عشق..{
02-04-2022 - 09:09 am
السلام عليكم
اليوم قدمت على الفيزا وان شاء الله تطلع قبل الوقت
سؤالي لما رحت للمكاتب السياحة السكن نار جدا ولا هو ذاك الزود
قالو لي الناس احجزي من موقع البوكينق افضل كثير واضمن وارخص
شرايكم انتم وهل عليه ضرائب او شامل الضرائب !!
وهل الحجز منهم مضمون وكيف اخذ وصل المبلغ !
لازم الحجز من الفيزا مو !!
يعني الموقع يعطيني السعر الشامل حق ال 12 لليلة هل هو شامل كل شيء !!
سؤالي الثاني التذاكر شفتها في مكتب الفيزا ارخص على كلامهم
شرايكم اقص لي من هناك مثل لندن اي ومتحف الشمع والباصات وغيرها من الاماكن !!
اخر شيء تسون فيني خير لو تحصلون لي هوتيل غرفتين في هايد بارك وقريبه من الاكسفورد
حق 12 ليلة مايزيد سعر المجموع حق الغرفنين 17الالف
سؤال ثاني الحين لو اشتري شيء من هناك هدايا او ملابس لازم احفظ الفواتير او اسوي شيء هل في ضرائب عليها تراني مو عارفه شيء !!
من جد بتفكون ازمه وانتم اخبر مني بلندن
السلام عليكم
اول شي طبعا الحجز عن طريق الانترنت ارخص بوايد عن المكاتب السياحيه .. في موقع بوكينق و في مواقع ثانيه .. بوكينق مضمون 100% و اغلب الفنادق في بوكينق ما تطلب دفع مقدم .. يعني مجرد تحطين رقم الفيزا للضمان و لج حق الالغاء غالبا الي قبل يوم الوصول بيوم بدون اي رسوم .. لكن ياخذون رقم الفيزا عشان لو ما كنسلتي و ايضا ما رحتي يخصمون من الفيزا الغرامه ..لكن بشكل عام تحجزين من موقعهم و تحطين الفيزا مجرد رقم للضمان و لا ياخذون منها و لا فلس .. يوصلج علي الايميل تاكيد الحجز تطبيعينه و الدفع يكون بالفندق كاش او ببطاقه مافي مشكله. و السعر احيانا يكون شامل الضرائب و احيانا لا انتبهي علي الشروط المكتوبه
هذا بالنسبه لموقع بوكينق ..
بالنسبه للفندق اللي تبينه .. 4 نجوم او 5 نجوم؟ و الغرفتين كل غرفه دبل فيها شخصين؟
تاريخ الذهاب و تاريخ العوده؟
التذاكر اللي تسالين عنها للاماكن السياحيه؟ والله ماشوف في داعي تحجزينها من ديرتج .. هناك مكاتب السياحه و العروض و الخصومات بكل صوب .. و الكونسيرج في الفندق ممكن يضبط لج كل شي و بافضل سعربالنسبه للفواتير .. اي نعم تحتفظين بالفواتير و لما تخلصين الشراء من المحل قوليله ابي نموذج التاكس فري يعطوج فورم تعبينه و اذا في محل مشترياتج منه وايد انتظري مره وحده لما تخلصين المشتريات كلها و روحي لاي فرع من المحل مع كل الفواتير يجمع لج اياها بفورم واحد .. لا تنسين تاخذين معاج الجواز للمحل لما تسسوين التاكس فري ..
لما تروحين المطار في اليوم الاخير حاولي تروحي مبجر عشان يكون في وقت هناك و تحسبا لو كان كاونتر التاكس رفند عليه زحمه .. تروحين مع فورماتج و فواتيرج و جناطج و تذاكرج و يعطيج فلوسج كاش .. الفواتير اللي مبالغها كبييره اخذيها كاش لكن اذا كان مبلغ الترجيع صغير يفضل يرجعون لج اياه علي الفيزا لان علي كل فاتوره تبين التاكس كاش ياخذون باوندين و نص لكن اذا الترجيع علي الفيزا مافي رسوم..
في نقطه مهمه جدا .. لما تروحين المطار روحي اول شي علي التاكس فري مع جناطج و كل شي .. لا تسوين جك ان و تدخلين الجناط و تاخذين البوردينق قبل التاكس فري .. لان ساعات يتعسرون و يقولون لج وين اغراضج بالتاكس فري او يطلب يشوف شغلات من الاغراض خاصه الاشياء الغاليه.
صارت معانا و تساهلنا مره و دخلنا جناطنا قبل التاكس فري وعاند الموظف و ضاع علينا مبلغ و قدره..
و اي استفسار تفضلي