1. (لابد من احضار كاميرا معاك او على الأقل كاميرة الجوال)


2. 1- الأهرامات وأبو الهول:


3. 2- القريه الفرعونيه:


4. 3- منطقة الحسين:


5. 4- برج القاهرة :


6. 5- ملاهي دريم لاند:


7. 6- مدينة الانتاج الاعلامي:


8. 8- مطعم ابو رامي:


9. 9- مراكز التسوق:


10. 10-قلعة صلاح الدين الأيوبي:


11. 15- الرحلات النهرية :


12. المطاعم


13. عصيرات فرغلي في شارع جامعة الدول العربية.


14. المقاهي

الاخوة الاعزاء:
وصلني هذا التقرير من احد الاصدقاء وهو يفيد لمن يرغب لمصر
ارجو لكم الفائده ودعواتكم
من العيدين مقدما
وافيمنقول-------------------------------------------------------
مصر ام الدنيا
بعد زيارتي لمصر ومع انها كانت لوقت قصير وكنت ملتزم بالعمل (معرض البناء من 10 صباحا ل 10 مساء) الإ انني استمتعت بالرحله وانا أعجبت بالشعب المصري لكفاحهم وروح النكته والابتسام الدائم
. أحاول انقل لكم صوره مبسطه عن هالرحله لأشياء زرتها واشياء سمعتها اونقلها من أحد ثاني:

• بداية في الحجوزات في السعوديه: معظم خطوط الطيران كانت "فل" مافيه حجوزات على الوقت اللي نبيه- اضطرينا نحجز عن طريق البحرين – طيران الخليج. (اذا كنت ناوي تروح لمصر فأحجز قبلها بوقت كافي).
• قبل السفر انصحك بصرف حوالي 100 ريال كجنيهات- لأنك راح تحتاجها للبخاشيش أول ماتوصل- خاصة للفندق (مهمه جدا)-
• اذا حجزت في فندق- اطلب منهم يرسلون لك سياره للمطار- لأنه امورك بتتسهل سواء الجوازات- الجمارك – العفش....الخ. احنا ماأخذنا ولا عشر دقايق وطلعنا من المطار- تراها أحسن من بهدلة التكاسي
• راح يستقبلك ممثل الفندق في المطار وهو اللي بيسهل امورك (لاتنسى تبخه ب10 جنيه) لأنك بتحتاجه عند السفر لتسهيل اجراءاتك.
• لاتعطي وجه للسواق مهما قالك ولا تبخششه– حجيبلك ووديك واعمل لك – خل عنك كله خرطي- أول ماتوصل للفندق- اللي يفتح لك الباب عطه بخشيش (يفضل خمسه جنيه أو أقل) – بعد ماتعمل تشك إن- اللي ياخذ اغراضك للغرفه برضه عطه بخشيش- والرووم سيرفس (اللي ينظفون الغرف) برضه بخششهم (كل هذا في اليوم الأول او الثاني) بعد كذا بتعيش مثل الملك طوال فترة جلوسك بالفندق – وانت طالع وانت داخل يرحبون فيك ويسلمون عليك ويمدحونك قدام اللي رايح واللي جاي- اهلا ياباشا ومرحبا يالشيخ- نورت مصر –
• تقريبا كل الفنادق فيها فروع صغيره للبنوك والصرافه- لاتصرف فلوسك كلها في وقت واحد- اصرف على قد حاجتك وزياده شوي- ونصيحه حط جزء من فلوسك السعوديه في الأمانات في الفندق وجزء عندك في الشنطه-
• مطلوب منك تسجيل جوازك خلال اسبوع من وصولك والا تعرضت لغرامة عند السفر ويمكنك التسجيل بمجمع التحرير مجانا صباحا او مساء عموما الفنادق تسوي هالشغله نيابة عن النزلاء (تأكد من الريسبشن)
• انصحك بشراء شريحة جوال مصريه (فودا فون عندهم خط الإجازات مدته 40 يوم وتنتهي -الشريحه بقيمة 25 – 75 – 100 – 150 جنيه وافضلك ال 150 جنيه)
• اذا كنت مرتاح على شغلة المدح من عمال الفندق لازم بعد 6 – 7 أيام تبخششهم مره ثانيه (ترا مايكلفك شئ وتعيش مرتاح) وعلشان مايغيرون التعامل (لاتصير بخيل- كل مجموع البخاشيش في الفندق مايتعدى 20 – 30 جنيه في الإسبوع)
• بالنسبه للمشاوير عندك اربع خيارات- سيارة الفندق (لاتاخذها غاليه على الفاضي الا اذا مشوار خاص ورسمي)- أو تركب التكاسي (اذا لابس ثوب رحت فبها – الثوب بيتوصخ والسعر بيرتفع)- قبل ماتركب اسأل عن التكلفه وكاسروفاصل – اذا قالك ماتخلي – الحساب يوم الحساب – مايهمكش- نتفاهم بعد التوصيل – لاتوافق واتفق على السعر وللمعلوميه أبعد مشوار مايزيد عن 30 جنيه مهما كان.
• اوعندك الخيار الثالث انك تتفق مع سواق تاكسي يكون تحت طلبك خلال اليوم بتكلفه تتراوح بين 60 – 100 جنيه (طبعا هذا يعتمد عليك وعلى المشاوير اذا كانت كثيره – قليله وعلى شطارتك بالمفاصله...الخ) ماعليك الا تكلمه بالجوال ويجيك على طول.
• الخيار الأفضل استأجار سياره مع سواق (مش تاكسي- سياره ملاكي موديل 2005) والسعر في اليوم على حسب نوع السياره يتراوح بين 150 –250 جنيه) وهذا افضل خيار اذا تحب الفشخره والترزز
• اسأل عن العروض السياحيه الموجوده في الفندق- فيه افواج سياحيه تطلع من الفندق لأماكن مختلفه والعاده لرخيصه ومنظمه (زينه للعوائل)

