ضب رومانسي
11-12-2022 - 05:16 pm
بسم الله الرحمن الرحيم
عشان ما أطول عليكم أبدخل بالموضوع مباشرة
قبل لا أسافر لأوروبا دخلت أحد المواقع الشهيرة ( اذا سياسة الموقع تسمح بنشر اسمه سأنشره ) وحجزت عن طريقه في كل المدن اللي أبروح لها..
في ألمانيا وتحديدا بادن بادن حجزت في فندق ( راديسون بلو )
الفندق مو رخيص وصوره في الموقع روعة..
لكن للأسف تفاجأت يوم رحت انه عادي جدا جدا ويختلف اختلاف جذري عما هو عليه في الصور
وفي سويسرا في مدينة انترلاكن حجزت في فندق ( انديا فيلاج ) أو قريب من هالاسم
وكان حجزي غرفة مطلة على النهر..
يوم رحت لقيتها ماتطل على النهر لكن تقدر تشوف النهر عن طريق الشباك
ويوم رحت أقولهم غيروا غرفتي وعطوني مطلة مثل ما أنا حاجز قالولي اللي مطلة ع النهر سويت وانت حاجز غرفة..
وفي النمسا في سالزبورغ رحت لها قبل موعد حجزي بيوم وقلت بدال ما أحجز في فندق ومن بكرى أجرجر شنطي للفندق اللي أنا حاجز فيه..أبروح أحجز في نفس الفندق عشان تكون دخلتي وحدة
المهم رحت للفندق وماقلتلهم اني حاجز عندكم..لكني قلتلهم أريد غرفة
قالولي الليلة ب84 يورو
علما اني حاجزها أنا ب134 يورو الليلة
يعني مزودين عليّ 50 يورو ( 250 ريال ) في الليلة
وفي زيلامسي حجزت الليلة ب1045 ريال على الجبل (بعيد عن البحيرة)
وفي يوم من الأيام كنت أتمشى قريب من البحيرة وشفت فندق حلو ويوم سألتها بكم الغرفة قالتلي ب112 يورو (560 ريال تقريبا)
وفندق أقل منه قالتلي ب 84 يورو (420 ريال تقريبا)
الخلاصة//
نصيحتي لكم لاتحجزوا أي شي..تعالوا للمدينة اللي تبون واحجزوا أنتم بأنفسكم أرخص لكم
واذا أعجبتكم المدينة ممكن تطولون فيها واذا ما أعجبتكم ممكن تغيرونها..
وترى السكن متوفر جدا جدا..
والله ماكتبت هالكلام إلا لأني أعز هالمنتدى ومدين لأعضائه بالكثير لأنهم أفادوني في رحلتي..حتى أنني لم أستطع تأجيل الموضوع حتى أعود من سفري بل كتبته وأنا الآن في سالزبورغ لعلي أفيدكم
ختاما لا أريد منكم الا الدعاء
اللهم اعطهم ضعف مايتمنونه لي
وفقكم الله وأسعدكم
اما اللي مسافر مع مجموعه شباب او مع عائله واطفال لاوالله ادفع زياده للموقع الوسيط مثل بوكينق وترتاح من الفراره
نقطه مهمه: المواقع اللي مثل بوكينق يعطيك فرصه لتقييم الفندق وكتابه السلبيات والايجابيات حتى يستفيد منه كل من يدخل على بوكينق
وهالميزة غير متوفره اذا حجزت من الاستقبال الا اذا عندك مدونه او متابعين بالملايين بتويتر