- نقاط :
السلام عليكم ورحمة الله وبركاتة
جديد على الساحة
بما اني جديد بينكم وماادري وش السالفة واي طريقة ابدا ارحب بكم جميعاً .
انا بشنغهاي ومتوهق بقوه . لاني في اليوم الاول نايم واليوم الثاني نايم واليوم الثالث طلع الصبح وانا على النت دخت وين اروح كل الكلام في المنتدى على قوانزو واللي حوله مافيه شي بشنغهاي الامتحف .
مره سويت فاهم وطلعت راح يومي كله شرح . ساعة بالفندق اشرح وش الاماكن اللي ازورها طبعاً شي بالعنقليزي - صاير فلتة باللغة - وشي بالاشارة وهو الاكثر لانه مافية احد يتكلم شي - بس صيني - والساعه ونص الثانية اشرح للتكسي بنص الطريق جلس يسولف ولاادري وش يقول - يتكلم عن مغامرة او عن فلم ماادري - المهم وصلت لشارع تجاري اسمه نانجي شي - شي يعني ؟ - وجلست اتمشى ماادري وين الله حاطني فيه,واول مانزلت من التكسي جوني شلة معاهم بروشورات فيها ساعات وشنط واشياء واجد وكل واحد يقول انا ازين من الثاني - مسوى فاهم وش يقولون - وانا اقول لا شكراً - نو ماابغى ماينفع وهم مقتنعين اني اعرف وش يقولون لانهم مايسكتون كملت طريقي اتمشى وبما ان الشارع طويل وحلو اخذ مني ساعتين وساعتين ثانيه اطلب من بيتزا هت وخلصت على خير فيوم جيت ارجع تذكرت اللي نشبولي في اول السوق قلت احط رجلي من شارع ثاني ولاكن على مين طلعولي هناك !!! والله هالحالة اخذت نفسي ورحت معاهم دخلت بممر حسيت اني ولد الحارة وفتح باب عمارة قلت الله يستر جزمت ودخلت شوي فتح باب قال هذ المعرض اتلفت يمين يسار توكلت على الله ودخلت لقيت شنط وساعات تقليد بس غاليه شوي الشنط ب 300, 500 بس حكي يوم جاء الحساب 100 150 اشتريت شنطه عن الحسوفه وانا ادري انها غالية مقارنه باللى قريته في المنتدى وطلعت بترحيب حار منهم صارو كل مايشوفوني بالشارع يسلمون على واشارات وباي وشغل مالكم بالطويله . سألت نفسي وين اروح ؟؟ توهقت .... طبعاًعامل حسابي ان فيه ساعتين من الوقت راكنها اتفاهم مع راعين التكاسي :112: جتني فكرة اني اروح ل كارفر - مسوي سياحة - وفعلأً رحت للفندق عشان فيه واحد يحكي انقلش للأس مالقيته غير الشفت وخذلك ياشرح كل الاستقبال صفيتهم واحد واحد ياجماعه واحد يفهمني - الصراحة وناسه - بالاخير فهم واحد بعد كم كبير من الاشارات والتوصيف ,وكتب لي بالورقه اسم كارفر وعطيته تاكسي ووصلني طلع مقفل ورجعت للفندق وانا اضحك لاومبسوط.
يعني فيه - اكشن - قلت لنفسي الله الله على الجد خلاص وقت التفلسف والشخمطة راح انا لازم اتصل على مكتب سياحية يعلمني وين اروح وش الاماكن السياحية والمطاعم و . .)
فعلاً اتصلت على مكاتب لقيت ارقامهم على برشورات في الفدق - الاستقبال - وثانين من منتدى ثاني وليتي مااتصلت كل ماكلمنت طلعتلي وحدة او واحد يتكلمون صيني وارجع اقلب السالفه ضحك ووساعة صدر وشرح بس التليفون صعب الشرح فيه .
الاخوان هينا ماقصرو خصصو موضوع مترجمين بس بشنغهاي مافية !!! مع كذا اتصلت بالشباب اللي بقوانزو قالوا مانعرف احد بهالديره .
صرت اطلع اتمشى بالسوبر ماركت اللي مساحتة 4*6 تحت الفندق وفيه حول عمارة تحت الانشاء اتفرج عليهم وهم يشتغلون .
هذي ال 65 ساعة الاولى , اذا فيه احد عنده معلومات عن مترجمين او رحلات سياحية اتمنى الرد والتوجيه .
نقاط :
- المدينة رائعة ونظيفة
- الجو حار ورطوبه
- اللغه انس احد يتكلم معاك غير صيني
- الاسعار رخيصه بالنسبة للسكن , والاكل يعني
- الشعب طيب وخلوق بس نظرات الاستغراب ؟؟
- اسعار التكاسي رخيصة
- فيه شارع مرت عليه اسمه شوجان هوي حلو فيه سينما ومول ضخم وماكدونلز
- شغل الانشاء يكون ليلاً
- وانا متوهق
- فكر اخذ كورس صيني - لا نصبه هذي
لكن أنا مستغرب منك ايش الي حادك تروح من دون مترجم , خذلك مترجم وفك عمرك , حتى لو تجيبه من كوانزو بالطيارة على حسابك وتسكنة وأكل بعد
موفق إن شاءالله