أماكن لابد من زيارتها في القاهره:

(لابد من احضار كاميرا معاك او على الأقل كاميرة الجوال)

1- الأهرامات وأبو الهول:

• تذكرة الدخول للمنطقه ب 2 جنيه- واذا بغيت تدخل داخل الهرم فيه تذكره خاصه- ممكن تستأجر حصان بحوالي 100 جنيه او عربه ب150 – 250 جنيه والأفضل انك تمشي لأنك راح تدخل اماكن تمشي فيها- غير مسموح للخيول والعربات بالدخول فيها. ومع العربه فيه اماكن ماتقدر تدخلها والسايس يوديك لأماكن يعرف الناس اللي فيها وممكن يزيدون السعر عليك
• ابو الهول قريب جدا وممكن تصور على بعد 3 امتار عنه (مسكين انلعن ابو خيره)
• لاتشتري أي تذكارات من البياعيين اللي في هالمنطقه. (فيه اسواق ارخص ابا قولك عليها).
• انصحك انك تاخذ ماء معاك لانك بتعطش كثير وتلبس ملابس خفيفه وقبعه على الراس
• راح تشوف الكثير من الأفواج السياحيه- حاول تقرب منهم وراح تسمع معلومات عن تاريخ الأهرامات وابو الهول عن طريق المرشد السياحي اللي معهم بدون ماتدفع شئ – الكثير من المرشدين اللي قاعدين برا يستغلون السياح وياخذون فلوس زياده مع انه الشرح قليل- أفضل لك استمع لمرشدين الأفواج السياحيه وريح بالك او استأجر واحد ب 50 جنيه
• يوجد في منطقة الأهرامات سفينة الشمس وهي سفينة خشبية حقيقية لا تزال بكامل رونقها منذ عصر الفراعنة

2- القريه الفرعونيه:

