1. السلام عليكم أخوي توفيق الصالح


2. 2-بالنسبه للطيران لاتشيل هم لأن الرحله قصيرة. ماتتعدى 4 ساعات .


3. مو شرط تصرف من الصرافين ، أنا كنت اصرف في نوراليا من محل ذهب .


4. 5- التنقل :


5. مافيه ولا 1% مقارنه

السلام عليكم أخوي توفيق الصالح

شوف أنا مثلك قلت أبغى أغير أبغى اروح مكان جديد استكشفه ، وإليك الأجوبه على تساءولاتك
1- بالنسبه لكولمبو فيها فنادق 5 نجوم إطلعت على بعضها أسعارها معقوله ولكن الغرف صغيره شوي ، لاني اخذت فندق اربع نجوم وبصراحة حلو جدا والغرفه واسعه مرره كأنها صاله ، إسم الفندق بصراحة ناسيه لكن اليوم العصر اتصل على خويي يمكن يتذكر اسمه وارد عليك ، سعر الفندق 45 دولار .
كاندي فيها فندق فخم ولكن !! فيه عندهم بسيريلنكا سكن القست هاوس او بيت الزائر ، وهو عباره عن بيت عادي مقسم لعدة اقسام تقدر تستأجر اي قسم بمبلغ زهيد مايتعدى 100 ريال وبنفس الوقت رائع جدا بحيث إنك تحس براحه أكثر من الفندق ، وتحصلها بكل مكان على الطرقات وداخل المدينه ، لذلك انصحك بكاندي خذ قست هاوس ، أما بنتوتا فهي عبارة عن مدينه على الشريط الساحلي الذي يمر بالعديد من المدن غيرها ولكنها تعتبر قريبه من كولمبو، الفنادق على الشريط الساحلي كثيره جدا ، على طول الساحل ، فيها الفخم وفيها العادي تقدر إنك تختار بنفسك في وقتها .

2-بالنسبه للطيران لاتشيل هم لأن الرحله قصيرة. ماتتعدى 4 ساعات .

3- الأكل : في كولمبو فيه مطاعم الفاست فود مثل بيتزاهت وماكدونالدز وكنتاكي أسعارها رخيصه ، في كاندي فيه أيضا مطاعم الفاست فود ، على البحر بصراحة ماادري هل فيه مطاعم شركات ولا لا لكن اخذنا من مطعم الفندق .
عموما أحلى شئ إذا كنتم رايقين هو الطبخ هناك ، حنا اخذنا معنا عدة الطبخ وخدمتنا كثير جدا .
الأكل في بعض المدن مشكلة لأنهم بصراحة لايهتمون بالنظافه لذلك أنصحك خذ عدة الطبخ أحسن .
4- الصرف فيه بالمطار وفيه بالمدن مثل كولمبو وكاندي وكل مكان ، يعني لاتشيل هم .والأسعار متقاربه جدا

مو شرط تصرف من الصرافين ، أنا كنت اصرف في نوراليا من محل ذهب .

5- التنقل :

طبعا حط في بالك من الحين .. مافيه شئ إسمه تاكسي عندهم ، فقط باصات وتكتك ، والتكتك هو الدباب اللي بجنبه كرسي للراكب ، عموما أفضل طريقه هي إنك تستأجر سيارة ميني باص مع السواق ، حنا إستأجرنا عن طريق الفندق سيارة مع السواق بقيمة 700 ريال لمدة 15 يوم وعليه البنزين ، وأهم شئ بالسيارة إنها تكون مكيفه لأن الجو عندهم حار ، لاتستأجر أي سيارة مكيفها تعبان مهما كانت الظروف .
6- المقارنه :
أنت تقول ماليزيا !!!!
مااقول إلا كما قال الشاعر :
أما ترى أن السيف ينقص قدرة إذا قيل أن السيف أمضى من العصى

مافيه ولا 1% مقارنه

باختصار إذا كانت هذي إجازتك السنويه ، لاتتهور وتروح لسريلنكا ، أما إذا كنت فاضي وتقول والله ابشوف سريلنكا ، مافيه مشكله روح .
عموما ، كولمبو ماينجلس فيها الا يوم للراحه ، لانها حر وزحمه ووسخ ، أنصحك مباشرة توجه إلى كاندي واجلس فيها يومين والباقي في نوراليا لأنها هي سحر سريلنكا ( أمطار يوميه وخضره وشلالات وأنهار وضباب ) نوراليا أنصحك إجلس فيها 95% من رحلتك .
على فكرة كاندي هي عاصمه سريلنكا سابقا ، ونوراليا يسمونها إنجلترا الصغرى .
وآسف على الإطاله
إنتهى

