- السلام عليكم ورحمة الله وبركاته
- 3. المناطق اللي راح تزورونها ؟
- نيويورك لمدة 3 ايام و اورلاندو لمدة 10 ايام ان شاء الله
السلام عليكم ورحمة الله وبركاته
في البداية أحب أشكر كل القائمين على هالمنتدى الجميل اللي بالمواضيع والتقارير الموجودة فيه تفيد جميع الفئات من شباب ورجال ونساء في تعلم الكثير عن السياحة الخارجية من خلال طرح مواضيعهم ومشاكلهم مع الحلول المناسبة لكل اللي واجهوه عشان محد يقع في نفس المشكلة أو ان القارئ يكون فكرة عن الديرة اللي حاب يسافر لها .
انه عن نفسي ما كنت ناوي أسافر أمريكا بس من خلال تصفحي للمواضيع والتقارير إلي تنقل لنا الأماكن الجميلة والطرح المثير والحماسي للتقارير اللي صراحة متعوب عليها واايد وتغري الكل حق المكان بشكل كبير، حبيت إني أشوف بنفسي وأعيش اللي عاشة بعض أعضاء المنتدى خلال زيارته للولايات المتحدة .
انه إن شاء الله راح أسافر بنية شهر العسل ، في البداية قررت إني أروح للسفارة وأقدم حق الفيزا السياحية ، بس البعض نصحني إن أسوي الحجوزات في البداية وبعدين أقدم بشرط أن يكون قبل فتره كافية عشان تجهز الفيزا ، فقمت بعمل بحث عن الفنادق وأسعار التذاكر والحمد لله قدرت احصل على سعر حلو مقارنه بالفترة اللي راح أسافر فيها ، حجزت على طيران KLM وهو الطيران الهولندي وكان سعر التذكرة للشخص 453 دينار يعني 4530 ريال سعودي وكان الحجز في نهاية شهر يونيو ( 6 ) بتاريخ 29/06/2012 والعودة راح تكون بتاريخ 11/07/2012. وحجزت حق الطيران الداخلي على الجت بلو استنادا على بعض النصائح من الأعضاء .
المهم بعد الحجوزات دخلت موقع السفارة ومليت استمارة الفيزا السياحية وهي نموذج 160 ويحتوي على اسأله طويلة نسبيا ومملة والحمد لله كملت النموذج خلال ساعتين تقريبا مع العلم إني جمعت كل الأوراق والمستندات المطلوبة قبل البدء بتعبئة النموذج عرفت اللي احتاجه من خلال قراءتي لبعض المواضع التي تخص الحصول على الفيزا وخبرات المشاركين في هالمواضيع أفادتني بشكل كبير وقمت بطابعة البار كود اللي يطلع بعد الانتهاء من النموذج .
بعد تعبئة النموذج دخلت على موقع السفارة لأخذ موعد للمقابلة لي ولزوجتي في نفس اليوم والوقت ، وكنت متوتر شوي يومها لكن الحمدلله عدت الأمور على خير .
في البداية عن الدخول للسفارة الأمريكية في البحرين يتم تفتيش الأشخاص عبر المرور من جهاز المعادن والجلوس في الاستراحة للانتظار حتى يحين وقت المقابلة ، وبعد الانتظار ما يقارب الربع ساعة في الاستراحة توجهنا إلى داخل السفارة وتحديدا في قسم المقابلات وهناك كان موجود 4 نوافذ ، النافذة الأولى في شخص يتأكد من الأوراق المطلوبة وهي ورقة الموعد وورقة تعبئة نموذج 160 إلي فيها البار كود وجواز السفر وصورة شخصية والأوراق المساندة ( يقصد فيها أوراق البنك ، شهادة الراتب ) وبعد التأكد منها يطلب منك مبلغ الفيزا وهو 53 دينار ( و بداية من تاريخ 13/04/2012 راح يكون 61 دينار ) ويعطيك رصيد ويقولك انتظر لين يتم استدعائك من خلال الرقم الموجود على الرصيد في إحدى النوافذ الباقية، وعند الجلوس كانت النافذة رقم 2 والنافذة رقم 3 اهم اللي يسوون فيهم المقابلات أما النافذة الاخيرة كانت فاضية مافيها احد، والمقابلة تكون عبر الوقوف عند النافذة ويكلمك الموظف من الداخل عبر ميكرفون وسماعات خارجية وطبعا كل الموجودين يسمعون الإسئله الموجهة لك ، وبعد انتظار دام نص ساعة تقريبا سمعت رقمي فتوجهت انه والمدام للنافذة رقم 2 وكانت الموظفة ولله الحمد بشوشة طلبت البصمات و وجهت لنا الاسألة المعتادة وهي :
1. ليش بتروحون أمريكا ؟
شهر عسل
2. الفتره الي راح تقعدون فيها هناك ؟
ما يقارب الاسبوعين
3. المناطق اللي راح تزورونها ؟
نيويورك لمدة 3 ايام و اورلاندو لمدة 10 ايام ان شاء الله
وكانت الموظفة واايد بشوشة وطيبه وتضحك وتسولف بشكل عادي مو كأنها مقابله أو شي مما يريح الشخص ومايخليه متوتر وعلى اعصابة ، بعد المقابلة قالت لي الفيزا حقت المدام راح تجهز خلال يومين لكن أنت راح أتطول شوي على ما نكمل الإجراءات وهي إجراءات بسيطة نسويها عند التقديم للفيزا ، فسألتها طيب ليش الإجراءات هاذي ما راح تسوينها حق المدام بس انه ، فكان ردها مقنع بالنسبة لي وهو إن زوجتك راح تسافر على نفقتك أنت و من خلال كشف البنك وحجز الطيران معناته إن أمورها كافيه بس أنت لازم نسوي تدقيق شوي على المعلومات اللي مقدمها لنا وهاي اهي اللي راح تأخذ وقت ، جافتني تضايقت من الموضوع طمأنتني و قالت لا تخاف الأمور هاذي عاديه ومجرد روتين ، وراح أقولك شي قلت لها تفضلي قالت لي وهي مبتسمة 3 أيام في نيويورك ما تكفي زودها شوي عشان تستانسون أكثر هناك ، وكلامها الأخير طمني واايد لان حسيت إن الموضوع منتهي ولكن مجرد أعمال روتينيه وخلاص .
هاي اللي صار معاي وأتمنى إني قدرت أفيدكم ولو بالقليل
سامحوني على الإطالة .
أخوكم الوحيد
