1. مافيه خطر لاكن ياليت تأخذ معك أحد يونسك وأنا أخوك ..

السلام عليكم ورحمة الله وبركاته
وعليكم السلام ورحمه الله وبركاته ..
جعل الله كل ايامك مباركة وتقبل طاعاتكم بهذا الشهر الفضيل
الحقيقة تقرير ابو العصافير جعل عصافير قلبي يطيرون لاقرب مكتب خطوط
مسافر لوحدي
حجزت ليلة العيد وقطعت التذكرة وكله تمام
باقي بس العزبه
سؤالي او اسئلتي لو تكرمتوا وتفضلتوا علي هي :
وش رأيكم في فندق اسمه منهاتن بجاكرتا ؟
فندق رائع وجميل وموقعه بوسط العاصمة جاكرتا ..
هل هو قريب من المطار ؟
مسافة ساعه تقريبا ..
كم اجرة التاكسي لفندق منهاتن ومن الفندق للجبل ؟
من المطار لفندق منهاتن بسعر 160 الف روبيه .. ومن الفندق للجبل
بسعر 450 الف روبيه بسيارة خاصة ..
كم ايجار الفلل اقصد كم اقل سعر واغلى سعر ؟
تترواح من 550 الف روبيه الى 800 الف روبيه ..
سألت واحد قال تحصل بالفين ريال باليوم وتحصل بميتين ريال هل كلامه صحيح ؟
هل وقت العيد فيه مطر والاجواء زوينه بالجبل
نعم بالجبل بنشاك تكثر الامطار بتلك الفترة ..
اول مره اروح اندونيسيا وبسافر لوحدي رايكم علي خطر لاني ماني مخلي مكان ناوي امتر اندونيسيا تمتير ؟

مافيه خطر لاكن ياليت تأخذ معك أحد يونسك وأنا أخوك ..

مع احترامي لدولة اندونيسيا واهلها لكن سمعت ان الفاسدين كثير فيها هل بخشم الريال اقدر اتجاوز بعض المشاكل في المناطق البعيدة عن المناطق السياحية لاني مغامر واجيد لغة الاشارة ورايح رايح لو توصل المصاريف الى الركب ؟
مافهمت وش تقصد ..
هل سمعتوا ان سعودي او خليجي انذبح في ديرتهم وخصوصا اذا كان مايحب المشاكل مثلي ؟
أخي الكريم مافيه الا كل خير ..
شكرا مقدما
وبالتوفيق أن شاء الله ..

يعطيك العافيه خبيرنا " ابن السعوديه "
و الله ما قصرت مع جميع الاعضاء ..
و لا تشيل هم اخونا " تكرون التاسع عشر "
ان شاء الله ما يصير الا كل خير ..
و رحلة سعيده ..
ان شاء الله ..
.
.

ام عزيز7
الله يعافيك ياأم عزيز7 .. وشكرا جزيلا لكي على تشجيعك الدائم للجميع ,,,

يامال العافية يا ابن السعودية بيض الله وجهك وماقصرت
كنت واعوذ بالله من قولة كنت ، كنت اقصد هل اذا واجهت مشكلة اقدر احلها بالمقسوم انويه صدقة على رشوة لاني قريت ببعض التقارير ان البوليس يضايق الخليجي وخصوصا السعودي ويحاول يبتزه ولاني من النوع اللي يشتري سلامته وراحة باله فهل كل مشكله تواجهني احلها بهالطريقة باعتبارها احد الحلول والخروج من الورطات
وفيه سؤال ما جاوبت عليه حفظك الله ورعاك اللي هو
رفيقي اللي يقول فيه فلل من الفين ريال الى ميتين ريال هل هو نصاب لان الاجابه يعتمد عليها الشي الكثير عطاني معلومات كثيرة انت جاوبتها بخبرتك نقيض كلامه وباقي هالنقطه لاجل اطب في بطنه وافضحه.
بالنسبه للسفر لوحدي والوناسه والله انا راعي سفرات وحيد واستانس لحالي لكن ياخوي الكريم ابن السعودي لفت انتباهي شي بالمنتدى المبروك هذا وهو لماذا لاتجعل وسيلة تواصل بين اللي يبون يروحون لحالهم انهم بتخاوون وتسهل لهم التواصل مع بعض يمكن تكون فرصه واحد يغث واحد لكن يمكن عشره مايغثون عشره .. لست اعلم
اكرر شكري الجزيل لك على رحابة صدرك والشكر موصول للموقع الطيب اللي نورنا بالمعلومات
لك التحية

بارك الله فيك اختنا ام عزيز مشاالله عليك متابع تفاعلك من فترة وشكرا لك على مساعدة الحيارى بارشادهم للشي الزين
قريت يا ام عزيز في سبق قبل شوي ان الامن الاندونيسي مستعين بقوات خاصه من اجل يمنع العمال والشغالات مايجون للسعودية برأيك هل تأثر هذي على مخططاتي للسفر لاندونيسيا يعني يمكن توصل اني اكنسل اذا تفاقمت الامور

رفيقي اللي يقول فيه فلل من الفين ريال الى ميتين ريال هل هو نصاب لان الاجابه يعتمد عليها الشي الكثير عطاني معلومات كثيرة انت جاوبتها بخبرتك نقيض كلامه وباقي هالنقطه لاجل اطب في بطنه وافضحه.
فعلا فيه ب 200 وفيه ب 2000
على حسب الفله

اسعار الفلل تختلف من فلة الى اخرى بعضها يصل الى 150 ريال
وبعضها يصل الى 1500 ريال
واذا انت لوحدك ابعد عن الفلل خلك بفندق افضل

مراحب مستر سعود ومشكور على المعلومة

مراحب مسيو جورج الرومانسية
والله فعلا ياجورج الامر يحير يعني تفاوت الاسعار بهذه الصورة وش معايير التفاوت الله اعلم
اخوي جورج عطنيها على بلاطه ليه ما تفضل لي اني اسكن فله وانا لوحدي برأيك اني اكون عرضه للهجوم المباغت وغير المباغت بصراحه اخوي جورج انا ما يهمني التوحد بالفله اونس نفسي عادي انا عندي مشكلة مع الحشرات والنامس وابوبريص وبعد ما اخفيك ودي اسألك هل على اغراضي خوف معي شنطة وعزبة وتعرف فلوس وجوال ويمكن يصير معي لاب توب وغلاية شاهي اغراض كثيرة بدون تفصيل هل تتوقع انه ممكن احد يكسر الباب ويشفط اغراضي يعني فيه امان يا جورج ولا مافيه هل فيه تجربه مع احد تعرفه بهالخصوص
لك الشكر على التجاوب من قبل ومن بعد