- بسم الله الرحمن الرحيم ،،،
- أوكل لى صديقى الصدوق مهمة ترتيب الرحلة كونى طبعا الامير
- طبعا تسالونى ليش اخترت هذا الفندق ؟
- بجاوبكم واقول لأنى شفته أطول مبنى فى مانيلا ( ما كل ما يلمع ذهب ).
بسم الله الرحمن الرحيم ،،،
اخوتى الاعزاء اعضاء المنتدى هذه أول مشاركة لى فى المنتدى وارجو أن اوفق فى ما اقدمه حول العاصمه الفلبينية مانيلا وجزيرة بروكاى وجزيرة سيبو .
طبعا سفرتى قديمه وتعود لصيف عام 2008 إلا أنى احببت نقل تجربتى وملاحظاتى للاستفادة ، حيث قررت السفر مع صديقى الصدوق للفلبين لاكتشاف هذا البلد وجزره بعد ما ملينا وزهقنا من أرض التاى وقبل السفر كان لابد من التحضير وجمع المعلومات حول هذ البلد عن طريق المنتديات المختلفة ومواقع حجوزات الفنادق ( لاتغركم الصور بالمواقع ترا ما يطيح إلا الشاطر ).
أوكل لى صديقى الصدوق مهمة ترتيب الرحلة كونى طبعا الامير
وتوجهت لأحد مكاتب السفريات بمنطقتى وصاحبه صديقى من الجنسية الهندية ( صرت له وسيط طبعا مو وسيط اسهم الله يبعدنا عنها:112: إنما وسيط فى جلب الزباين له بس بدون عمولة واحلف على ذلك صدقونى .
المهم انى عطيت صاحبنا الهندى البرنامج المطلوب وتاريخ السفر والجزر المراد زيارتها وتاريخ العودة ، سالنى صاحب مكتب السفريات عندك اسماء فنادق معينة تبي تسكنها قلت له نعم عندى اسم فندق بمانيلا والجزر عليك ( والطماط علينا ) ههه ،
عطيته اسم الفندق بمنطقة مكاتى الراقية فى مانيلا وبعد اسبوع اتصل علي صديقى الهندى وقال لي جهز الشنطة ترا الحجوزات جاهزة قلت الله يبشرك بالخير .
اقلع بنا الطائر الميمون ( الاتحاد) من مطار ابوظبي صباحا على ما اذكر الساعه عشرة تقريبا لأنى ما أحب طيران الليل وخصوصا المتأخر ترا النوم سلطان وأخاف أنام على عربانة الشنط .
وصلنا اجواء العاصمه مانيلا حوالى الساعه 10 ليلا وكانت الامطار تهطل بغزارة ونشوفها على شاشة التلفزيون وبمجرد هبوط الطائرة صفق الركاب الفلبينيون للكابتن على شو ؟ ما ادرى ، يمكن شاطر بالهبوط ولا هو فلبينى .
بعد استلام الحقائب وعند الجمارك وقفتنا موظفة الجمارك وقالت عندكم ( رايس ) يعنى ( عيش ) يعنى ( رز ) قلنا لها احنا جايين سياحة مو تجار رز ضحكت وعدتنا وترا الجماعة بالمطار معاملتهم طيبة ومحترمين وما عندهم بهدلة للعالم مثل بعض الدول اللى بالى بالك .
عند باب المطار قلبنا عيونا ندور اسم الامير اللى هو انا بين عشرات اللوحات اللى شايلنها مندوبين الفنادق والشركات .
بعد 45 دقيقة تقريبا وصلنا الفندق اللى انا اخترته عن طريق النت
وكانت الصدمة لوبى صغير 4م * 4م وكاونتر استقبال 1م * 1م وثريا بالسقف تشتغل فيها لمبه وحدة :frown:
طبعا تسالونى ليش اخترت هذا الفندق ؟
بجاوبكم واقول لأنى شفته أطول مبنى فى مانيلا ( ما كل ما يلمع ذهب ).
المهم اخذنا حامل الحقائب ونحن فى حالة صدمة للاصانسير 1م * 1م على غرفتنا وكانت الصدمة الثانية غرفة فيها تلفزين 10 بوصة :112: سريرين خشب ( بلايود ) مصنوعنين عند نجار الحارة :112: ومكيف ويندو ربع طن :112:
صديقى الصدوق يطالعنى بنظرات الغضب وكنت خايف لا ياخذ كرسي الامارة عنى
وبهمة الامير القائد قلت له قم خلنا نطلع نتعشا ونشوف صرفة لهذه الورطة .
وطلع الصباح وسكت شهريار عن الكلام المباح ، ونكمل بكره انشالله ،،،