• هذي قريه/جزيره صغيره مبنيه على النيل وتعطيك ملخص عن تاريخ مصر بمشاهد تمثيليه وزيارة متاحف صغيره ومرشديين سياحيين يشرحون لك وانت راكب القارب.
• الرحله تستغرق حوالي ساعتين بدون الغداء ورحلة اليخت في النيل
• أعلى تذكرة- 150 جنيه – شاملة الغداء ورحلة اليخت- انصح بعدم الأكل لانه المطعم مش اد كدا
• فيه امكانية تأجيل رحلة اليخت على حسب ماتبي لكن لابد ان يكتبون لك على التذكره من الخلف ويوقعون عليها وتجي أي يوم ثاني وتاخذ هالرحله (تفضل في العصر قريب المغرب)
• انتبه اول ماتجي خذ كل شي ماعدا الغداء او العشاء تراهم يعطونك اغلي شي وكل شي وترا شكل طبخهم مش ولابد واركب المركب بالنهار عشان تستمتع , مشكلة اليخت هوالمجموعة اللي معك يبي يغثونك بالتاخير والتفرق وانتظر على بال مايتجمعون, والمرشدين ماهنا ذاك الحرص.
• فيه كافاتيريا واستوديو للتصوير باللباس الفرعوني وصراحة الصور بتكون ذكرى ماتنسي (الصوره على حسب المقاس 50 جنيه – 55 او 60 جنيه)- انتبه لمكان التصوير عندك اكثر من مكان لاتخلي المصور يختار لك انت قله ابغى اصور على العربه او كرسي الفرعون – او عند بوابة المعبد (اللي يناسبك) – السبب انك اول ماتدخل بيقول لك وقف ويصورك على طول بعدين يقول لك ايه رأيك اصورك على العربه او الكرسي وكله فلوس عليك

3- منطقة الحسين:

• مسجد الحسين والقهاوي والاسواق القريبه منه – متعه مابعدها متعه- ممكن تستأجر شخص يغني لك الأغاني القديمه وتطلب شاهي – قهوه- ....الخ واستمتع. فيه قهوة الفيشاوي مشهوره جدا او القهاوي الصغيره اللي قدام المسجد. ويمكنك الاختيار هناك بين عدة مقاهي مثلً المالكي والزهره وبعض المقاهي المجاوره واذا ماتبغي في الساحه الكبيره وبغيت الهدوء فيه الممر المجاور من ناحية المجسم الكبير المواجه للجامع يوجد مقاهي اصغر يشتهر من بينها مقهى الاطلال و مقهى الفيشاوي
• نوعية الشحادين هنا غريبه شوي- يشحدون بالتهزيئ والكلام المحرج (اذا انت اقرع: ربنا يطلع لك شعر – ربنا يخلي قرعتك ...الخ- اذا متين: ربنا ينزل وزنك- ربنا خلي وزنك زي الريشه...الخ- اذا طويل – ربنا يرزقك بزوجه أطول منك – ربنا يعلي مراتبك زي طولك...الخ. عندك حلين ياتكلم راعي القهوه او اللي يقدمها وتبخه ب 10 جنيه بخشيش وتقول له لاأحد يجيك ومن امه اللي يقرب لك- أو انك أول مايجيك أحد من هالصغار تعطيه جنيه الى جنيهين بعد مايقول لك نكته وفك عمرك
• والله العظيم الجلسه حلوه وراح تستمتع
• انتبه اول ماتوصل راح يتلاقطونك اصحاب القهاوي- الأفضل قبل ماتوصل للقهوه من بعيد شوف افضل طاوله وروح لها على طول وقل للي يكلمك انا ابغى اقعد هنا.
• من هنا تقدر تشتري التذكارات عن مصر(مجسمات اهرامات- لوحات – خزفيات...الخ وبسعر مناسب) في الأسواق الحرفيه

4- برج القاهرة :

• اول ماتاصل بيجونك مصوريين علشان ياخذونلك صوره مع البرج بعدسه خاصه تطلع البرج كله جنبك بسعر 50 جنيه للصوره تستلمها بعد ماتنزل واشرط عليه انك ماتدفع الا بعد ماتنزل
• فيه مطعم دوار فوق ممكن تاكل فيه بس اسأل عن الاسعار قبل
• فيه ناس لابسين فرعوني اذا عطيتهم اسمك وتاريخ ميلادك يكتبون اسمك بالفرعوني ويحللون شخصيتك بالكمبيوتر بسعر 10 جنيه – بتتفاجأ بمدى صحة التحليل
• بعد ماتخلص تقدر تطلع لأعلى البرج بالدرج وتشوف القاهره كلها

