- وفي فوكت سكنت بانتاي بجنب ماكدونالدز وهاجن داز بالباتونج بيتش
- ملاحظ ة:
اقف عاجزا عن شكركم يااعضاء منتدانا الغالي على مساعدتكم لي في تخطيط رحلتي واختيار الفنادق والتعرف على الاماكن السياحيه ابتداء من مشرفنا العزيز الى رتبة مسافر جديد وهالتعاون مو غريب عليكم فقد استفدت سابقا في جميع رحلاتي السابقه وان شاء الله افيد واستفيد
بالنسبه لرحلتي كانت اسبوعين موزعه اسبوع فوكيت واسبوع بانكوك من تاريخ 11-4 الى 27-4
كانت رحله رائعه وحضرنا يوم الماء وكان بتاريخ 13-4 (وبصراحه ضاق صدري قلت الله يعين لو استمر اسبوع عز الله ما طلعنا لو اني قاعد بالرياض اصرف لي بس الحمدلله كان لمدة يوم وانتهى )وكنت بذاك الوقت في فوكت وبصراحه جوها كان حلو غيوم وامطار عكس بانكوك حر موت كرهت نفسي من شدة الحر ما اقدر امشي خطوتين
اول يوم وصلت كنا تعبانين لاننا جينا من الرياض للامارات وقعدنا بها ساعتين بعدين بانكوك وما حبيت اجلس فيها وقعدت 3ساعات بعدين فوكت ولا رحنا شي
ثاني يوم رحت جزيرة فيفي لاند وكانت رحله حلوه فيها سباحه وغوص سعرها 160 ريال للشخص
وثالث يوم كان يوم الماء الله لايعيده بس الحمدلله رحنا بالليل لفانتازي شو وانبسطنا بصراحه ما تتفوت واللي ما يجيها غلطان اخذتها من الفندق 180 ريال للشخص ومن مكاتب السياحه ارخص بعشرين ريال بس كانو مسكرين فاخذتها عن طريق الفندق قلت ماتسوى
رابع يوم كان على شاطئ الباتونج وسبحنا فيه وتمشينا على المحلات اللي فيه وبالليل يفتحون سوق الليل
طبعا كل يوم الساعه 10 ارجع الفندق لان فوكت سياحتها صباحيه ورحلاتهم من بدري
خامس يوم رحت لجزيرة جيمس بوند وكانت خالمناظر اللي فيها خياليه سعرها 140 ريال للشخص
سادس يوم رحت لكارفور والسوق اللي عنده مدري وش اسمه وكان فيه ساحة مطاعم وطلعت منه ورحت لمنتجع لاقونا وبصراحه حلو بس مايستاهل العنوه
سابع يوم والاخير رحت رحله لركوب الفيله وكانت تجربه ممتازه سعرها 150ريال للشخص
طبعا تعشيت في مطاعمهم البحريه يوم وفي مطعم القاهره يوم ثاني ومطعم عربي ثاني نسيت اسمه لو تذكروني
واليوم الثامن سافرت الساعه 12 الظهر لبانكوك وجلست اسبوع طبعا كلها اسواق واللي انسبطت المدام
ماشاء الله عيت لا تخلص اسواقهم مثل ام بي كي وطوكيو اللي بجنبه
والباتونام هذا رخيص
(وسلوم نايت بازار)( وسوق الاحد )هذولي مايستاهلون العنوه
والسوق الصيني اكثر شي يبيعون بالجمله ورخيص يصلح هدايا
وفيه حوله سوق الكترونيات كويس ورخيص بس احس بضاعتهم تخرب بسرعه
ورحت لدريم ورد ليتني مارحت لها حر
ورحت لسفاري وورد كنها اشوى من الملاهي لانها مظلله باشجار
وفي يوم تغديت بالسي فود ماركت الله لا يعيده خذا كل قروشي بس مدري هو نفسه السي فود المعروف والا غيره ولعب علينا راع التاكسي بصراحه جتني فاتوره تشيب الراس ماعمري دفعتها حتى باوروبا .
طبعا رحت لنانا (منطقة العرب)تذكرني بالحسين اللي في مصر
تلاحظون كلامي عن بانكوك غير مرتب لاني من سوق لسوق الا يومين رحنا فيها للحديقه والملاهي وبالليل مافيه الا نانا
طبعا في بانكوك كنت ساكن النوفتيل سيام سكوير مره كويس واشكر من دلني عليه
وفي فوكت سكنت بانتاي بجنب ماكدونالدز وهاجن داز بالباتونج بيتش
ملاحظ ة:
1- تكاسيهم رخيصه والنظام عندهم يشغلون العداد ويفتح على 35 بات يعني 3.5 ريال بعضهم قبل لاتركب يفاصلك(وهم قله) هذا النوع انزل وخله بتلقى غيره يشغل العداد اهم شي لا تسال عن السعر قبل تركب اركب اول وقله المكان وهو من نفسه يشغل العداد واذا ماشغله ذكره
2- بعض التكاسي يقولك ادل المكان واذا ركبت مايدري وين الله حاطه يقعد يدور بك ساعه وهمن يسالك وينه يبيك توصفله واذا ما عرفت يقعد يكلم احد يوصف له وفيها يوصل وفيها ما يوصل وبالنهايه تنزل وتاخذ غيره (صارت لي 4 مرات)
3- اللغه الانجليزيه مايعرفونها تتعب ما فهموا عليك حتى اللي بالفنادق استيعابهم احسه بطيئ كود ما اعيد عشر مرات اللي ابي لين يفهمون
طبعا اي استفسار انا حاضر قبل انسى
ومشكور على تقرير رحلتك .