اود في البداية اشكر هذا المنتدى الرائع بكل معنى الكلمة وهو السبب بعد الله
في نجاح رحلتي الرائعه الى ماليزيا بلد الرومانسيه والجمال
راح ابدا ان شاء الله في تقرير لماليزيا اليوم وان شاء الله يكون هدية اردها لكم على كل ماستفدت منه
طبعا انا ماعرف انسق واحط واشيل في الكلمات فسامحوني
هذي طبعا اول سفرة لي الى الخارج الى دولة بعيده واستمتعت مره كانت رحلة ماتنسى طول العمر
واللي خايف يسافر يقول ماعرف من النت يتعلم احسن له من الماكتب اللي اسعارها تكسر الظهر
ولااللي يقول مابروح لحالي بروح مع قروب اقول له اجمع المعلومات بنفسك من هالمنتدى وسافر وانت مرتاح
انا لغتي الانجليزي مو مره يعني يادوب كلمات بسيطة وهناك يتكلمون عربي ماتوهقنا ابدا
بس فيه اشياء بسيطه تمنينا نعرف انجليزي علشان نتفاهم وياهم عليها بس مشينا حالنا عادي
طبعا كان تخطيطي الى هالسفرة من السنة اللي راحت كنت اقرا في هالمنتدى وانعجبت في ماليزيا مرره
بس ماقررت اروح الا هذي السنة وانا اقول الى زوجي خلينا نسافر ماليزيا وهو يقول ان شاء الله
تحمست وجمعت معلومات وفيره حتى صرت كاني رايحه ماليزيا من قبل طبعا ماكنت اعرف شئ اسمه
حجز من النت بس حاولت تكون سفرتنا ارخص واحجز من النت واخذت لي مساعده اللي هو اخوي العزيز الله يطول
بعمره
بدأت تخطيطاتي الجديه في شهر رمضان شهر الخير اكييد وبحثت في البداية عن الخطوط
شفت الماليزيه ارخص شئ وسعر مغري جدا شخصين بالفين وشوي وتحمست ووشاروت زوجي قال توكلي
على الله وخلنا نحجز وكلمت اخوي اللي كان بيحجز لنا ببطاقتة المستر كارد لانه ماكان عندنا وهنا صارت قصة
قال لي اخوي لازم اتصل الى شركة الخطوط الماليزيه واسئلهم اذا يقبلون ببطاقتي ولالا
واتصل لهم مايردوا وانا كتبتب موضوع هنا وسالت وجاوبوني عادي يقبلون ...وهذا الكلام اخذ يوم كامل
ثاني يوم جينا بنحجز وتطلع سعر التذكرتين 4016 يعني زادت وانقهرت حدي وحجزت بسرعه لايرتفع اكثر
والمهم اللي قهرني زيادة قبل سفرتنا بكم يوم نزل السعر الى ثلاثة الالاف يعني اخذنا ارفع سعر عندهم
المهم راح اقول التفاصيل باختصار
الخطوط الماليزيه لشخصين : :: : 4016
الرحلة لمدة 12 يوم
برنامجنا هناك على ال12 يوم
يومين في سلانجور (فندق صن واي لاقون) السعر 860 ريجنت يعني بحدود1201 ريال شامل الرسوم والخدمة
3ايام في لنكاوي (فندق لنكاوي لاقون) السعر 1063 ريجنت يعني بحدود 1483 ريال شامل
3 ايام في بينانج (فندق بارك رويال) السعر 969 ريجنت بحدود 1351 ريال شامل وصارت لنا سالفه معاه هالفندق في التقرير راح اقول لكم وش صار
4 ايام في كوالا (فندق رويال شولان) السعر 1292 ريجنت بحدود 1802 ريال
هذا كل شئ عن الفنادق والايام والاسعار باقي التفاصيل والصور جايه لكم في الطريق
كانت رحلتنا من تاريخ 21 اكتوبر الى 2 نوفمبر واستنينا بفارع الصبر متى يجي ذاك اليوم الموعود