5- ملاهي دريم لاند:

وهي مدينة ترفيهية وبها ألعاب نادر وجودها في البلاد العربية(الملاهي حلوه ويبغالها يوم كامل وفيه مكان للتصوير بالملابس الفرعونية والملابس الفلاحية بس انتبه وأطلب منه مايصورك الين تقول له انك جاهز وانه يصورك صوره او صورتين على حسب اللي تبيه – لأنك اذا ماسويت كذا بيصورك الف صوره وبيقولك ادفع (الصوره ب50 جنيه)- واحد من الشباب حصلت له وتهاوش معهم- بالنسبه لتذكرة الدخول – اشتر تذكرة ال 60 جنيه (vip) تلعب الين تتعب- فيه ملاهي ثانيه مكيفة وجميلة بمركز اركيديا للتسوق اذا مابغيت تبعد لكن ماهي كبيره

6- مدينة الانتاج الاعلامي:

مدينة ترفيهية فيها جولات داخل مناطق التصوير والمباني القديمة والقرية الريفية ومعظم الأفلام والأغاني تصور هناك وممكن تلتقي بالفنانين وتصور معاهم (اسأل بكم قبل ماتصور) - التذاكر ب 40 جنيه وفيه مدينة العاب صغيره وتاريخ الديناصورات
7- شارع جامعة الدول العربيه: ويتواجد فيه معظم الخليجيين على القهاوي والمطاعم الكثيره اللي عليه من مطاعم الفول والكشري لمطاعم المندي

8- مطعم ابو رامي:

موجود في السيده زينب ويفتح الى الفجر ومع انه المكان قديم وشعبي الا انه الأكل فيه من كباب وريش وكفته وغيره لذيذ جدا والكثير من الخليجيين واغنياء مصر والممثلين ياكلون -ً سعر الكيلو 60جنيه – بعد ماتخلص اشرب لك شاهي وشيشه على مزاجك- ترى المكان من جد قديم وماهو اد كده لكن الأكل ممتاز جدا جدا

9- مراكز التسوق:

اجملها واحدثها سيتي ستارز وفيه 14 دار للسنما وفندق انتركونتيننتال لكن محلات لك عليها - وجنينية مول بمدينة نصرشارع عباس العقاد- فيه 8 دور سينما والمحلات الله بالخير- كذلك سيتي سنتر بمدينة نصر - اركيديا بكورنيش النيل - اركاديا مول به مدينة ألعاب ويحتوي على عدد كبير من المطاعم وهو راقي وقريب جداً من النيل ولكن مافيه الا سينما قديمه وصغيره وبضائعه متنوعه وبأسعار معقوله وهو كبير الحجم في روض الفرج كورنيش النيل واقرب الفنادق اليه كونراد - مركز التجارة العالمي بنفس الشارع وسوق النيل هيلتون امام هيلتون رمسيس – فيه مجمعات ثانيه لكنها غاليه جدا مثل مجمع جاردينا ومجمع فيرست مول وهو مركز تجاري فخم ويعتبرسوق فندق فور سيزونز أفخم فندق في مصر- مركز هيلتون رمسيس التجاري يشتهر بين السواح وبالذات الخليجيين.فيه مسرح في الدورالسابع وصالتين للسينما ومطعم ماكدونالدز قريب من السينما وصاله بلياردو راقيه ورخيصه- محل عمر افندي كبير ومناسب خصوصا لشراء المنتجات القطنية مثل الملابس الداخلية والمناشف وغيره. وسط البلد ومنطقة العتبة لمن يبحثون عن كثرة المحال ورخص الاسعار , شارع قصر النيل للمنتوجات الجلدية وانصح الراغبين بشراء احذية زيارة معرض اسمة سمراء بشارع جامعة الدول وهو في رايي افضل المحال

