1. صحينا الصباح على صوت المطر ...


2. وقررت من بكرة ان شاء الله أوديهم على مكان أثري

قررت آخذ عائلتي لرحلة بالسيارة لمنطقة الباحة
فوسعوا صدوركم لسوالفي الكثيرة
الرحلة كانت خمس ايام
جهزت السيارة بكل المستلزمات وتوكلنا على الله ومشينا وكانت المرة الأولى اللي يرحون فيها الأهل للباحة
وصلنا وأخذنا لنا شقة رائعة في وسط المدينة اسمها ذي كادي وسيعة وكان اسعارها نوعا ما معقولة وريحنا بعد مشوار طويل من الرياض

صحينا الصباح على صوت المطر ...

المهم أفطرنا وطلعنا رحنا نتجول في المدينة وضواحيها وكانت الشوارع مو فاضية عادي تقول ما كان فيه مطر .. متعودين ما شاء الله عليهم.. طبعا ما انسى شيء مهم خلالالالالاص ماعاد فيه مكيف شغال في السيارة فكوا الشبابيك واستمتعوا .. المهم قررنا نروح منتزة غابة رغدان كان وقتها لسه فيه مطر ولما قربنا على المنتزه ما صدقوا ان هذه المنطقة فعلاً عندنا
دخلنا الغابة ... والله جنة الله في أرضه سبحان الخالق
تحت المطر وشوية ضباب منظر ما أنساه بحياتي .. قعدنا نتمشى شوي في الغابة ونشوف هالطبيعة اللي سبحان من خلقها وابدعها
ما قدرنا نقعد بالارض الدنيا مطر قلت خل اوديهم متحف ورحنا على متحف الباحة الاقليمي للآثار والتراث وانبسطنا فيه كثير تعرفنا على المنطقة وتراثها
بعدها طلعنا نشوف لنا مطعم نتغدى فيه ورحنا على مطعم اسطنبول وتغدينا الحمدلله وهو مطعم حلو وشغلهم نظيف
بعدها رجعنا على الشقه شوي نرتاح وطلعنا بعد العصر رحنا على حديقة وملاهي الشفا وقضينا يومنا كله فيه وبعدها رجعنا على الشقة والملاهي هذي جاية على شكل حديقة مرتبة وفيها العاب للاطفال وكذا..
طبعا مع الجو الحلو خلاص اي مكان تفكر تروحه انت مبسوط.. وش تبي ماء وخضرة ووجه حسن

