1. اليوم الثاني : 6 اغسطس


2. اليوم السادس : 10

مزاَينْ
اول شي اشحالكم و شخباركم عساكم بخير و طيبين ؟؟
حياك الله أختي بين اهلك واخوانك وخواتك
ام انا عضوره يديده صح بس متصفحه جديمه لاني دوم من متصفحين منتديات العرب المسافرين حتى لو ما بسافر بس دوم اشوف التقارير و استمتع بها من بعيد ل بعيد ،،
واول مره احصل مشاكل في رحلتي ؟؟ و الخوف بدا يدب في خاطري و ما عرف اجوبه لاسئلتي ،،
لفيت اغلب المواضيع بس للاسف ماشي اجوبه ،،
قلت ماشي غير اني انزل موضوع و أهل الخبره يساعدووني ،، وطبعا ماعليكم زود ،، اكيد ما بتخيبون ظني ^^
اول شي نبدا بالمعلومات اللي تحتاجونها ،،
السفر ل : تركيا تحديداً ( اسطنبول )
الفتره من : 5 أغسطس ل 10 أغسطس - 2010
يعني : 6 أيام - 5 ليالي ،،
السكن : فندق جراند حياة اسطنبول
الحين ايي حق الاستفسارات ..

• شو بالنسبه للجو في اغسطس // انا قريت في موضوع أحد الأعضا ان الجو يكون حار في اول 5 ايام من اغسطس ،،

هل يستمر يعني و الا حراره عاديه ،، ؟؟
لاني سويت سيرج و بيكون المتوسط 25 ْ ام يعني حلو لاني ما اعرف هالدرجه شو تعني ؟؟
الحراره في اسطنبول اول اغسطس معقوله بل ممتازه مقارنه بدول الخليج والحر عندهم فقط بين وحده الى 3 الظهر
وتقريبا تصل الى 29 درجه بس بالليل الجو روعه
خص نحن كح كح الله يزيد و يبارك لنا الجو عندنا في اغسطس مايشجع بالمره ،، عادي توصل 50 ْ

• مالقيت تقرير يتكلم عن فندق جراند حياة اسطنبول .. هل انه مايشجع و الا شوو ؟؟ جراند حياة اسطنبول يسمى

( حياة ريجنسي ) وهو فندق رائع سكنته انا قبل سنه وميزته الحلوه انه فندق 5 نجوم وقريب من تقسيم خمس
دقايق مشي للميدان
بغيت اعرف موقعه بالضبظ يعني حد يشرحلي .. Plz

وشو المحطه القريبه عليه مال الترام ؟؟ و كيف اوصل لميدان تقسيم من الفندق ،، ؟؟
انا حطيت لك الخريطه الي وضعها اخونا الغالي ابو باسل وواضح مكان الفندق من الميدان وعلى فكره فيه جنبه
ملاهي صغيره للأطفال
ابا حد يشرحلي كيف لو بسير قصر توبكابي و متحف ايا صوفيا و المسجد الازرق و قصر دولماباشا من الفندق ،، ؟؟ يعني يقولي اطلع من الفندق وين اسير و عقب وين اتجه جيه يعني ؟؟
الوصول لها الأماكن سهل جدا
تطلعين من الفندق على محطة المترو ( مشي خمس دقايق ) بعدين تركبين المترو المتجه لقبطاش ثم ترام
الى الى المناطق المذكوره __ سهله مره انتي اذا رحتي هناك بتشوفين كل شي سهل

• سمعت من ربيعاتي ان جزيرة الاميرات مول ما تشجع .. و على الارض ( كرمكم الله ) فضلات الحيوانات ،، هل صدق هيه جيه ؟؟ يعني انا شليتها من برنامجي ،، هل هيه تستحق اني اسيرها لان فترة زيارتي قصيرة جداا ،،

فعلا ربيعاتك ما كذبوا بس نصيحتي روحي لها بس عشان تشوفينها مو اكثر دام وصلتي هناك والوصول لها
من ميناء قبطاش اركبو الفري بوت السريع اسهل واريح وما يوقف

• في مول معين ابا اسيره واللي هو فوريوم شوبنغ مول forum shoppinh mall كيف اوصل له من فندق بارك الله فيكم ..
• بغيت تعطوني اماكن تستحق الزياره صح يعني تعطونها 10 /10 ؟؟

أختي بأختصار
راجعي هالرابط راح يفيدك كثير والشكر موصول لصاحب الجهد ابو باسل
https://artravelers.com/p/re/228568

• اختيه اتقول ان تركيا مشهوره بعد بقطنياتها يعني الملابس صناعة تركية ،، وين احصلهم دلوني كيف اسير لهم ،،