10-قلعة صلاح الدين الأيوبي:

موجودة على جبل المقطم ومسجد عمرو بن العاص هما أهم المواقع التاريخيه لكن اذا ماعندك لياقه لاتروح ابد لأنها كلها مشي ومافيه مكيفات وتحتاج حوالي اربع ساعات ويالله تخلصها- اذا بغيت تقدر تروح لها لمدة ساعه بدل 5 وتشوف القلعه وتصور عندها وتشوف الاثار وتنزل ماتكمل الجوله- (اذا نويت لازم تجي بدري يعني حوالي الساعه 8-9 صباحا وتاخذ معاك غرشة ماء)
11- كورنيش المقطم:
فيه كازينوهات فوق الجبل تطل على القاهره والمنظر يجنن خاصة في الليل والجو البارد – تاكل وتشرب وباسعار معقوله
12- القناطر الخيرية :
(مارحنا لها لكن سمعت انها عاديه والأسعار فيها نار للسياح – يقولون لك المركب ب 300 جنيه واذا كاسرت تقدر تنزل السعر ل 50 جنيه واقل – ونفس الشئ لعربات الحنطور والأكل وغيره)
13- شارع قصر النيل وشارع طلعت حرب: وفيه محلات كثيره وبضائع مختلفه وخاصة النسائيه وباسعار مناسبه – تقدر تشتري الهدايا لأقاربك من هنا
14- كوبري قصر النيل وكوبري 6 اكتوبر اذا تحب تتمشى وتبصبص(بعد الساعة 12يصير مليان فل من الخليجيين والمصريين وجميع الاصناف والاشكال) والشحاذيين هنا يقولوون لك نكت الين تموت وتعطيهم المقسوم

15- الرحلات النهرية :

اجملها فرعون النيل وسعرها يصل الي 170 جنية للشخص مع غداء او عشاء بوفية وفيه فقرات ترفيهيه من غناء ديجيه – رقاصه- فقرات تراثيه وغيرها- انتبه من المصوريين واشرط عليه عدد الصور او بيقعد يصور الين يتعب بعدين يقول لك ادفع
16- كريزي ووتر بطريق الاسماعيلية الصحراوي –مسابح مع جلسات وأكل بقيمة 50جنية شامل الغداء مع السباحة- أكوا بارك وهما مدينتا للألعاب المائية وفيهما مسبح بالأمواج وزحالايق مائية
17- مدينة الثلج رائعة للكبار والصغار بطريق صلاح سالم بعد ميدان العباسية.
18- ميريلاند الترفيهية بمصر الجديدة تشمل العاب معدودة وحديقة وقوارب للتجديف تدفع رسم حوالي 60 جنية يشمل وجبة عشاء

