- عدت من رحلة إلى إستنبول فى الفترة من 11/7 إلى 18/7
السلام عليكم ورحمة الله وبركاته
عدت من رحلة إلى إستنبول فى الفترة من 11/7 إلى 18/7
ملخص الرحلة بصراحة تركيا رائعة جدا جداُ وإستمعت فيها جدا وسألخص مجموعة من الملاحظات يكمن أى حد يستفيد بها:
1.فى حالة إستخدام المواصلات العادية وأنا أنصح بيها لأنها نظيفة جداُ وتكلفتها أرخص من التاكسى بكتيير أنصح بشراء المفتاح الذى يعاد شحنه وإسمه(akabil) ويباع فى أكشاك فى المواقف وأنا إشتريته من موقف الباصات فى ميدان تكسيم المفتاح ده بيعمل فى الباصات ومترو الأنفاق والمترو الكهربائى والعبارات بين الجزء الأسيوى والأوروبى وسعرة أرخص من شراء التذكرة فى كل مرة يعنى أوفر وأسهل فى الإستخدام وممكن أكتر من شخص يستخدمة فى نفس الوقت.
2.فى حالة الرغبة للذهاب إلى بورصة أو يلوا يفضل أن تحجز قبل السفر بيوم أو إتنين مع مراعاة أيام الأجازات مثل الأحد لأنه بيكون فى ضغط كبير على العبارات ملاحظة هامة (أنا إكتشفت حاجة أفتكر ممكن تفيد الحجز لبورصة أو يلوا بواسطة العبارات فى كشك صغير موجود داخل محطة مترو الأنفاق فى تكسيم بيبيع التذاكر وأفتكر ليه مواعيد صباحية ومسائية بس آخر ميعاد أعتقد 8 بالليل ده ممكن يغنيكم عن الذهاب مشوار حتى ينى كابى والعودة تانى للحجز فقط أنا للأسف إكتشفته آخر يوم بس ممكن يسهل على الناس كتيير أوى.
3.حاجة مهمة أنا عملتها وبصراحة كانت أحسن كل الرحلات السياحية الواحد أفضل إنه يقوم بيها لوحده أوفر بكتيير جدا لو عملتوها تبع شركة سياحية وبتتيح ليك حرية التنقل فى الوقت اللى إنتا عايزة كمان يعنى مش مربوط بتوقيتات معينة.
4.حاجة تانية مهمة لو رايح بورصة وطلعت التليفريك حاول تنزل قبل ميعاد العبارة للرجوع لإستنبول بوقت كافى لأن التليفريك بعيد عن الميناء ووبياخد وقت كبيير أوى سواء فى الطلوع والنزول أنا بقول كده عشان كان ميعاد عبارتى 8:30 وإتحركت من 6 ومالحيقتش العبارة وكان يوم جميل بس الحمدالله إتصرفت وروحت بالباصات اللى بتروح إستنبول وبتطلع كل ساعة من موقف باصات السفر بس طبعاً روحت 3 الفجر لأن الطريق بالباص بياخد 4 ساعات.
5.منطقة تلة العرائس جميلة جداً وانصح بزيارتها وومكن تركب العبارة من ميناء كاباتاش إلى الجزء الأسيوى فى منطقة إسمها iskudr بعد كده فى باصات كتيرة بتروح تلة العرائس.
6.منطقة أورتكوى جميلة أوى ويجب إنها تتراح باليل المنظر تحفة وومكن تتراحل بباصات من منطقة تكسيم.
7.المزارات التاريخية ماينفعش تفوت حد خاصة جامع السلطان أحمد ومتحف توب كابى وقصر دولما بهجة مع مراعاة عدم الذهاب أيام الأجازات للمزارات.
8.الشعب التركى طيب جداُ فوق ماكنت أتصور ومتعاون جداٌ انا صادفتنى مواقف كتييرة لاقيت الناس بتساعد ونفسها تعملك حاجة بس مشكلتهم الرئيسية فى اللغة الإنجليزية ضعيفة جداُ جداً فالازم تكون معاك ورقة فيها أسماء المناطق بالتركى بالنطق الصحيح وورقة وقلم عشان ممكن الإشارات ماتنفعش فتلجأ للرسم.
9. الأكل التركى جميل جداً ودسم بصراحة ماحسيتش إنى سيبت مصر بس بمذاق أحلى وفى مطاعم كتيير فى شارع الإستقلال ده غير مطاعم الوجبات السريعة الى تعتبر أرخص من المطاعم اللى تقدم وجبات تركية.
0-بالنسبة للشوبينج ماحسيتش إن الموضوع يستاهل لأن الأسعار مش مشجعة على الشراء ومعظم الماركات والمحلات موجودة فى مصر بنفس الأسعار أو يمكن أقل فامش مستاهلة الشراء من هناك.
1- فى النهايو أوجه شكرى للموقع ده بصراحة إستفدت منه فى حاجات كتيير أوى قبل السفر وجزاكم الله خيراً
أنا مستعد للإجابة على أى أسئلة من طرف أى شخص بس المهم إنى أقد أكون عند حسن ظنكم ده طبعاً كان ملخص وبصراحة مش بعرف أحكى أوى فياريت أى حد عند إستفسار ممكن يسألنى
جزاك الله خير
تحياتي