- بالنسبه للجو وايد حلو. بس الحمدلله اخر يومين بس كان شوية حر بالنهار.
السلام وعليكم. تحياتي للجميع. وشكرا عالمعلومات اللي اخذتها منكم قبل السفر بصراحه كانت وايد مفيده. انا سافرت بتاريخ 25/7/2005 وردينا بتاريخ 1/9/2005 وكانت رحله علاجيه للوالده. بصراحه انا بقول اهم النقاط مادري اذا تفيد او لاء بس تنفع تكون رأي شخصي عالأقل.
قبل السفر كنت اخترت فندق ثيستل ماربل ارش للسكن فيه بعد اقتراحات الخبراء. وكنت طلبت من الاستقبال يبعدنا كثر مايقدر عن الغرف المطله عالشارع بصراحه مااقدر انام على اصوات ازعاج شرطتهم واسعافهم ومطافيهم ولوية السوق وهالناس. مشالله الفندق موقعه ممتاز وحلو بس يعيبه مافيه لوبي.
وبعد اول 5 ليالي اقمناها في الفندق كنا شايفين لنا شقه استديو قريبه يم فندق هيلتون ميتروبول وكانت وايد حلوه ويعيبها انها مطله على شارع الاجور المزعج وكنت اخاف ماالقى شقه نظيفه وخاصه بهالشارع بس صراحه كانت شقه اكثر من ممتازه. وحق شخصين مو اكثر.
احنا كنا شخصين انا والوالده يعني خلال اول اسبوعين ملينا وزاد الملل انك بلندن ومرتبط مع الطبيب وماتقدر تطلع برا لندن شويه. بس انتهزنا يوم الاحد كان ماكو موعد طبيب لنا فرحنا برايتون هذي بصراحه منطقه انا رحت لها قبل والوالده كان بودها تطلع شوي عن زحمة لندن. فرحنا برايتون عن طريق محطة فكتوريا واهي منطقه ساحليه ارتحنا شويه فيها وقعدنا يوم واحد بس وردينا لندن بالليل.
بالنسبه للجو وايد حلو. بس الحمدلله اخر يومين بس كان شوية حر بالنهار.
قبل موعد العوده فكرنا بقضاء الايام الباقيه في فندق الكمبيرلاند وحجزناه من اهناك بتاريخ 27/8/2005 الي 1/9/2005 واخذته بسعر 120 باوند عن الليله وكان فندق وايد حلو خاصه انه يديد واللوبي فيه كبير مقارنه مع ثيستل ماربل ارش مافيه لوبي الواحد يقعد فيه وغرف الكمبرلاند كبيره اما ثيستل فصغيره.
الديره غاليه ومعروف للجميع.. لاجديد بهالشي.
ومهما الواحد يسافر يشتاق لديرته. لو سياحه 12 يوم مع الطيران وانته اللي راد ديرتك اعتقد انها كافيه وايد حق لندن.
ولندن بالذات مافيها شي.الا اذا الخبراء عندهم مناطق الواحد يستانس فيها . بس بالنسبه للي يروح علاج ماله الا الهايد بارك . والاجور. وانشالله محد يروح علاج.
وسامحوني عالتقصير. وشكرا توفي على معلوماتج عن فندق ثيستل ماربل ارش كان حلو. بس جربي الكمبرلاند وراح انشالله يعجبج خاصه ان ماكو فرق بالموقع.
- هذي اول مره اكتب واشارك فيها بموضوع يديد فسامحوني ان مااجزت التعبير او تعمدت الاطاله.
وشكرا للجميع.
والحمد لله على سلامتك
سلامات الوالده وماتشوف شر
مشكور
تحياتي