1. فاحشة الغلا .


2. العشاء شخصين بدون تبذير يكلف 180 جنيه بالراحه .

الحمدلله امس وصلت من شرم الشيخ في رحله ممتعه الى ابعد الحدود , واشكر اعضاء النتدى لأني صراحه استفدت كثير من المعلومات القيمه المذكوره هنا .
سفرتي يااعزائي صراحه خياليه بكل شي بدأ من السعر اللي كلفني للسفره وانتهاء بالوناسه اللي عشتها هنا.
تصدقون ان رحلتي طيران وسكن خمس نجوم ( فندق سونستا بيتش ) كلفني 1200 ريال فقط . وشلون ؟
انا اقولكم وشلون . رحلت للاردن وجلست فيها ثلاث ايام ونويت اروح لشرم الشيخ من زمان سألت عن مكاتب السياحه هناك قبل لاروح للاردن دلوني الشباب على مكاتب السياحه المعروفه . حصوصا اني اسمع عن اسعارهم الخياليه . طبعا المنطقه اللي انا فيها اهلها خبره بالاردن وعمان لانها قريبه منهم( شمال المملكه ) وكثير من الجماعه والزملاء لهم خبره بعمان ومكاتب السياحه هناك. المهم قال لي واحد من العيال رحله لشرم الشيخ من عمان ثلاث ليالي باربع ايام 200 دينار اردني ( 1100 ريال سعودي ) طيران وفندق خمس نجوم مع الافطار ولو تريد زيد عشر دنانير ويكون مع الغداء والعشاء بعد .
اتكلت على الله ورحلت انا وواحد من الاصدقاء للمكتب اللي دلني عليه ( ماني قايل اسمه عشان ماتقولون دعايه ) قالوا هذي الاسعار اختار الفندق اللي تبي كل فندق له سعر لكن تقريبا كلها حول بعض فرق 10 -20 دينار فيه الكراون وفيه نعمه بيه وسونستا كلوب قلنا للاخت اسمها رشا اللي على المكتب انتي تعرفين دلينا على فندق حلو تعرفينه . قالت سونستا بيتش حلو . عطيناهم 400 دينار علينا حنا الاثنين . وحنا خايفين لأن السعر خيالي . قالوا تعالو بكره خوذوا التذاكر رحنا وخذيناهم . رحنا للمطار وحنا على اعصابنا قلنا الحين يقولون بلوهن واشربوا ميتهم الا والله عطونا البوردنق وصل مطار شرم الشيخ الى اخ مصري ماسك لوحه مكتوب عليها اسم المكتب طبعا قالوا لنا المكتب فيه استقبال بالمطار ركبونا الباص ومعنا كل اللي بالطياره طلعوا كلهم رحلتهم عن طريق المكتب نفسه . كان بجنبي اخ اردني سالته عن الفندق قال الفندق توب ودونا للفندق جلسونا عطونا مفاتيح الغرف . شوي جابوا شناطنا . لبست الشيرت وسيده للمسبح .
والحمدلله المكتب طلع قمه بالتعامل له مندوب بنفس الفندق اي مشكله اي حاجه اتصل فيه على غرفته . ونفس المرشد هاذا ينظم لك رحلات وزيارات .
بس صراحه شرم الشيخ مدينه سياحيه بمعنى الكلمه . بس عليها ملاحظات :.

فاحشة الغلا .

العشاء شخصين بدون تبذير يكلف 180 جنيه بالراحه .

لاتصلح ابد للعوائل المحافظه . يعني الاوربيه تغير ملابسها على الشاطئ ولا هي شايفه احد قدامها . تمشي لابسه من غير هدوم ماتبلش باحد .( واحد من اعضاء المنتدى العزيز ذكر الكلام هذا ماصدقته صراحه لكن كلامه طله صحيح )
كلها اوربيين . يعني اذا شفت عائله عربيه تستغرب . والاسعار مبرمجه عليهم . يعني كل روحتي شفت عايلتين خليجيات فقط وحس انهم غلطوا باالطريق .
بس فيها مناظر طبيعيه حلوه واسواقها برضوا حلوه . وشواطئيها احلى واحلى .
الفنادق يربطها شارع زي الممشى وشوف العالم يمينك ويسارك . بجنب فندقنا كان فندق دايز ان وبجنبه البستان وبجنبه الماريوت . بعدين سوق خليج نعمه الاسطوري باالنسبه لي .
فعلا كما ذكر المرشد السياحي تبع المكتب انها ثالث افضل مدينه سياحيه باالعالم .
وفي نهاية الرحله جاء نفس المرشد وخذانا مع الركاب الاخرين بباص جديد ( ريحت الوكاله تشمها فيه)
وودانا للمطار . وصلنا لعمان وعلى طول خذينا السياره من فندق نعرفه حاطين السياره عندهم وسيده دعسنا للحدود السعوديه 120 كيلو وبعدين صاروخ لديرتي الجوف سلمت على اهلي وجلست نص ساعه بس , ورحت لمطار الجوف لان عندي رحله للرياض علشان اخلص اجراءت بعثة الماجستير . ( اللي عنده واسطه لي يعلمني ).
وسلامتك طولت عليكم .