مشاء الله تبارك الرحمن
وفيتي بوعدك وشفنا التقرير
وكل معلومة حتى لو بسيطة نعتبرها كنز يضاف للموجود
مبروك البيبي ويتربى بعزكم
والله يخلي لك زوجك ويكثر من رحلات عمله
واختيار جدا موفق لواحد من اعرق وأجمل فنادق الريفيرا السويسرية
وفندق رجا الاعمال موفمبيك دايم حركة وخرشة وحلو ليوم واحد مثل حالتكم
متابعين معك الرحلات
ولو سمحتي نبي صور لو ممكن طبعا!

ماشاء الله والحمد لله على السلامه
متابعين

aboaziz
شكرا لك وعلى متابعتك ياعمدتنا والله يخلي لك كل غالي وابشرو بالصور

1. وكنا دايخين نوم قايمين من الساعه 5 الفجر الشاحن حقنا خلاص كان امفضي

مثل ماقلت لكم من قبل رحلتي أستجمام بكل معنى الكلمه يعني مافيها ركوب جبال قمم مابي أي شي يخوفني حد جرب هالشعور وقال مابي اخاف ابي استمتع وبس هاذي انا
يعني اللي يبي يشوف أنشطه ماراح يحصل في موضوعي شي يفيده غير الطبيعه وبس
بعد وصولنا طلعنا من المطار وكنا جوعانين مرينا مكدونالدز تغدينا فيه ويالبيه بس على الاجواء صدق أوحشتني سويسرا المهم طلعنا من مكدونالدز تقريبا على الساعه 5ونص او 6 ماتذكر بالضبط متوجهين إلى مونترو والله لايروايكم الزحمه الهاي وي واقف السيارات ماتمشي الا بالقطاره والحب حقي قعد يقول والله اللي فرق بينها وبين شوارع المانيا في هاللحظه جاتني فكره نطلع من سويسرا ونروح المانيا بعدين تعوذت من ابليس وقلت عادي لانه وقت ذروه والحمدالله ماطلعنا
وصلنا الفندق بدلنا وصلينا وطلعنا على المغرب وهاذي كانت الاجواء

وكنا دايخين نوم قايمين من الساعه 5 الفجر الشاحن حقنا خلاص كان امفضي

يادوب مشينا شوي على البحيره ونمنا بدري وكانت نومه مريحه... قمنا الصبح وزوجي قالي خلينا نتريق في الفندق لان كان يوم سبت قالي اكيد كل شي مسكر وكان خيار موفق وأنصح أي حد يسكن في هالفندق مايفوت الفطور لأنه كان روعه مب بس الاكل ،، القعده بعد كانت رهيبه وخدمتهم حلوه

هالمنظر كان قدام طاولتنا واحنا نتريق في ذمتكم اللي يشوف هالمنظر أشلون مايبتسم وينشرح صدره ... تدرون أقول حق زوجي تدري لأي درجه انا مروقه ومستانسه لدرجه لويجي حد ويسبني ويغلط علي ببتسم وبسلم عليه وأنا اللي بعتذر بعد كنت سكرانه خالصه هههاي
لحد يلومني ياناس أنا في سويسرا كان ودي اصور لكم اكثر بس أستحيت لان كان في ناس ماقدرت اصور
وهذا كان فطوري والكوفي المفضل حقي صدق يصحصح ويروق البال وبقولكم شي عني
انا لما وصلت لعمري اللي أنا فيه الحين عرفت شنو يعني كوفي شنو يعني كيف ومزاج صرت لما اشرب الكوفي مب علشان اصحصح أشربه وانا أستمتع في كل رشفه وتذكرت أمي فديت روحها كانت كله اتقولي لاضاق خاطري شربت قهوه

وبعدها طلعنا على منطقه حلوه نصحنا فيها اللي يشتغل في الفندق
اسمها YVOIRE
وهاذي خريطتها

يعود تاريخها للعصور الوسطى ، تقع على الجانب الفرنسي من بحيرة جنيف (أو ليمان)
لو لاحظتوا على الخريطة تقع في نهاية شبه جزيرة ليمان
اللي تقسم بحيرة جنيف الى البحيرة الصغيرة والبحيرة الكبيرة ،
وموقعها المميز في نهاية شبه الجزيرة تخليكم تشوفون البحيرة بصورة 360 ْ ،
وطبعا موقعها هذا مكنها في العصور القديمة
من احكام قبضتها على بحيرة جنيف وبعد على أحد المداخل الى الألب.
في القرن الرابع عشر تم تحصينها بصورة متقنة دامت لمئات السنين ،
لين القرن السادس عشر يوم سقطت في قبضة بيرن حليفة فرنسا وجنيف ،
واللي نشوفه اليوم هو مجرد مثال بسيط للي كانت عليه .
القرية محاطة بسور وبوابات محصنة
هالمعلومات جبتها من النت
يتبع

