[شدعوه 9 شافوا الموضوع ولا واحد تربطه ذكرى بلندن علينا
اخاف فقدين الذاكره ؟؟؟

هلا اختي
اولا انا اكشفت انج كبري بالضبط ههه..(على فكره انا بنت)
ثانيا انا مالي اي ذكرى بلندن لاني اوروبا بكبرها ماطبيتها بس مصر وشرق آسيا معلقين عليها مدري شفينا علينا حمدالله والشكر
ثالثا بس خلاص فرجت انشالله بعد كم يوم بسافر لندن وراح اعيد هناك لاول مره واول مايصير لي ذكريات بعلمج على طول
مشكوره علي موضوع الشيق واسلوبج الحلو...
تحياتي...

السلام عليكم
اختي حصه انا لي ذكرى يمكن بعيده شوي عن ذكراكم الحلوه .. لكن هذا اول شي طرى على بالي لما قريت موضوعج..
كنا في شتاء 2008 شهر 12 و صادف عيد الأضحى الله يعيده علينا و عليكم بأتم صحه و عافيه
كان في واحد من قرايبي الله يشفيه مريض و ماله احد الابناته و زوجته فتبرعت اني ارافقه و اخلي البنات يهتمون بدراستهم و أمهم ابرك .. و اسأل الله القبول و الأجر
المهم ان هالشخص ما كان تشخيصه خطر او حالته حرجه .. كان وضعه زين نوعا ما لكن سبحان الله قبل العيد بيومين انتكست حالته فجأه و طاح بغيبوبه بشكل مفاجئ و بدون لا نتوقع ... و مريت بفتره محبطه بشكل ما اقدر اوصفه .. و ظغط نفسي رهيب و سببه ان أهله و زوجته كان عندهم أحساس سبحان الله انه فيه شي و على طول يدقون علي .. و انا ما ابي ابلغ أحد بأي شي بوقتها .. يعلم الله ان النوم وقتها ما قدرت أنام و انشغلت .. الله المستعان.
يوم العيد بالليل قالي الدكتور انه وجودي عند العنايه المركزه لا راح يقدم ولا يأخر فالأفضل اني اروح و ارجع باجر..
سمعت كلامه و توكلت على الله على أني ارجع اليوم الثاني .. رحت البيت و ما قدرت انام قمت و صليت ركعتين و دعيت ان الله يطلعه من هالمحنه و ينجيه منها .. و لما شفت اني مو قادر أنام و كانت الساعه بحدود 10 و نص قلت اطلع اتمشى يمكن الله يفرجها ... فطلعت تمشيت و ماني عارف ليش قلت ابي اروح للأيجوار رود.. وقتها كان زحمه بشكل رهيب و عالم رايحه و عالم راده و الاغلبيه الساحقه مسلمين .. سواء عرب او باكستانيين او ايرانيين . لكن كانت زحمه .. فقعدت بكوستا كوفي و شربت لاتيه و اتفرج على الناس .. حسيت وقتها بالحنين
حنين حق كل شي .. حق امي .. حق بناتي .. حق الكويت .. كل شي يطلعني من المود اللي انا عايشه اشتقت له .. و سبحان الله قلب الأم غريب دايما .. مع اني مكلم الوالده و الوالد الله يحفظهم الصبح و مبارك لهم بالعيد لكن حست بشي و دقت علي .. و سألتني اذا فيني شي قلت لها لا .. فقالت انا حاسه انه فيك شي من الصبح من صوتك.. حاولت اني ما اقول لها لكن الأم لما تحاتي تتعب .. فقلت لها انه مافيني شي لكن محتاج دعوتج أن الله يفرج أموري و ما عطيته فرصه تعرف الموضوع لكن الحيت عليها انها تدعيلي و الله يجزاها خير لحد ما سكرت التليفون و اهي تدعيلي و تدعي ان الله يفرج كل شي مكدر خاطري .. حسيت براحه مو طبيعيه سبحان الله و تمشيت شويه و رجعت الشقه و نمت ...
الصبح رحت للمستشفى .. لكن بدال لا أمر على العنايه المركزه اول شي قلت ابي امر على الغرفه اللي كنا فيها و اخذ الملابس اللي محتاجه غسيل ليما الله يقومه بالسلامه ..
و انصدمت انه موجود و يطالع التلفزيون
و أكتشفت من كلامه انه ما كان يدري انه كان بغيبوبه لكنه قالي انه كان يحس بدوخه و خمول و انه اليوم أحسن الحمدلله ..
و تمت عمليته الحمدلله بعد هالموقف بأسبوعين و نجحت على بركة الله و رجعنا الكويت و الى الأن ما فيه أحد يعرف بموضوع غيبوبته حتى اهو شخصيا
ادري السالفه مالها علاقه بموضوعج لكنه اول شي طرى على بالي بصراحه