طيعا طبعا الشكر موصول للاخ ولد جده على موضوع سفره لتركيا الصراحه وايد فادني بالنسبه للاسعار و التنقل بالتاكسي و الترام ..
انا بحط لكم البرنامج اللي انا حطيته لنا ،، و الخبير اللي يحس انه في شي احسن عن شي بستبدله ،، يعني عطوني رايكم ،،
اليوم الاول : 5 اغسطس
الطيران من مطار دبي الدولي إلى مطار اتاتورك و الوصول الساعه 6 مساءا و التوجه للفندق ،، عقب الجيك ان ننزل نستكشف المنطقة و نوصل لتقسيم و نستكشف اشوي و نتعشا و نرجع الفندق و ننام ،،

اليوم الثاني : 6 اغسطس

نتريق في الفندق و عقب ناخذ لنا لفه سياحيه في اسطنبول للتعرف على المعالم السياحيه منها قصر توب كابي - المسجد الازرق - متحف اياصوفيا - قصر دولماباهجة و ال grand bazar ( ما اعرف اذا يكفي بس افيدوني اابا ازورهم في يوم واحد ) و من ثم الرجوع للفندق و الننام ،،
اليوم الثالث : 7 اغسطس
نتريق في الفندق و من ثم التوجه للبسفور عشان ناخذ لنا لفه فيه و من ثم التوجه للسوق المصري ومن عقب ما ادري شو انسوي
اليوم الرابع : 8 أغسطس
نتريق في الفندق و من ثم التوجه إلى يلوا ( نبا انسير الشلالات ) يعني عطوني برنامج لهذا اليوم في يلوا او ترمال
اليوم الخامس : 9 أغسطس
شو تنصحوني اسوي في هذا اليوم اسير بورصه والا شوه تقولون لاني ابا اسير مول فوريوم و ما اعرف هذا وين مكانه و كم ياخذ لين اوصله و شو اسوي في هاليوم بجانب الذهاب لهذا المول فيدوني يزاكم الله خير ،،

اليوم السادس : 10

نتريق في الفندق و بنتوجه للسبا اللي في الفندق لعمل المساج و الفيشيال و الحمام التركي و عقب بنوضب شنطنا ،، و نطلع من الفندق ( ,, ما اعرف وين انسير ) و عقب الرجوع للفندق والتوجه للمطار الساعه 4 عصراً و نطير متوجهين للامارات الساعه 7:45 مساءاً
ادري اني وايد تكلمت شو اسوي مشتطه لول ،، صح ان باقي 23 يوم عن السفر بس ابا كل شي يكون جاهز ،،
يعني التذاكر والفندق و المواصلات من واإلى المطار جاهزين بس باقي البرنامج السفر و التنقل من الفندق للأماكن اللي نبا انسيرها ،،
مشكورين مقدما و ما اتقصرون ،،
اتريا ردودكم الله يخليكم لا تحبطوني لاني صدق محتاجه لخبراتكم و رأيكم ،،
اختكم
مزاَينْ
حياك الله اختي
وصدقيني لو جلستي تقرين التقارير والمواضيع خلال اسبوعين راح تكونين خبيرة تركيا

الصوره ما طلعت في الأقتباس نقلتها انا هنا
تحياتي

رد اخونا ابن زامل يكفي عن كل الردود اللي راح تجي خصوصا رابط مواضيع اخونا يمون ابو باسل الحربي

abadi22
بن زامل 2
الشكر موصول لكم اخواني ما قصرتوو ،،
اخوي بن زامل 2 الصراحه شجعتني بالنسبه للفندق ،،
والله ما اخبي عليك اني من كثر ما الف في التقارير صرت حافظه اسامي المواني و المدن و القصور والجسور و المحلات والمولات لول ،،
بس صورة الخريطه ما تطلع لي أبد ،، لا في ال ولا حتى في الرد الثاني ،،
والله مشكور و ما اتقصر ،،
و حبيت اخبرك يا اخوي abadi22 ان الصور في مواضيع الاخ يمون أبو باسل ما تفتح كل الصور تظهري على شكل اللوغو مال ياهو

وبالأحرى في أغلب المواضيع و ما عرف شو السبب

عندي استفسار اتمنى الرد عليه ،،
انا ابا اسير يلوا لرحلة يوم واحد ،، و في أحد الاصدقاء نصحوني بمكتب ترمال للسياحة ،،
شو رايكم فيه ؟؟
انزين كيف اتواصل معاهم علما بان البيزنس كارد مال وحده تشتغل فيه عندي و طرشتلها ايميل بس مارد علي
واخاف اتصل و لا اعرف اتكلم معاها لانهم يتكلمون تركي و اخاف اتوهق ،،
منو بيساعدني لان هاليوم الوحيد اللي ابا مكتب سياحي ينظمه اما باقي الايام في اسطنبول انا بروحي دبريتها،،
بلي يز ساعدوني

انا سويت جدول حق يوم منهم ايام ف اسطنبول
كان تبونه شوفوه يمكن يفيدكم فيه خرائط و مواصلات و خط الميترو و كل شي
https://artravelers.com/p/re/410043