السلام عليكم
شوفي اختي بالنسبة للغة ترى هم هناك اصلا مو ذاك الزود يعني اذا كنتي تعرفين تستخدمين اللغة عشان تمشين حالك راح ان شاء الله تتيسر امورك.
اذا كانت رحلتك اول مرة انا من رايي لا تحطين روحج في مازق وعشان تعرفين ان المكتب اللي في بلادج ما قص عليج شوفي الاسعار في النت وبعدين قارنيها باسعار المكتب اللي في بلادج .
بوكيت تستحق اكثر من 4 ايام اذا كنت من محبي الرحلات والطبيعة.
في كل رحلاتي كان معاي طفلين كان دائما فطورنا جميعا مجانا مع الحجز
الله يوفقكم
وان شاء الله الاخوان في البوابة ماراح يقصرون بالمعلومات

احجزي عن طريق النت ارخص لك من الفندق بوكت تستأهل اقل شي اسبوع

اخوي سلمان الله يوفقك دنيا واخره ماقصرت ..
وع فكره الطفل عمره 7 سنوات مو صغير حيل ..
اخوي طارق من النت صعبه علي شوي اخاف لان ابو الشباب رافع يده من الموضوع وانا اللي مسويه فيها فاهمه وطاقه الصدر وقايلتله بضبط كل شي .. اخاف من النت اتوهق لما اروح هناك مافيه حجز وتكون الفلوس راحت بعد ؟؟ تخيل الموقف ..

هلا اختي سولارا. أنا بحكم تعاملي بالنت عمري ماوجهت اي مشكل.

هلا اختي الغاليه شوفي اذا كنتم من اهل الطلعات والبحر والرحلات بوكت غير عن اي شارع من شوارع تايلاند بكبرها يعني انا ماعمري قعدت اقل شي 12 يوم وهالسنه غير ماشبعت منها12 يوم ماشبعت ةدي اردلها
بالنسبه للرحلات انا يوم كنت هناك ناويه على كل الرحلات البحريه أشطب عليها بس الهوا صار ضدنا والامطار والرياح قويه فتكنسلت الرحلات جميعها ماعدا في في ايلاند
المهم الفنادق انا دوم كنت اوصل بانكوك واحجز من عند وحده عيوز في بانكوك بس هالسنه حجزت كل حجوزاتي من النت اكتشفت انه حجز النت ارخص واوفرللوقت ولي حرية الاختيار لنوعية ومستوى الفنادق
فاختي انتي لازم تحددين جدولج من بلادج وتعرفين كل مكان شكثر بتقعدين فيها عشان تحجزين فنادق وتفتكين والموضوع سهل جدا
سواء عجبتج الرحله والمكان ةلا لأ ترضين وتعيشين نفسج. ومتأكده بوكت بتعجبج اذا نفرض يوم بي بي ايلاند
يوم راحه والتجول بشوارع بوكت او التسوق في مجمع جنسلينغ
يوم جيمس بوند او رتشا بعدها راحه
يوم التسوق او الذهاب الى شاطيئ باتونق وفي المساء الذهاب الى فنتازيا شو
رحله الى صيد السمك او الرافتينغ
وعندج رحلة السفاري حلوه وبانشيات
وموفقيين

الاخت سولارا كم مدة الاجازة قبل كل الشيء؟
وحددي الاهداف من الاجازة ؟
مثل : تسوق من الدرجة الاولى , علاج او استجمام (فترة نقاهة) , استكشاف ومتعة ، رحلة عائلية
او مثل ما نسميها نحن "تجديد العهد" بالعربي الفصيح شهر عسل ثاني
والباقي لا تاخذين هم كل شيء بيجي حبة حبة .... من الاعداد والتخطيط الى العودة من السفر
من ناحية اللغة ، الجماعه هناك ضاربين الحاجز يسار لا انقلش ولا عربي اللهم لغة الطرمان هي سيدة الموقف
من ناحية النصب والاحتيال فهو موجود لانهم ماشيين على مقولة " ما يخدم بخيل " لكن ما دام طرحتي السؤال هنا
ان شاء الله ما بتتعرضين لاي نوع من النصب والاخوان بيدلونك على احسن الاسعار .
وللبقية لنا عودة . هاذي بعض النقاط للعلم فقط :
1. بانكوك : للعلاج ، التسوق , والرحلات العائلية محصورة في دريم ورلد و سيام بارك
2. فوكت : استكشاف طبيعة ، رحلات عائلية ، شهر العسل , استجمام
3. شنغماي: استجمام ، استكشاف طبيعة
وفي غيرها الكثير من المدن والوجهات السياحية في جميع انحاء تايلاند لكن هاذي الثلاث مدن اشهرها
ولم يغب عن بالي " بتايا " الا اني افضل عدم ذكرها في هذا الموضوع حتى لا يتحول الى حلبة صراع للديكة !
هذا وللبقية حديث .
اخوك/ طالب المنصوري

بما ان اول مره تسافرون لتايلاند والسفرة عائلية ، اشوف انكم تحجزون من النت افضل .
مواقع مقترحه :
http://www.agoda.com/
بالنسبة لطريقة الحجز من الانترنت سهلة ان شاء الله وآمان . وبس تحجزين يدزونلج على الايميل رقم الحجز وتفاصيله ، تطبعين هالورقه وتودينها وياج الفندق بدون اي تعقيدات .
تحياتي

عاد الحين سولارا ماعندك عذر. الاخوان والأخوات اتفقو أنو النت ارخص صدقيني من واقع تجربه وانا الحين اكتب لك وانا في بانكوك. النت ارخص بس. اهم شي تختارين الفندق لانه مافي طريق رجعه يعني ماتروحين بكره وتشوفين الفندق ماعجبك تقولين لهم رجعو فلوسي