الف شكر لك اخوي الغالي ave بكل امانه ردك ( يبرد القلب ) الله يجزاك خير انا قريت ردك على طول اتجهت لاقرب مكتب وحجزت طيران على اندونيسيا بصراحه الواحد ما وده يضيع اجازته على مكان ما يستاهل
مره ثانيه اقولك شكرا من القلب ايها الرائع

طيب خل خط سيرك سيرلانكا واندونيسيا

اخي الكريم
مضيت في سريلانكا الصيف الماضي 12 يوم
وهي من اروع ما يكون من ناحية المناظر الطبيعية.
جميع الفنادق التي سكنتها لم اتصور انني ساراها في بلد مثل سريلانكا فقد كانت اكثر من راقيه
في البداية لازم تعرف ان سريلانكا بلد بدائي جدا يعني لا تتوقع تجد مدينة العاب او غيره (اذا كان معك اطفال).
الاحظ انك من بين المدن الغيت مدينة نوريليا مع انها من اجمل المدن في سريلانكا وتبعد عن كاندي ساعه ونص تقريبا سياره. سكنت فيها بفندقين الاول تي فاكتوري وكان فوق جبل حول مزارع الشاهي والثاني قراند هوتيل. المدينة باردة دائما ضباب اجواء خرافية,,لا تنسى زيارة منتجع نورتون بلينز
كاندي انا رحت لها بعد نهاية المهرجانات حقتهم فماكان فيه فعاليات مميزة,, لكن فندقنا كان اكثر من خيال وهو ايرلس ريجينسي,,لا يفوتك.
كذلك رحنا في قلب سريلانكا لدامبولا وفيها فندق روعه تصميمه على شكل غابه اسمه كاندلاما عادي تلقى قرود في بلكونتك كذلك فيها سفاري فيله وركوب.
بالنسبه لبينتوتا ما رحت لها لاني كنت بمر المالديف, لكن افضل فندق فيها تاج اكزوتيكا.
بالنسبه لكولومبو, يومين تكفيك تسوق واحلى سوفين هم اوديل و ارينا, تلقى فيها ماركات برخص التراب.
بالنسبه للفنادق انا كان ممدوح لي قلاداري وانه عربي واكله عربي..بس ماعجبني وغيرته ورحت لتاج سامودراي وعجبني مره. بس خذ سي فيو.
ان قدرت ممكن اوريك صور

هلا والله
كل مواضيع الساحة القديمة عن سريلانكا
لذلك ممكن تشوف توقيعي اللي تحت فيه موضوعين عن أهم الفنادق وأهم المناطق بسريلانكا
هذا غير بعض المواضيع اللي موضح فيها كل شي عن طريق الاخوة الزملاء

ياجماعة الخير ترى حيرتونا البعض يقول ماتسوى والبعض يمدح (ماليزيا رحنا لها اكثر من مره وهالحين مليانه ولا كانت في الحسبان هذي السنه ) السوءال المهم عن النظافه ومستوى الفنادق والجو ويمكن التنازل عن ملاهي الاطفال ارجو من له خبره الاجابه ويريحنا يانروح يانغير الوجهه :

العفو اخوي توفيق الصالح
أخوي hani لولا إختلاف الآراء لبارت السلع ، أنا شخصيا اتكلم عن وجهة نظري للبلد ، والشباب كذلك ابدو اراءهم .
اقولك مثال :
مصر كل سنه يروح لها الآلاف والطيارات مليانه فل ، وبنفس الوقت تحصل ناس يقولون اقرف مكان رحناله هو مصر .
يعني كل واحد وله جو خاص ومزاج خاص وو
إنتهى

1. اذا نويت فأنصحك بالتالي:

انا شخصياً رحت ماليزيا سنغافورة واندونيسيا مع العائلة. وبعد رحت سيرلانكا السنة الفايتة وبأمانة كانت من افضل الرحلات. عموما الموضوع يعتمد على الشخص ايش يبغى من السفرة ويش هو يدور له.
اذا كنت تدور حضارة واسواق وملاهي وسينما انصحك انسى الموضوع, اما اذا كنت تدور للروقان والتغيير فلا تتأخر. الدولة مره هاديه والسياحه فيها توها في بداياتها.
مميزات سيرلانكا : الهدوء - السعر - الفنادق وقلة العرب واهم واحسن ميزة هم الشعب اللي في حياتي ماشفت اطيب ولا احسن منه. عالم رايقة وعلىرغم الفقر ماتشوف منهم الا كل خير.