الحمد لله على السلامة
وبانتظار باقي التقرير

المنطقه حلوه حلوه حلوه بكل معنى الكلمه انا عشقتها بصراحه شكل المدينه من النوع اللي يحبه قلبي توفقنا في الاختيار .. راح أريحكم من قرقرتي شوي وبتشوفون الحين بس الصور للمدينه (للعلم في كم صورة جبتها من النت)

عشقت كل مكان وطت فيه رجلي معاك

أسم المحل عجبني

وهاذي أختكم أستخفت عليها لولا الحيا والله رحت بستها اتهبل
يتبع

الف مبروك البيبي ويتربى في عزكم ان شاء الله
تقرير حلو ومفيد لنا الصراحه
واصلي متابعين الى الآخر

المنطقه لامست قلبي وحبيتها واستمتعت فيها المنطقه هاذي مشهوره بالورود اذا رحتو بتلاحظون اشلون مزينين مبانيهم بالورد ومحافظين على شكل المدينه القديم وحتى محلاتهم بعد كلها على الطراز القديم

وقلعة يعود تاريخها الى القرن الرابع عشر
واللي يقتصر دورها حاليا في حراسة الشوارع المزينة بالأزهار.
(صورة من النت)

والمنطقه ماتدخلها السيارات المشي بيكون فيها بالاقدام بس وهذا أحلى شي

وهنا احنا خلاص طقنا الجوع طحنا على مطعم روعه انصح فيه اذا بتروحون هناك ... وعلى فكره مطاعم هالمنطقه تشتهر بالاكلات البحريه

هذا أسمه

وهذا المدخل بس أحنا أخترنا نقعد برا لأن الجو كان روعه البرد الحلو

هاذي صورة الجلسه

وهذا كان صحني روزيتو مع ربيان والثاني اللي جنب الربيان مادري شنو ماكلته بس زوجي جربه يقول روعه ويقولي أن شكله خثاق عاد أنا مادري
.. بس للامانه أكلهم كان لذيذ أنصحكم اتجربونه
وبعدين شفت عجوز مع شيبه أطلبو سويت أشتهيته قلت لزوجي أبي نفسه راح وطلب لي

وهاذي صورة ثانيه

أسمحولنا الطاوله حوسه شوي
تخيلو الشايب والعجوز اللي اطلبو هالسويت هو له واحد وهي لها واحد لا وخلصوه مابقى ولاشي منه
مشاءالله عليهم مع انهم كبار في السن تذكرت عجايزنا وشيبانا مساكين محرومين من هالحلويات بسبب السكر غير الامراض الثانيه بعيد الشر عن الجميع
وهم مشاءالله أشوفهم ياكلون السويت مب هم بس كل الشيبان اللي شفتهم في سويسرا كل واحد معاه سويت واسكريم... مشاءالله لاتجيهم عين مني خ وترى يجي معاه شاي أحنا قلنا نبي كوفي وطلبنا واحد بس بينا لانه كبير ويغث وكان روعه

هالمنظر جنب طاولتنا

وهذا المطعم من برا

وهنا واحنا طالعين بنروح للسياره شايفين كيف الخريف بدا هالمنظر عذبني خصوصا أني من عشاق فصل الخريف
ومن حسن حظي اني شفت بداية الخريف وبداية تلون الاشجار

أول ماركبنا السياره الحمدالله طق المطر شنو أستمتعت ياربي على الاجواء وكانت فيروز تغني نحنا وضو القمر جيران تخيلو بس مع فيروز والجو يرد الروح والمناظر هاذي اه ياقلبي تعذبت أبي أرجع

في طريق العوده مرينا على Vevey

أكتفينا أنشوفها بس بالسياره مانزلنا وبعدها رحنا الفندق ريحنا شوي وصلينا وفالليل تمشينا عند بحيرة وجلسنا جلسه حلوه مع الجو البارد والهدوء
وبعدها تعشينا في مطعم القصر الشرقي الايراني مادري اذا قلت أسمه صح او لا!! أكله كان حلو وحتى سعره زين وأستانس علينا صاحب المطعم الايراني قعد يسولف معانا شكله حبنا
وهنا اعذروني أستسمح منكم وان شاءالله بكمل الجزء الثاني خلال الايام الجايه تابعوني

ماشاء الله
ابفواغ قرية جدا جدا رائعة واختياركم للقرية والمطعم ايضا ممتاز
والشيء اللي بجوار الشريمب هو اسكالوبس تستخرج من القواقع وهي جدا غالية الثمن ولذيذة الطع http://www.seattlefishnm.com/images/uploads/Anatomy%20of%20the%20Scallop%281%29.jpgم
ومشهورة جدا القرية بالاكل البحري لانها بالاصل قرية صيادين سمك
وكم كنت اتمنى ان تزورنها بالبوت من منترو مثل ماوضحت بتقريرها
وحتى تتجنبوا زحمة السير اللي مسكتكم
او تجونها من فوق مرورا من ايفيان
صراحة بداية قوية
واصلي
متابعين معكم بكل شوق