بسم الله الرحمن الرحيم
السلام عليكم ورحمة الله وبركاته
ياجماعة الخير انا لي فتره راجع من اندونيسيا
ولاحظت تغيرات كثيره من ناحية الاسعار
ومن ناحية أنفس الاندونيسيين المتعاملين
مع السياح العرب وكان التغيير للأسوأ
ابي اذكر لكم بعض الغييرات اللي انا لاحظتها
وليه صنفت هالتغييرات إنها من سلبياتنا
أولاً : الأسعار
ياأخوان لاحظت إرتفاع غير مبرر له بالاسعار
بما يقارب من 40 ريال إلى 120 ريال
وهالارتفاع كان على الفلل والسواقين والخادمات
وحتى المواد الغذائيه متمثله بالبقالة السعوديه
ومايشابهها بالنشاط طيب لو نرجع لسبب هالارتفاع
نبي نحصل السبب هو السياح العرب
كثير من الاخوان تكلمو هنا إن السائح لازم يكاسر
بكل شي ولو مارضى الاول بالسعر المعتاد
اكيد تبي تحصل الثاني او الثالث راح يرضون
علشان غالب السياح سيكون توجههم تخفيض
السعر وماراح يمشي شغلهم بهالارتفاع المفاجئ
بالاسعار مع العلم إن الغالب
من السياح عارف الاسعار
من تقارير الاخوان المفصله
ومن جهة أخرى أحياناً نحصل
سياح عرب يكاسر في السعر
وحالته حاله واذا استفاد من الخدمه المقدمه
له راح وطلع من جيبه 50.000 أو 100.000 ربيه
وقدمها بخشيش
طيب وش استفدت من المكاسر اللي قبل ؟؟؟
وأيضاً وش استفدت من البخشيش
اللي دفعته بعد انتهاء الخدمه المقدمه ؟؟؟
أكيد مافيه اي فائده وهالشي راح يعطي
الاندونيسيين انطباع إن السائح العربي
مايهمه شي اسمه فلوس وراح يكون
هالبخشيش سبب بإرتفاع الاسعار ..!!
أول ياجماعة الخير البخشيش مايتعدى
0-000 ربيه بالسفره الاخيره لاحظت
إن هالمبلغ مايسوي شي ويطلبون زياده
يعني معقوله حتى البخشيش ارتفع سعره !!
بالمختصر المفيد تراا بعضنا يخرب على بعض
والاغلبيه يسوي إنه كريم على حساب غيره
وإذا رجع مره ثانيه لإندونيسيا يتذمر من
إرتفاع الاسعار مع إنه كان من أسباب الارتفاع ..
ثانياً : نفسيات الاندونيسيين
الكثير من الاخوان اللي سبق وسافر لإندونيسيا
اكيد لاحظ إن نفسيات الاندونيسيين واتكلم هنا
عن اللي له احتكاك دائم مع السائح تغيرت للأسوأ
تحصله يقدم لك خدمه أي كلام ونفسيته
على راس خشمه وكإنه هو اللي يبي يعطيك فلوس
سبب هالشي بعض السياح الله يهديهم
تفكيرهم دائماً إن الاندونيسي إذا عطيته فلوس
وبخششته أذله على كيفي أو إني أدلعه على كيفي
أو تحصل بعضهم يستهتر فيه ويضحك اللي حوله
عليه !!
ليه ماتصير علاقتنا فيهم علاقة عمل ولامانع
إن يتخللها بعض الاحترام والموده لكن ماتضيع
هيبة السائح مثل اللي حاصل الآن ..
ياأخوان فيه اشياء كثيره لاحظتها
اشياء تقهر بسبب حميتك ومودتك للعرب
ولاودك يصير هالشي لهم
ابي اقول لكم شي صار في جنغل لاند
اللي ببوقور
كان فيه ياجماعة الخير نوافير بالوسط
وكنت جالس انتظر الشباب يخلصون مغيريين
علشان نمشي وكنت اشوف الاندونيسيين ومزحهم
على بعض لكن هالشي كان يصير بينهم وبصوت
شبه منخفض ..
حتى جاء بعض الشباب العرب هداهم الله
وانواع الازعاج ويسوون حركات يبون يضحكون
العالم عليهم وإنهم خفيفين دم ومن هالقبيل
قسم بالله بهالوقت تمنيت إني مانيب عربي
العالم تناظرهم بإستحقار وهم مازالو على وضعهم
هالشي بالله عليكم مايشوه منظرنا عند
الاندونيسيين ؟؟؟
واكيد مو ضارهم شي لو صار مزحهم على بعض
وبدون هالإزعاج والمسرحيه السيئه اللي هم
قاعدين يسوونها !!!
هالشي لاحظته كثير على السياح العرب
وهالقصه اللي انا ذكرتها واحده من عشرات
القصص اللي رأيتها ..
انا عارف انكم تبون تقولون إني مبالغ بعض الشي
ابي اقول لكم متى تيقنت إن السبب في هالشي
بعض السياح العرب
ياأخوان الغالب منكم راح لبالي من قبل
بالي جزيره سياحيه وتعتبر من أحسن
الجزر السياحيه في العالم
في سفرتي هذي رحت لبالي
ولا لاحظت فيها اي تغيير من التغييرات اللي ذكرتها
سابقاً الاسعار كما كانت في سفراتي السابقة
أنفس الاندونيسيين من أحسن مايكون
ليه ماصار فيها تغيير مثل اللي حصل
في بونشاك وجاكرتا وبوقور ؟؟؟
هذا رأيي الشخصي احتمال فيه الصواب
واحتمال فيه الخطأ ...
شيء في نفسي حبيت افضفض لكم
والعذر منكم على الأطاله
تقبلو تحياتي واحترامي ...