في اي فندق سكنت في شرم الشيخ
وكيف مستواه

يعطيك الله الف عافية يا عضونا الغالي على هذا التقرير الرائع

يعطيك الف عافية بس لو تكملها بصورر
والشقه صراحه اهنيك عليها ب 250 وعلى النيل
ننتظر التكمله بفارغ الصبر

الله يعطيك العافية ورحلة سعيدة إن شاءالله .

والله انك صادق شركة خايسة ومستوة متدني جدا سيى واذا منتبهت على اغراضك وشناطك تنسرف بس باص سوبر جت ممتاز جدا

الاخوة بوينغ دبلوماسي البنتشينو عاشق الطبيعة خالد العاشق المسافر اشكركم على المرور
اما الفندق الي نزلنا فيه بشرم الشيخ فكان منتجع وسبا جراند روتانا وكانت الغرفة على البحر مباشرة لا وازيدك البلكونة على زحاليق المسبح فكان فندق بالنسبة لي اكثر من رائع فخم جديد الغرف كبيرة مسبح كبير مطاعم كثيرة مواصلات بمعدل ثلاث مرات في اليوم الى خليج نعمة مسبح للاطفال مع نادي خاص للاطفال وسبا عالمي للتدليك والالاسترخاء والدلع واستخدام العلاج الطيني والفندق كبير جداً وهو عبارة عن مباني او وحدات منفصلة منها ما هو على البحر مباشرة ومنها ما هو في الخلف ويوجد فلل خاصة اما اجرة السكن فعن طريق الفندق الغرفة المزدوجة لليلة تكلف 570 جنيه بالفطور ومطلة على البحر اما نحن فلم ناخذ الغرفة عن طريق الفندق ولكن عن طريق شركة سياحية كانت تكلفة الاسبوع للغرفة الواحد تقريبا ما يعادل 800 ريال والفطور اه على الفطور ممتاز جدا بالمختصر منتجع ممتاز واكثر هذا بالنسبة لي
اما الصور يالبتشينو فاخوك ما يعرف يصور صورت كم صورة بالجوال وما عندك احد لاجل كذا انا اتكلم اكثر من اللازم لاجل اعوض عن الصور
انا اتكلمت كثير عن المنتجع قبل ما اكمل لكم مغامرة القاهرة والتكملة قريب جدا
تحياتي
انا

1. مغامرات القاهرة الجزء الثاني


2. نكمل

مغامرات القاهرة الجزء الثاني

بعد التعب الى تعبناه مثل ما قلت لكم نمنا نوم مثل القتيل صحينا من النوم فطرنا طبعا فول بالكمون والزيت والحامض والزلطة ومعاه شوية فلفل وكل هذا بعده كباية شاهي كشري بحكم اننا في مصر ....... بعد الفطور تناقشنا في موضوع زيارة بعض الاصحاب الى نعتبرهم كلنا انهم اهل اكثر من اصحاب في القاهرة وضواحيها فقلنا نبدأ بزيارة اخ عزيز علينا في حلوان حلوان مسكينة حلوان المهم كان في النوتة الى اعطانا اياها ابو محيي ارقام سواقين وكان فية موجود ركمندد على سواق قلنا نتصل على السواق هذا ونشوف......ترن ترن ...ترن ترن الو ابواحمد ايوة معاك قلنا له نبغى سواق ومن هذا الكلام قال انا حاضر ومستعد طيب بكم وايش السيارة قال السيارة جيب باجيرو 98 قلنا حلو طيب بكم وبكم وبكم في الاخير اتفقنا على 150 جنيه في اليوم والحساب يومي قال تم قلنا هيا تعال نبدأ من الان نص يوم لان الوقت بعد الظهر قال تم فين العنوان وصفنا له العنوان وصل اتصل نزلنا ركبنا الجيب السيارة نظيفة مقارنة مع السيارات هناك قال على فين العزم ان شاء الله قلنا الى حلوان ابو احمد عن طريق الاتوستراد اتجهنا الى حلوان وتقابلك مصانع الاسمنت على ما اعتقد والغبار والهباب الخارج منها وكله يروح على حلوان وصلنا عن حبيبنا واتغدينا وانبسطنا قلنا نبغى نروح عند زميل ثاني في حلوان طالما اننا فيها هيا يابو احمد ودينا وصلنا عند خوينا الثاني واحلف لا تحلف ما فكنا الا بعد العشا وبعده بسبوسة كمان رهيبة شغل بيت عاد المهم ما خرجنا الا تقريباً الساعة 11 ليلاً ابو احمد باين عليه :112: واحنا ولا كاننا شايفين شي رجعنا القاهرة عن طريق كورنيش السلام اعتقد قلنا طالما اننا وصلنا جنب البيت في المعادي قلنا للسائق خلاص وقفنا عند الكورنيش وانت اتوكل على الله حاسبناه على نص يوم وانا حزني الراجل وزدته شوي المهم اتصلنا على ابو محيي نبغى نركب المركب على النيل ما رد شكله نايم المهم قلنا نخليها تمشية على قول الجاوة جالن كاكي يعني نمشي على الكورنيش مشياً على الاقدام ................انا عارف والله كلامي كثير بس انا كذا ما اعرف اختصر اتحملوني............ لقينا محل عصير عليه حركة اخذنا عصير منجا ومشكل ورجعنا للبيت :::ملاحظة في مصر وخاصة محلات العصير لا تشترون الا من محلات عليها سحب على قول اخواننا المصرين حتى تضمن انه جديد.
نسيت اقولكم زميلنا وحبيبنا الاخ المصري الي في حلوان ما شاء الله عليه هو تاجر اسمنت وكان عنده شقة في مدينة الرحاب بالقاهرة وكانت فاضية يوم عرف اننا ساكنين في شقة مفروشة ركبه جني وحلف ايمان مغلضة اننا ننقل على بيته في مدينة الرحاب وبالقوة وبالمروة انفكينا منه بش على شرط منه اننا نخلص الخمس ايام الي اتفقنا عليها مع ابو محيي في شقة المعادي وانكمل البقية في بيته في الرحاب وكمان قلنا له الرحاب شوي بعيدة واحنا نبغى نلف وننبسط في القاهرة وزي كذا المهم وافقنا بعد الحاح منه والرجال من ثاني يوم جهز ونظف الشقة وجانا واعطانا المفتاح واتوكل على الله """ والله مصر فيها رياجيل وبقوة كمان""" عمار يا مصر