ههه لبى قلبتس حصه ام قصه من جد من جد لندن العله اللي احنا عايشين فيها فيها ذكريات فظيعه !
أبشاركك بكم ذكرى على مدى شريط حياتي اللي مازال مستمر في بريطانيا !
أول شيء أتذكر أيام الثانويه والمتوسطه بما انهم مدرسه وحده ... كانت فيني طاقه شديده ههه كل يوم اروح المدرسه وارجع البيت بعد ماالف الشوارع ههه مره من المرات وانا الف مع الشباب والبنات كنا نلعب لعبه ولاكلمه بس بالانجليزي خ < مخربتهم
المهم يوم جاء دوري وانا قاعده امثلهم ومتحمسه واتحرك وبالشارع ويوم جاب فريقي الجمله انا طمرت من الفرحه ههه شكلي كان مجنون وربي بس المهم في السالفه اني مااقول لاامي وين اروح ووين اجي ووش صار وكذا اخاف تهوشني جاتني بعدها بكم يوم وقالت لي كل اللي سويته وشكلي وانا اطمر وكل هذا انا تروعت ! قالت ايه ياحظي ماتدرين عن روحك ومصورينك بكميرا بالعربيه ههه اقسم بالله انا ماادري و فيه عالم تتصور وانا طلعت زي عين الشمس ههه
وعلى طاري الاغنيه اللي كنت دايم اغنيها ايام الكليه مع القروب اكثر شيء اتذكر اغنيه Black eyed pece - where is the love
يسلمو اختي الموضوع الروعه وان شاء الله بتكثر ردودي بحكم كثر البلاوي اللي عندي بلندن ههه

م
أغنية محمد عبده (العقد) تذكرني بلندن
والشقة لما اسمعها واطل من النافذه على الحديقة
أغنية محمد عبده (جيتك حبيبي) تذكرني بالأندر جراوند !! كنت اسمها بالأي بود صيف 2007
أغنية (تحريتك سنين طويلة) لصالح الحريبي تذكرني بالنهر والدي ال آر !!
ياحلو لندن وحلو ذكرياتها ..ليتها تعود !
المطر وريحة القهوة تذكرني بالأجورد روود
يذكرني فيك يا لندن كل شي حلو ..

اول ماقريت العنوان دخلت بسرعه ههه
لندن لها ذكريات قديمه بصيف 95 مع اهلي
والحين لها ذكريات اجمل مع زوجي
حصوص ادعولنا بالذرية الصالحه

السلام عليكم هلا اختي حصه ام قصه صادقه لندن لها ريحه وعبق جميل وانا احبها كثير
وانا جلست بها 10ايام قبل شهر وتونا رادين منها صراحه اتمنى ارجع لها مره ثانيه واجمل ذكرى لي فيها طبعا الذكريات واجد بس احسنها مره قاعدين بالهايد بارك ومعنا بنات الخاله فارشين الفرشه وقهوه وقدوع وحلا وبسطه وعقبها
طلعنا من الهايد باركورحنا للاسواق اللي في البيكاديلي وتسوقنا وخلصنا ويوم طلعنا ويضرب علينا ذاك المطر
اللي اتعشنا منه وسكنا كان بالماي فير ومشيناها كعابي الي الفندق والمطر مغرقنا بس من حلو لندن ومطرها
ما حسينا بالتعب ودخلنا الفندق وحنا متروشين من المطر وكانت موظفه الرسبشن تناظرنا وتضحك بيني وبينكم
يمكن كان ودها تصرخ فينا وتقول وش اللي انتم مسوينه عبيتو السجاد ماء
ومشكوره ياحصوصه على هذا الاقتراح

كويت 777
ياحياتي يا كويت777 العمر كله انشالله انا متأكده راح تكونلج ذكريات حلوه بلندن لأنه لندن غير وجوها غير ومطرها غير وريحتها غير وتروحين وتردين بالسلامه وناطرين تقرير حلو مثلج اول ماتردين انشاالله

talaga
اخوي talaga حياك الله وعسى الله يكتبلك هالوقفه الرائعه في ميزان حسناتك والحمدلله على سلامة صاحبك , انا ماقصدت انه الذكريات لازم تكون كلها ضحك ووناسه انا ابي كل شخص من عشاق لندن يقول لنا شنو يطري في باله من يجيبون طاري لندن او من يسمع اغنيه معينه وبس والف شكر عل المرور والمشاركه الرائعه