يا هلا ومراحبا بك أخوي
أقرب سكن مناسب للمقر الجديد لمركز الجزيرة للتدريب هو رتاج رزيدنس السد Retaj Residence Al Sadd
وعندك بعد ويندام قراند ريجنسي (5 نجوم) ... وفندق ميلينيوم (5نجوم) وهو الأقرب للأصمخ مول وشارع السد التجاري
والمسافة بين هالفندقين تقريباً 500-600 متر
عندك فندق في شارع السد (4نجوم) وجيد كذلك اسمه مروب السد
مع خالص التمنيات بالتوفيق

..
طيب ممكن اعرف وصف مركز الجزيرة للتدريب بالضبط ..

جاي في طيارة ولا سيارة؟
عموماً... إذا جاي بالبر..
(1) بعد ما تدخل قطر بتحتاج 100 كيلو تقريباً أو أقل لدخول مدينة الدوحة... واصل المسير بتعدي 4 دوارات تحت إعادة الإنشاء: دوار الغانم، دوار العزيزية (على يمينك بيكون محطة بترول الجزيرة)، دوار السوق المركزي، دوار قطر للديكور.
(2) بتطلع فوق جسر طولي، بتوصل إشارات رامادا (على يمينك بيكون مجمع شركات المناعي ومقاهي وعلى يسارك الي فرانس كافيه ومطعم شاطر عباس...).
(3) خذ إشارات رمادا يسار.
(4) عد بعد ذلك 4 إشارات مرورية وكمل طريقك إلى دوار التلفزيون.
(5) قبل وصولك دوار التلفزيون بتعدي محطة بترول اليرموك، بعد المحطة بتشوف على يمينك مركز الجزيرة للتدريب.
إذا جاي بالجو وسواءاً بتركب تاكسي أو بتأجر سيارة
(1) بعد خروجك من مبنى القادمين كمل طرقك وبتعدي إشارات جسر راس بو عبود (الجسر بيكون معلق فوقك بالعرض وأنت كمل سيدة).
(2) هذا طريق الكورنيش، واصل السير بتعدي دوار الجمارك + إشارات الفرضة + دوار الديوان الأميري + دوار الإعلام (أو مسرح قطر اسمه ما اذكر)، خذه يسار.
(3) بتوصل إلى دوار عند مسرح قطر الوطني من الجهة الثانية، واصل وبتوصل دوار الدفاع المدني، واصل بتوصل إشارات خذها يمين.
(4) كمل طريقك إلى دوار التلفزيون، قبل لاتوصله بتلاقي المركز بعد محطة بترول اليرموك.
في جميع الأحوال إذا ضيعت، اسأل عن دوار التلفزيون، هو موجود هناك.
بالتوفيق

هلا بعثرات قلم صراحه اخوي بوفهد80 ماقصر على الوصف
ولا اروع
تسلم