نكمل

رجعنا البيت وانا نمت والباقين ما ادري عنهم الا في اليوم الثاني في الصباح اصلا من قبل ما اغسل وجهي عملت الو على ابو احمد فينك لا يكون نايم قال لا م نايم قلت يالله همتك معانا وتعال في اسرع وقت ورانا مشوار قال حاضر :: ساعة وابو احمد يعمل رنة تلفون يعني انا تحت منتظر تسالوني فين الخدامة برضه اعطيناها اجازة اليوم لاننا بنروح لبنها عارفين بنها بس ما قلنا لابو احمد
نزلنا وركبنا الجيب والله رهيب الجيب هذا حتى فيه علامة نسر كاننا ضباط وكاشخين على الاخر
المهم ما فطرنا قال على فين العزم ان شاء الله قلنا على بنها يا عم الراجل قال اتوكلنا على الله واحد فينا ابو احمد فطرت قال الحمد لله قال له طيب حنا ما فطرنا والا خوينا الثاني شاف محل فول متنقل عربية فول يعني قال بس وقف وقف """ ترى احنا نقدر الفول ونعزة"" وقفنا وكان عليه لمة مصارية اخذنا ساندويتشات فول وكانت رائعة المذاق اهم شي الحامض في الفول والكمون اخذنا 5 ساندويتشات اعتقد بثلاثة جنيه والا خمسة ما ادري لانه مو انا الي حاسبت المهم""" انا حاسس اني مصختها معاكم كاني احكي قصة حياتي""" سامحوني..
وصلنا بنها ارض العسل زرنا حبيبنا الثاني واحنا خارجين اعطانا جالون عسل يحبه قلبكم"" ما ابغى اكثر في موضوع الزيارة"""بس انبسطنا الصراحة ولفلفنا في بنها شوي ورجعنا على العصر الى القاهرة فين نروح فين نروح والا جاني اتصال من اخوي من السعودية يسأل عننا وعن الاخبار وقال ابغاك تجيب لي دوى من العطارين من مصر لانه مو موجود في السعودية طيب ايش تبغى امر تدلل قال ابغاك تجيب بذور زهرة اللوتس وبذر العرعر وشي ثالث نسيت اسمه والله ما ادري المهم وين نلقى يابو احمد عطار عنده هذه قال احنا قريبين من اشهر عطار في مصر اسمه حراز اسمه ايش اسمه حراز طيب قلنا يالله نروح وفعلا دقيقة والا احنا عند الدكتور حراز دخلت للمحل والا اشكال والوان من الاعشاب وفيه مكتب فوق يطل على المحل كله قلت ايش هذا يابو احمد قال هذا دكتور تقول له ايش فيك من عله يوصف لك اعشاب يعني طب شعبي والراجل الي كان فوق هذا شباب مو شايب وكان مودرن ببدلة وعنده مرضى منتظرين الدور قلت للعطار في المحل ابغى الاشياء الي وصاني بها اخوي وخطرت في بالي جوزة الطيب قلت ماهي متوفرة عندنا خليني اشتريها كمان لاجل الطبخ تعطي للطبخ نكهة حلوة"" يموتون فيها الجاوة""" بس كان حراز هذا فعلا محل رهيب قلت لاخوياي احد به عله يبغى يتعالج ترى فيه طبيب اعشاب بالمحل ما احد رد عرفت ان الكلام مو مناسبهم والا انا فيا لقافة ابغى اروح اشوف هذا الدكتور بس ما طلعت اعتقد ان محل هذا العطار جهة قصر عابدين والله اعلم وترى هو شيخ العطارين بالقاهرة
طيب وين نروح قلنا طالما اننا جنب عابدين خلينا نروح نزوره ويا خسارة كان مقفل لانه يقفل في وقت انتهاء الدوام الساعة 2.30 ظهراً وهذه من مساوئ الاوقات المخصصة لزيارة الاماكن السياحة وخاصة التاريخية مثل القلعة والمتحف الحربي وحتى المتحف القومي في التحرير لان وقتها يكون من الصباح الى بعد الظهر واكثر السواح رقود ولا يقومون الا بعد كل ظهر والا ايش رايكم طيب ليش ما يمددون وقت الدخول حتى يستقطبون اكبر عدد من السواح .
