ahmad1421
22-10-2022 - 11:23 am
بسم الله الرحمن الرحيم
السلام عليكم ورحمة الله وبركاته
اخواتي واخواني الاسبوع القادم عندي دورة عمل في فندق المها روتانا ابوظبي وقررت ان شاء الله نروح وزوجتي واطفالي الي ابوظبي
وحجزت ستة ايام في نفس الفندق ، والوصول راح يكون ان شاء الله يوم الجمعة الساعة 10 مساء الي مطار ابوظبي
طبعا الحجز كان من مكتب سياحي من جدة ، واول ما اوصل ان شاء الله راح اشوف الغرفة ونتطمئن على السكن
لكن حبيت من الاخوان والاخوات في المنتدي يساعدوني ويعطوني من خبرتهم ونصحائهم في :_
1_ هل استأجر سيارة او استخدم سيارة اجرة اوفر واريح لاني اول مره اسافر للخارج؟؟
2_ يوم السبت بيكون يوم اجازة فكرت يكون مع العائلة في دبي فاي الاماكن والاسواق والمطاعم تنصحوني وكذلك السينما وملاهي الاطفال( زيارة دبي بتكون يوم واحد وحبيت نزور اكثر الاماكن تستحق الزيارة ياليت تنصحوني فيها)
3- باقي الايام من يوم الاحد الي الخميس راح يكون في ابوظبي ياليت تنصحوني في اماكن تصلح للعوائل والاطفال من مطاعم وملاهي واسواق
4- طلب اخير فكرت واحنا راجعين نمر ونأخد هدايا للاهل في السعودية مثل العود والبخور او محلات جلابيات زينة واسعارها مقبوله ياليت تنصحوني بمثل هذا الاماكن في ابوظبي
واي نصيحة اخرى راح تكون مفيدة اتقبلها من كل اخ واخت والله يسعدكم ويوفقكم ان شاء الله
وشاكر للجميع
والله المستعان ،،،،،،،،،،،
طبعاً اكيد استئجار سيارة افضل، لكن في بوظبي صعبة الشوارع عندهم، يعني لازم تسأل كثير وانت تسوق لأن اللافتات قليلة ولا تقدر تعرف الطريق اللي تبغي تروحله بسهولة.
لو ناوي تروح مبكر شوي انصحك في مركز مول الإمارات على شارع الشيخ زايد، قريب من بوظبي يعني ما تحتاج تدخل في معمة دبي، لكن لا تفكر تروحله بعد المغرب لأنه الازدحام يكون شديد في المواقف.
ومركز ابن بطوطة بعد وايد حلو وعائلي والازدحام فيه اقل.
والمركزين فيهم مجموعة مطاعم متنوعة.
عن المناطق اللي تروحلها في ابوظبي ما اقدر افيدك وانشالله اهل بوظبي يفيدونك.المهم الملخص: التكاسي اسعارها نار الصراحة والاستئجار راح يوفر عليك كثير، دبي فيها مجموعة من المراكز لكن ما انصحك انك تدخل في المعمعة لو ما تحب الازدحام يعني تكتفي بالمراكز اللي على شارع الشيخ زايد والمطاعم اللي على هذا الشارع ايضا.
أبوظبي على ما اظن التسوق فيها مكلف إلى حد ما، يعني وانت مار على دبي خلص التسوق واشتر الهدايا اللي خاطرك فيها. لو تحب اسواق رخيصة مثل الاسواق غير المكيفة تقدر تروح على سوق مرشد والاسواق الممتدة بجانبه لكن لازم تتحمل الرطوبة والحرارة وخاصة انت معاك عائلة يمكن ما يستحملو، لان السوق فيه كل شي من ساعات وعطور ودخون وملابس وبأسعار افضل من اسعار المراكز.
وفي النهاية لا تنسى تشتريلك خريطة حديثة عشان ما تتوه مع انه في دبي لا تحتاج خريطة اللوحات مكفية وموفيه في كل شارع راح تلاقي لوحة تدلك على طريق ابوظبي وأيضا الشارقة اذا حبيت تزورها.
وأيضا ابدا لا تخجل انك تسأل اي شخص عن موقع مكان او اس سؤال يخطر ببالك، الكل انشالله راح يحاول يساعدك ويدلك على مطلبك.
وشكراً