اذا نويت فأنصحك بالتالي:

كولومبو : لاتطول فيها يومين في البداية وزيها في نهاية الرحلة, شخصياُ سكنت في ثلاثة فنادق الهيلتون وكولومبو بلازا واخيراُ سيلون كونتيننتال طبعاُ الهيلتون كان من أحسن الفنادق اللي سكنت فيها في كل العالم اللي جيتة. فيها مطاعم مره ممتازة منها مطعم ايطالي خيالي. كولومبو بلازا برضه حلو وراقي وفيه سوق مودرن وصغيرون اما سيلون كونتيننتال فيعتبر منتجع على خفيف بس بعيد شوي من المدينة، الوقت اللي جيت فيه كان وقت بطولة العالم للريجبي وعشان كذا كان الفنادق زحمة شوي.
كاندي فيها احتفال سنوي خيالي بس من سابع المستحيلات تحصل فندق وقتها. نوريليا باردة ورايقة وتغير على الواحد شوي من الحر اللي حن فية. سكنت في فندق اسمة جران هوتيل وكان مرة حلو بس لازم تاخذ غرفة ديلوكس في الجناح الجديد لأن عندهم جناح قديم مو بذاك الزين.
من نوريليا الى بينتوتا حوالي ست ساعات متعبة ومرهقه اذا كانت عايلتك صغيرة حول تشوف لك سيارة سيدان اريح لأن السيارات الكبيرة تجيب الدوخة، الموضوع صعب شوي بس حاول وطبعاُ اهم شي السيارة تكون جديدة ومكيفها يكون عليه الكلام.
بينتوتا وما ادراك مابنتوتا فيها تاج اكزوتيكا وبس، فندق خيالي يستحق تجلس فيه قد ماتقدر فيه مسبح اطفال صغار ممتاز والشاطيْ مره حلو. المطاعم فيه ممتازة ولاتدور على اي مطعم برى الفندق لأنك ماراح تحصل. شخصياُ هذا الفندق يستحق السفر له الحاله.
لمزيد من المعلومات عن الفندق :
http://www.tajhotels.com/Leisure/Taj%20Exotica%2CBENTOTA/default.htm
انا حجزت كل الفنادق من مكتب في سياحي في فندق كولومبو بلازا واسعارة كانت مرة ممتازة.
تمنياتي بالتوفيق....

اخي الفاضل ان كنت من هواة الطبيعة فلن تجد اجمل من سيرلانكا ، ماليزيا لا تسوى شئ من حيث الطبيعة مقارنة بسيرلانكا لا من حيث الشوطئ ، ولا الجبال . وكذلك من حيث لطف الناس وودهم والا حترام اذلي يستبقلك به الناس بمختلف طوائفهم . الأمن من افضل ما يكون . الفنادق تقدر تجد من 10 دولار الى 200 دولار وكلها رائعة ونظيفه وفى غاية الفخامة . الملاهي غير مهمة لأن الأولاد سوف ينبسطون من رحلات السفارى ، وركوب الفيلة ، وا التمع برؤية الحيوانات ,القرود واللعب معها. راح ترتاح من المولات والتسوق وعوار الراس وتوفر دراهمك. هذه الابجابيات.
ا السلبيات الأكل الله يعز النعمة اكبر مشكلة ستواجههك ولكن لن تواجه مشكلة في مدينتى كاندى ، وكولمبو . باقى المدن تقدر تتفق مع طباخ الفندق يسوى لك الى تبي وانا مجرب هذه الشغله ومن ذهب بعدى جربها وكانت ناجحه.
الحياة تنتهى تقريبا في تمام التاسعة مساء فاذ ا كنت تحب السهر فلن تجده هناك .
الطرق لديهم ضيقه جدا فالمشوار الذي يفترض ان يستغرق ساعه ياخذ ثلاث ساعات.
هذه ابرز الملاحظات الايجابية والسلبية ولك الخيار. وعومما انا كنت مثلك متررد في السفر الى هناك وغامرت رغم اعتراض الكثير منهم اهلى والآن والله رعم اننى زرت والأهل الكثير من البلدان الا ان البلد الوحيد الذي ترك انطباع لدى اولادى هو سيرلانكا ويتمنون العودة لها وقضاء وقت اطول . هذا باختصار. شديد.