المهم طرت على بالي اننا ندخل السينما قلت وايش رايكم قالو ما عندنا مانع يابو احمد نبغى سينما نظيفة ومو زحمة هذا الكلام واحنا نلف بالسيارة وكنا وصلنا شارع صلاح سالم في مدينة نصر قال سينما طيبة مول كويسة قلنا تم ودينا عليها ومن حسن حظنا اننا وصلنا قبل عرض الساعة سبعة ايش نختار فلم اخترنا فلم عودة الندلة بطولة عبلة كامل لان فلم عمارة يعقوبيان كان مرة مزحوم ونحن ما نحب الزحمة بس كان الفلم مرة رهيب ويضحك وكان سعر تذكرة الدخول 10 جنيه في الوسط اتفرجناوانبسطنا وضحكنا وبعد الفلم اخذنا لفة في طيبة مول وكان شبه هادي ولا فيه زحام قلنا يالله فرصة نعمل شوبنق ترى طيبة مول صغير نوعا ما المهم لفت انتباهي محل للجزم اعزكم الله والشنط اسمه فورتين 14 كان عامل عروض مرة رهيبة شنط نسائي على 15 و20و25 جنيه والجزم مثلها وكان جلد يعني اسعار انا شفتها رهيبة اتبضعنا وكان في المول في الدور الارضي مثل الكافتريا فيها معجنات وحلويات اخذنا منها ما تيسر ورجعنا لعمنا ابو احمد قال نروح البيت قلنا اي بيت الله يصلحك ما تعشينا قال حاضر فين نروح نتعشى والا واحد من الشباب طلع لنا بفكرة حووشي قلنا ايش قال ناكل حووشي قلنا حووشي حووشي يالله يابو احمد نبغى حووشي على كيف كيفك قال حاضر واخذنا على مصر الجديدة الى محل اسمه الامير على ما اعتقد وكان عليه اقبال من الشباب المصري مو طبيعي قال ابو احمد هذا المحل رهيب في الحووشي انا نزلت اشتري واطالع والا الوحة معلقة فيها الاسعار حووشي عادي ب 1.5 جنيه ونص :: حووشي سوبر ب3 ثلاثه جنيه قلت اعطيني 10 حوواشي سوبر ابو ثلاثة يوم جيت عند الفرن قال اصبر شوي السوبر ما نعملوش الا بالطلب قلت نصبر وليه لا انا قلت نعشي ابو احمد معانا وحسبت له 3 حبات ولنا الباقي قلت انا ابغى اروح البقالة القريبة هذه اجيب كولا وموية صحة واجي يكون الطلب جاهز قال حاضر رحت البقالة لقيت صاحب البقالة يصلي في وسط البقالة وكل شي متروك على الباب وكان بحفظ الله قلت انتظر الين يصلي واشتري منه والله انتظرت وسلم الرجال واخذت منه كولا وبارد وموية ومكسرات وفصفص رهيب ورجعت عند صاحب الحووشي ولقيته مجهزه لي وقلت له اخذنا الحووشي وقلنا لاابو احمد ودينا على كورنيشنا وصلنا الكورنيش اتصلنا على ابو محيي ما رد لقينا مراكبي ثاني مننا ومنه وبعد شد وجذب رضي الساعة 60 جنيه طلعنا المركب والحووشي معنا والكولا والموية واتعشينا حووشي برحلة نيلية رهيبة وجو رهيب وطلع الحووشي مرة رهيب بس كان من جد من جد سوبر الراجل يخلص واحد قرص مليان لحم بالقوة كل واحد خلص قرصه وكان بالفعل لذيذ حتى المراكبي كان له نصيب من الحووشي اخذنا لفتنا النيلية وعدنا الى مضاربنا وبكذا انتهى اليوم الطويل هذا وانفكيتو من كلامي الكثير
وللحديث بقية وتحياتي

ههه
ههه
يا اخوي فت كبدي من الضحك
ما شاء الله يا عندك اسلوب في الكلام توتوتوتوتوتوتو
والله ماني خايف الا على صويبعاتك
ولفت انتباهي كلمة جلنكاكي حسستني انك تشرب شاهي العصرية مع السواقين الأندونيسيين في ظل الجدار
ههه لا تزعل وانا انتظر بقية تقريرك على احر من الجمر
بس اياك تنسى حاجة نبي التفصيل الممل