المطاعم

• مطعم العمودي خلف فرع فرغلي في شارع جامعة الدول العربيه يعمل اكلات ممتازة مندي وكوزي ومطبق وفول وتميس ومعصوب سمعته طيبه
• مطعم حاتي انس بعد مندي شغله رهيب وهو في ميدان انس بن مالك في المهندسين
• تنين النيل (وهو مطعم صيني اكله ممتاز ونظيف)
• مطعم روشة وقندهار 3 شارع جامعة الدول العربية المهندسين يتميز هذا المطعم بالمزج بين الاكلات اللبنانية والهندية.
• جاستين شارع حسن صبري الزمالك يتكون مطعم جاستين من اربعة اجزاء داخل المطعم بأربعة ديكورات مختلفة. يمكنك اختيار أحدها للجلوس به والاستمتاع بوجبتك فرنسية المذاق حيث يتخصص جاستين بالاكلات الفرنسية
• القرية النوبية ميدان الرماية بجوار فندق ميريديان الهرم – خلف القراند حياة تتميز القرية النوبية بجو خصوصي تستمتع به أنت واسرتك وبالجو الشرقي الذي يتضمن التنورة الشرقية المعروفة منذ العهد الفاطمي وتقدم الاكلات المصرية واللبنانية مع فرقة صغيرة تغني اغاني قديمه – المشكله يسكر بدري الساعه وحده في الليل
• ابو شقره شارع قصر العيني مطعم شرقي يتميز بتقديم جميع انواع المشويات والاكلات المصرية والشرقية بطابع خاص به.
• مطعم أبو شقره بشارع جامعة الدول العربية اعمل حسابك على زيادة 50% زيادة في قيمة الفاتورة للخليجي فقط يعني نصب ( الاكل زين والخدمة تقل كادين عليك ولا جالس تاكل عندهم ببلاش)
• مطعم مون دوور-ميدان ابن عفان بالدقي مطعم وكافي شوب يتميز بكونه مكانا مفتوحا يعطيك احساسا بالحرية والانطلاق ويتميز بتقديم جميع انواع المأكولات.
• الباخره الثابته نايل سيتي بمطاعمها الاربعه الشديدة التميز والرقي افضلها ستوديو مصر للمشويات اضافه الى الاسعار المناسبه
• مطاعم المأكولات البحرية فيش ماركت في شارع النيل.فلاينج فش في العجوزة دي افخم واحسن مطاعم المأكولات البحرية. ومطعم قدورة للأسماك في شارع جامعة الدول العربية.
• لو شاتوه عمارات النصر بشارع النيل منطقة الجيزة يشتهر مطعم لو شاتوه بأكلاته الفرنسية ويتميز بديكوراته التي تناسب اجتماعات رجال الأعمال على موائد الطعام كما يقدم جميع الأكلات البحرية بالمذاق الفرنسي الشهير والحلوى الفرنسية المعروفة.
• انتركوت كافيه دو باريس شارع ابن الوليد بمنطقة الدقي يتميز بتنوع الاطباق التي يقدمها من كافة بلاد العالم، وما عليك إلا ان تختار ما يناسبك وأسرتك.
• بابيليون شارع 26 يوليو بالترسانة سنتر يتميز مطعم بابيليون بجو من الدفء يشعرك براحة عند تناول طعامك به ولا تشعر بمرور الوقت وانت جالس مع أسرتك أو اصدقائك

.

• شوبستكس شارع سوريا بالمهندسين أحد المطاعم التي تخصصت في تقديم الأكلات الصينية ويستقبلك العاملون به بالزي الشعبي الصيني وتختار ما يناسبك من قائمة الطعام .
• مطعم اندريا ترعة المريوطية طريق الهرم تستمتع بوجودك في حديقة ومطعم اندريا حيث الخبز البلدي الذي يتم خبزه أمامك في الفرن ويتيح لك الاختيار ما بين المطعم والحديقة خاصة في موسم الصيف حيث يستمتع أطفال الأسرة باللعب في الحديقة
• سفينة بلو نايل قبل المغادرة لابد لك من زيارتها علي كورنيش النيل بجانب برج القاهرة وهي عبارة عن مجموعة من المطاعم الراقية ذات الخمس نجوم حيث تنوع المطاعم وبصراحة تحتار تدخل اي واحد
• فرايديز"مطعم عائم" ش. النيل بالجيزة يشتهر بالأطباق البحرية فهو يعتبر من أشهر مطاعم الأسماك وملحق به كوفي شوب
• فرحبوت مطعم عائم شارع النيل بالجيزة يتميز بأكلاته الشرقية المتنوعة وتنوع قائمته من الطعمية والبصارة الى الأطباق الفرنسية والايطالية وملحق به كوفي شوب ورواده يستمعون يومياً لموسيقى التخت الشرقي بحد أدنى 20 جنيها للفرد.
• العمدة لا تنسى سندوتش الفول والكشري .الدمياطي فول وطعمية

عصيرات فرغلي في شارع جامعة الدول العربية.

