بسم الله الرحمن الرحيم
الموضوع واضح من عنوانه .. أنا إن شاء الله في الصيف القادم بسافر لأمريكا للدراسة في معهد اسمه kaplen aspect في لوس أنجيليس ويست وود
حجزت موعد مع السفارة وعطوني يوم 962009 وانا موعد سفري في 67 يعني قبل شهر تقريبا
المهم انا متعامل مع مكتب .. كلملي السفارة وشرح لهم الوضع قال انهم يبون الفيزا تطلع بدري عشان ياخذون احتياطاتهم وخرابيط كثيرة مدري وشي .. المهم قدموا لنا الموعد (طبعا حنا اللي هم أنا وولد عمتي) إلى 255 يعني يوم الاثنين الماضي .. وجاني ايميل من السفارة يوم الأحد قالوا لي وشي الاوراق اللي لازم تجهزها وكذا .. بآخر الايميل مكتوب انه لازم ما تجي قبل أكثر من نص ساعه من موعدك وانا موعدي كان الساعه 7:30 يعني ما اجي قبل الساعه 7:00 ومكتوب إنه ماتدخل معك جوالك ومفاتيحك وخرابيط .. لكن هذي ما عليكم منها .. ياخذونها منكم قبل ما تدخلون ويعطونك رقم .. واذا جيت تطلع تاخذها
المهم وصلنا للسفارة الساعه 7:00 بالضبط .. وصفينا بصف طويل وحر الشمس وقلق .. لكن فيه رشاشات رذاذ تبرد شوي .. المهم بعد ساعه و45 دقيقه قالت الحرمه اللي تاخذ الأوراق إنه خلاص أصحاب المواعيد اللي الساعه 7 ما نستقبلهم .. وانا توي ما بعد وصلت لها .. المهم سقطت على كل السرا وقلت لها انا موعدي الساعه 7 .. قالت وقف على جنب شوي وانا اناديك .. وقعد أقل من 5 دقايق ونادتني وقالت ليش تأخرت؟ قلت لها ما تأخرت ناظرتني بحقد وقالت عطني صورتك وورقة الموعد .. وعطيتها وبعدين قالت ادخل .. ودخلت جوى .. عاد دلع جوى كافيتيريا و كراسي ومكيفات .. المهم أخذت رقم كان 75 وولد عمتي 76 .. وقعدنا ننتظر ساعه تقريبا .. ونادونا أنا قلت خلاص الحين المقابلة .. وكنت مرتبك .. ويوم رحت قابلني واحد أفريقي قال لي عطني أوراقك .. وعطيته وأخذها كلها ما بقى معي إلا كم ورقه .. وبعدين قال لي رح ونبي نناديك بنفس الرقم .. قلت طيب .. ورحت وبعد ساعه تقريبا نادوا رقمي .. ورحت وانا مرتبك أحسب هذي هي المقابلة .. قابلني واحد لبناني اخذ بصماتي .. وقال لي رح ونبي نناديك بنفس الرقم .. وانتظرت ساعه بعد .. ويوم نادوني وانا مرتبك .. لكن هالمرة صدق كانت المقابلة .. قابلتني حرمه عجوز أمريكية .. أول شي قالت لي عطني أوراقك .. عطيتها وبعدين قالت لي كم عمرك قلت لها 17 وقالت انت بأي سنة قلت ثاني ثانوي .. وبعدين قالت بتروح تدرس؟؟ قلت إيه قالت Good For you وبعدين قالت مع مين بتروح؟ قلت مع ولد عمتي .. وبعدين قالت عطني جوازك وعطيتها .. وقالت your visa has been approved وبعدين قلت لها شكرا وقعدت تضحك وقالت Study hard وقلتها I will وبعدين قالت خلاص رح لمكتب الفيدكس وعطهم الجواز وادفع 65 ريال و انتظر من أسبوع إلى 10 أيام ونرسل لك الجواز مع الفيزا
الفيزا تقريبا كلفتني
0ريال رسوم تدفعها عند سامبا
و 750 تدفعها بالنت
و 65 حقت الفيدكس
يعني تقريبا 1400 ريال
وبس
ادعولي بالتوفيق