وقررت من بكرة ان شاء الله أوديهم على مكان أثري

صحينا الصباح وأفطرنا وبعدها طلعنا واخترت قرية ذي العين الأثرية طبعاً هي طبعا لها طريق عقبة اسمها عقبة الباحة وتنزل فيها على تهامة المشوار حق العقبة ياخذ له نص ساعه كذا
حسبت حسابي واستعديت اشتريت ماء وبعض الأغراض وطبعاً في اي رحلة اروح لها اخذ معاي بعض الأدوات مثل حبل طويل جداً وعدة سيارة وبساط وشنطة اسعافات اولية لا قدر الله وجالون ماء كبير للشرب وقررت اننا نتغدى فيها فاخذت معاي عدة الطبخ
توكلت على الله وانطلقت وانا في السياره قعدت اقول للأهل معلومات عن قرية ذي العين انه هذه القرية تميزت بالقصور والمباني المميزة اللي فوق الجبل اللي على شكل هندسي وفيها عين جارية على مدار السنة
وصلنا للقرية واخترنا لنا مكان هادئ وحلو اننا نوقف فيه السيارة ونجلس فيه
وأخذت امشي فيهم واعرفهم ونشوف المناظر واندهشوا من القرية والمباني العجييبة اللي فيها وبعدها بسطنا بساطنا وسوينا الغدا وكان من أجمل الأكلات في حياتي، طبعا للمعلومية هيئة السياحة جالسة تشتغل في القرية وكان فيه حارس هناك يقول انها لس ما خلصت وباين عليهم شغالين شغل كبير عليها لكن قلت له ما بنطول بس ناخذ لفة فيها فوافق.
ورجعنا بعد المغرب كذا ورحنا على الشقة ريحنا وبعد العشا طلعنا نشوف لنا مطعم ورحنا على مطعم الف ليله وليله وتعشينا الحمدلله وبعدها قعدنا نتمشى في شوارع الباحة العامة ونتفرج على معالم المنطقة ونكتشف جمالها كان الجو بصراحة مغري جدا وبعدها مرينا على مجمع تجاري اسمه الغنيم مول.. فيه ماركات وكذا وفيه بندة هايبرماركت قضينا لنا اشياء ناقصة وتسوقنا شوي ورجعنا عالشقة قلنا ننام بدري لان الصباح ما يتفوت والليل الجو يكون بارد.
صباح اليوم الثالث طلعنا نفطر واخترنا نفطر على شفا مطل على عقبة الباحة وتعتبر في جزء اعتقد من غابة رغدان المهم منظر خرافي.. بعد ما افطرنا كنا مقررين نروح لمنتزه القمع وهذا موجود بعد محاظفة بلجرشي تقريبا عنا باربعين كسلو او اكثر شوي بس طبعا المسافة لانها كلها بين قرى وبيوت وخضار غير منطقع ما تحس بالطريق وهالمنتزه فيه تلفريك اسمه تلفريك اثرب منسوب للمنطقة اللي فيها..
طبعا وصلنا للقمع والمنتزه كبير وفيه كل الخدمات تقريبا ومناظهر وجلساته رائعة والدبابات والبليلة والمطاعم وكل شيء وناس اللي بيع عسل واللي يسوون اكلات شعبية اقولكم بصراحة منتزه قمة في الروعة.. اخذنا لنا مكان يعجبكم بين الشجر وحطينا جلستنا ويلا كل واحد يسوي اللي يبيه.. سوالف ليل ونهار وشاي عالحطب ومحمد عبده يقول ترا في الجو غيم..
وعلى الظهر كذا بدينا طلعنا عدة الشوي وجبنا دجاجاتنا والرز والتبهيرة اللي يحبها قلبكم وحطينا الفحم وسوينا لنا ذاك الغدا مع ذاك النسيم اللي زي ما يكون نسيم الصباح.. والاغنية ماتزال معانا واتقلب على جمر الغلالالالا اتقلب... واتقلب..
ويلا على العصر قمنا وعلى التلفريك ، بصراحة منطقة التلفريك مافيها جمال ويخوف بس قلنا تجربة وحلوة بشكل عام. المهم كانت جلستنا ممتعة جلسنا الين قبل المغرب وبعدين مشينا..
طبعا اقولكم ملاحظة بالنسبة للقمع ضروري قبل ما تروحون تاخذون معكم كل شيء المكسرات والشاي وكلش لانه بعيد عن المدينة شوي فجهزوا حالكم زين وخذوا معكم شطرنج والا ورق لعب عشان تفلونها
طبعا انتهى هذا اليوم واليوم اللي بعده .. حسب ماني مقرر قلت بنروح المخواة.. لان سمعت عن جبل اسمه جبل شدا الأعلى لان فيه جبل شدا الاسفل طبعا هذا الجبل طريقه طريق المخواة اللي منها رحنا لقرية ذي عين بس القرية قريبة اسفل العقبة لكن هذي تروح للمخواة محافظة مو بعيدة يعني المهم المنظر من فوق قمة الجبل شيء خيالي وصلنا الجبل وطلعنا عند القمة طبعاً منظر الأودية من فوق الجبل شيء خيالي ورب البيت فيه في القمة رموز أثرية مثل مصلى ابراهيم بن ادهم وبرضوا في قمة الجبل اشجار البن اللي تصدر افضل انواع القهوة العربية الأصيلة قضينا وقت حلو فوق الجبل وبعدها نزلنا بعدها طلعنا على سوق الثلاثاء طبعا هذا السوق شعبي رحنا نشوف ايش المنتجات والمعروضات الشعبية فيه وبصراحة كان ممتع اشترينا منه اشياء قديمة وغريبة وحلوة وراح اغلب الوقت نسأل عن الأشياء الموجوده في ايش تستخدم
بعدها رجعنا على الباحة ورحنا على مطعم الرياض وتغدينا فيه مندي وكان المطعم أكله لذيذ ورجعنا على الشقة وارتحنا شوي وبعدين طلعنا على قرية رغدان يالله على الطبيعة في المنطقة والله شيء خرافي أخنا واحنا رايحيين قهوة وعصير ومكسرات واهم شيء الفصفص بسطنا البساط وتقهوينا هناك بعدها رجعنا على الشقة نرتاح
صباح اليوم اللي بعده هو اخر يوم لنا طلعنا شمال الباحة على بني سار وشفنا منازل بن رقوش المشهورة وشفنا الآثار المتبقية من المنازل والتفاصيل المعمارية فيها بصراحة كانت مميزة بعدها طلعنا لمنتزه غابة شهبه المنتزه فيه ملاهي وجلسات حلوة وبصراحة متوفره فيه خدمات مطاعم واسواق والشيء المميز في هذه الغابة واللي يلفت الانتباه جامعة الباحة للعلوم اللي موجوده في قمة الغابة والغابة فيها اشجار كثيرة من العرعر والصنوبر جلسنا هناك جلسة حلوة تغدينا في احد المطاعم ودخلنا سوبر ماركت واخنا احتياجنا علشان خط الرجعه لانه احنا سلمنا الشقة وخلاص وبعد العصر كذا سمينا بالله ومشين راجعين لديرتنا
انبسطنا كثير وانبسطوا الأهل
المهم وصلنا بيتنا الحمدلله وجلست اكتب لكم هذه الرحلة وان شاءا لله تنبسطون مع الصور وانصح الي ماراح يروح والله ماراح يندم
نشوفكم برحلة ثانية ان شاء الله وحيّاكم الله مع الصور في الباحة
هذي قبب منتجع الحكير السياحي
البيوت القديمة
محافظة المندق
شوفوا الطبيعة والمنظر
الغنيم مول ههه
الشقق اللي سكنا فيها
هذي قبب منتجع الحكير
من غابة رغدان
التلفريك
غروب الشمس في الباحة
عقبة صغيرة
شوفو الضباب كيف .. روعة
عقبة الباحة
منتزه غابة جدر
بياعين العسل
قوس قزح في أول يوم
طبيعة ولا أحلى
جبل شدا السفلي
عين ذي العين
قرية ذي العين
سوق الثلاثاء