ومطبخ وثلاث دورات مياه والمطبخ فيه من الشوكة إلى غسالة فل أوتماتيك وما يكروويف وقلاية وغلاية وخدمة شاي وقهوة وأطقم قدور تيفال وأطقم صيني وطاولة طعام ..الخ الخ بمبلغ لا يتجاوز400 ريال باليوم وكل هذا كوم وخدمة النظافة وخدمة الغرف كوم ثاني كل يوم الساعة ثمان ونصف تنظيف كامل للشقة واستبدال للمناشف والصابون والشامبوات ...الخ الخ
وبصراحة أكثر أعلنها لكم من هذا اليوم هذه آخر سياحة لي بالداخل لأني بصراحة متورط بحجز تذاكر من خطوطنا المميزة على أبها والله يستر هذا أولها كل هالغلا أجل وش تاليها شكلي ابدفع ثلاثين ألف ريال علشان رحلة اسبوع لأبها لا عادت عليها وعلى من شار فيها اللي هو أنا