• مطعم وكافيه سيدار في جزيرة العرب في المهندسين.
• مطعم فلفله في ميدان التحرير.
• مطعم الالفي بجانب سوق التوفيقيه.
• مطعم كبابجي العربي فيه حمام محشي روعة في الدقي شارع الملك فيصل
• الهارد روك هو مطعم نفس بلانيت هوليود يقع بجانب قراند حياة دزاين غربي طبعا.
• سلسلة مطاعم جاد.
• المطاعم الموجودة على مركب كرستالة وهي غاية في الروعة ونظافة الأكل.
• بيتزا هت ترا رخيص الوجبة لشخصين حول 50 جنيه(كل الين تدوخ خدمة ممتازه واسعار حلوه
• مطعم فرحات امام الميريلاند بمصر الجديده مشويات وحمام واسعاره معقوله جدا.
• أبو طارق للكشري في العتبة
• الطازج شارع الحجاز.
• محل نعمة إذا تبون شاورما لذيذة انصحكم تشترونها منه لذيذة ساندوتشاته بالمرة.
• الباخره العائليه التي انصحك فعلاً بزيارتها هابي دولفين (الجلسة المحترمة برا يمكن ما يعجبك شكل المكان لكن اكلهم صح اللي داخل مافكرت ادخله) .

المقاهي

• بلاتوه اللي اتوقع ان الناس تنتقله بدال موضة العمده وجراند كافيه وهو مقهى يقع داخل باخرة فرايدز على النيل وجلسته رائعه .. وموقعه على فكره قريب المهندسين شارع محيي الدين ابو العز خلف مغربي للنظارات ..
• كوفى شوب ترى بون رائع ولكنه شديد الازدحام وترتاده الطبقه الراقيه المصريه وهو بالكوربه.
• جراند كافيه ومعظم رواده من الشباب بحد أدنى 20 جنيها للفرد
• الروف في صن ست وليس النايت كلوب فالجلسه نيليه حالمه.
• اما السهرات لاتتعدى الباشا وصن ست والسرايا والبيت بيتك ومقاهي الحسين
• قرية جولف السليمانية في طريق الاسكندرية الصحراوي قرية فيها جميع مقومات الحياة من ملاعب ومسطحات خضراء وبحيرة وملاعب اطفال وهناك حمامات سباحه للكبار والاطفال وملاهى بريئه ومطاعم راقية تقدم الاكلات العربية والفرنسية والايطالية الفرد 75 جنيه شامله وجبة غذاء نظيفه ومحترمه وهى على بعد 30 كيلو من المهندسين بالقاهره.
• وروح لسندباد للاطفال.
• زيارة حديقة الحيوان فى أيام الاثنين والثلاثاء والأربعاء لتجنب الزحام وفيها مقهى وبجانبه بركه وبط.

1- يمكن استئجار الشقق اما عن طريق سمسار او عن طريق بوابي العمارات بالسؤال المباشر او عن طريق شركات خاصة بالتأجير ........ اسعارهم للشقق تتراوح بين 200 الي 300 لليوم للشقق الفخمة.
2-احرص ان يكون العقدموضحا بة الجهة التي ستتحمل تكاليف التلفون والكهرباء انت ام هم كي لا يطالبوك بهذة المبالغ عند الخروج علما انهم سيأخذون مبلغ تأمين .
3-هناك فنادق 4 نجوم ذات المواقع الجيدة مثل اطلس الزمالك وهو يقع امام سور نادي الزمالك بشارع جامعة الدول وموقعة اكثر من ممتاز وفنادق 3 نجوم مثل فندق النبيلة بنفس الشارع اما فنادق ال5 نجوم فأفضلها فورسيزنز كونراد وابراج النيل تاور (ميرديان) ثم شيراتون الجيزة وماريوت .
النيل وسفير الزملك للشقق الفندقية ايجار الغرفة هو شامل للخدمة والضرائب وحاول ان تحصل علي معدل مخفض للفترة الطويلة.
4- افضل مناطق السكن للهدوء المهندسين و الزمالك ولمن يرغب في القرب من المطاعم والاسواق فعلية اما بشارع جامعة الدول العربية او بشارع عباس العقاد بمدينة نصر شارع جميل فعلا.