سبحان الله ،، نفس الفترة الي مخطط اروح فيها ونفس المدة كمان ،،
لكني حتى الآن محتار بين استراليا ،، وبريطانيا ،، ونيوزيلاندا ،،
كل التوفيق

للرفع واتمنى يساعدونك الاعضاء

لا تذهب لأوكلاند لعدة أسباب
1 مليانه سعوديين
2 فترتك قصيره وهذا يأثر عليك يبلك مدينه صغيره أزين لك
المعهد زين بس بهالوقت ماينفع لكثرة السعوديين فيه وبغيره وبجميع انحاء اوكلاند
بالتوفيق يالغالي

والله ياخوي ماأقدر أفيدك إلا بخطوط الطيران لأني دجت بمكاتب الرياض ولم أجد أحسن من كاثي باسيفك
من حيث الرخص قيمة التذكرة 6150
(الرياض,هونج كونج,اوكلاند)
ومدة الأنتظار في مطار هونج كونج هو ساعتان
وباتوفيق.....

اوكيه يالغالي
بخصوص اسالتك ولو ان المدة شهر واحد ماتخارج وناخوك ماهب حق قيمة التذكرة لكن شوف يالغالي :
دامك رايح لمدة شهر مايحتاج تفتح حساب هناك خذ معاك بطاقة الصراف السعودية تكفي بالغرض .
بخصوص المعهد ماعرفه حقيقة وان شاء الله الشباب يفيدونك . ومثل ماقالولك الاخوان اوكلاند متروسة سعوديين يعني لاتستبعد ان المعهد مليئ بالسعوديين ايضا .
بخصوص استقبالك عند المطار هذه تعتمد على اتفاقك مع المعهد يعني ان كنت مسجل في معهد لمدة شهر وقايلهم يستقبلونك راح يستقبلونك سواء احد اعضاء المعهد او الهوم ستاي اللي بتجلس عندهم وبعضهم يمسكون ورقة مكتوب عليها اسمك مجرد ماتقرأها رح لمهم . فهذا يعتمد على اتفاقك معاهم من قبل سفرك .
بخصوص ادارة الهجرة مافهمت سؤالك حقيقة يالغالي لكن دامك رايح شهر ففيزتك راح تكون سياحية يعني ماحد لمك مجرد ماتوصل هناك بيختمون على جوازك وادخل واذا سالوك وين بتسكن ان كان معاك ورقة المعهد عطهم وان كان مامعك قلهم فندق وانتهينا .
بخصوص الطقس لاعلم حقيقة ان شاء الله يفيدونك الشباب او بامكانك مخاطبة ادارة المعهد ايضا .
بخصوص المصاريف يالغالي تعتمد على الشخص نفسه لكن ثق ان نيوزيلندا ارخص من بريطانيا واستراليا وامريكا وغيرها بكثير .
بخصوص طيران الكاثي حقيقة انا جربته كان جيد ولكن تأكد بالترانزيت كم راح تجلس في هونغ كونغ اذا مطول خلهم يضبطون لك فندق ،،،،، ولو اني انصح انك تشوف اتحاد للطيران يقولون فيه خطوط ارخص من الصينية والله اعلم يعني لاتستعجل بالحجز الا بعد ماتتأكد .
والله يوفق الجميع ان شاء الله

ونا ادور في احد مواقع المعاهد يالغالي وجدتهم كاتبين اسعار المعيشة تقريبا على شكل جدول بسيط وترجمته لك ووضعت بعض النقاط وان شاء الله يفيدك يالغلا :

طبعا يالغالي فيه نقطة مهمة وهي لمن تكون متفق مع العائلة على أن تكون وجبات الغداء والعشاء عليهم راح تخف عندك الصرفية بالتاكيد لانك ماراح تشتري أكل من الخارج ولكن وجبة الغداء يمكن ماتقدر تاكلها مع العائلة لانك بتكون في المعهد وراح تضطر تاكلها في الخارج .
واذا لم تتفق مع العائلة على الوجبات فالمبلغ اللي راح توفره من خلال هالشي استخدمه بشراء اكل لك من الخارج او بشراء اكل لك وطبخه في البيت .
يعني احسبها انت وشوف اللي يريحك وسوه
والمبلغ اللي ياخذونه العائلة اذا تكفلوا بالوجبات اعتقد انه حوالي 200 او 300 دولار نيوزيلندي لكل شهر والله اعلم والشباب يقدرون يفيدونك بهذه النقطة
وبخصوص المواصلات خذلك كارد مواصلات شهري ولاتناقش ابد .
ان شاء الله اني افدتك وبالتوفيق

والمبلغ اللي ياخذونه العائلة اذا تكفلوا بالوجبات اعتقد انه حوالي 200 او 300 دولار نيوزيلندي لكل شهر
اخوي رشودي
انا راسلت معهد وراسلي قائمة الاسعار كاامله لمدة 4 شهور
بخصوص العائله ارسلو لي سعرها 205 كل اسبوع وليس كل شهر
وضربو 205 في 18 اسبوع طلع الناتج 3690 دورلا
؟؟؟

ايمنكو
هلا بك يالغالي انا قصدت سعر الوجبات وليس سعر العائلة يعني مثال :
هم ياخذون عليك كل اسبوع 200 دولار يعني في الشهر تقريبا 800 دولار هذي اعتقد انها شاملة الوجبات
لكن ان قلت لهم مابي الوجبات على العائلة وتبي تطبخ لنفسك وتشتري اكلك بنفسك راح ينقص المبلغ يعني بدل مثلا مايخذون عليك بالشهر 800 تصير 600 او 500 دولار
فهمت قصدي يالغلا
وبعدين المشكلة وناخوك ان وجبة الغداء راح تأكلها خارج البيت لانك بتكون في المعهد فبتكون دافع قيمة وجبة الغداء للعائلة على الفاضي فانت شوف اللي يعجبك وسوه وبالتوفيق