وجاء وكان يوم اربعاء ورحنا المطار الساعه 11 كانت رحلتنا على الساعه 2:40 ظهرا طبعا قصينا البوردينغ من النت
ورحنا وكان المطار مو زحمه ودخلنا عند الجوازات وخلصنا امورنا بالسريع وبعد ماخلصنا رحنا صلينا الظهر واستنينا
رحلتنا وكان زوجي محاتي يبي يشاهد المباره وشفنا تلفزيون وحاطين على المباره قلت له الساعه 2 احنا قايمين
علشان الطائره قال اوكي وعلى الساعه 2 قمنا ورحنا
وشفناهم يدخلون الطائره انصدمت بسرعه ماشاء الله يعني
جينا بالوقت المناسب مالحقنا قعدنا في الطائرة وسويت كم اتصال والا حنا طايرين في الوقت المحدد بالضبط
ماتوقعت هالسرعه كلها ماشاء الله عليهم دقيقين بمواعيدهم
هذي طائرتنا
وهنا الطائره من داخل
والطيران الماليزي بصراحة عجبني مره والمضيفين قمة في الاخلاق الابتسامة على طول عليهم
واي شئ تبيه يجيبونه على طول
وعطونا وجبة خفيفه سلتنا اثناء طريقنا الى دبي لانه عندنا ترانزيت لمدة ساعه
وهذا صورة للبرج اثناء وصولنا الى دبي ان شاء الله يبين عندكم
وهذا المطار من الداخل
وهنا لما طرنا من مطار دبي كان بحدود الساعه 5 مساءا
اول شئ قدموه لنا هذي المكسرات وكانت لذيذه مره مع العصير
وبعد فترة جابوا لنا وجبة العشاء وخيرونا بين لحم او دجاج واخترت الدجاج بس كان حار مره
والوجبة كانت زينه بشكل عام
وهذي الصور للبرق لما قربنا نوصل ماليزيا وكان البرق في كل مكان ماشاء الله عليهم كل امطار
وهذي اثناء وصولنا الى مطار كوالامبور والحمدلله على سلامتنا ههه
وصلنا 6 الصباح بتوقيت ماليزيا الساعه 1 الفجر بتوقيت السعوديه ومن هاللحظه نسيت السعوديه وكل شئ هناك
كنت متحمسه اطلع برى اشوف الجو واشوف الاشياء اللي كنت متحمسه اشوفها بعد هلانتظار كله وطار النوم مني
وهذي صورة للأغراء من محل في المطار
ااستنينا في المطار الى الساعه 7 علشان ناخذ لنا شريحة سيليكوم وقالوا مايفتحوا الا الساعه 7 استنينا نص ساعه
تمشينا شوي وجلسنا وفتحوا واخذنا لنا شريحه وعبيناها ب50 ريجنت ماشاء الله وكفتنا ايام وايد
رحنا ناخذ تكاسي من المطار واخذنا ب84 ريجنت الى فندقنا صن واي لاقون
واحنا رايحين الفندق
واول ماوصنا مجمع البراميد عرفت انه وصلنا فندقنا طبعا كنت كاشخه قدام زوجي اني اعرف كل شئ في ماليزيا
هالمجمع روعه بصراحة عجبني كثير ونفسي اروح له مره ثانيه
وصلنا فندقنا بالساعه على الساعه 8
الفندق فخم بمعنى الكلمة من غرفة الى استقبال الى فطور كل شئ فيه روعه
دخلنا اللوبي واستلموا شنطنا وسوينا تشيك ان وكان سريع جدا دفنا تامين 300 ريجنت
هنا الاستقبال
كنت خايفه لاني اول مره احجز من النت بس كل شئ مشى اوكي ودفعنا كاش طبعا
كنا طالبين الغرفة تطل على مدينة الالعاب صن واي لاقون وعطونا اياها بس المشكله انها كنت في الدور الثالث
يعني ماكان يبين شئ مع انه كلمناهم بس مافهمنا عليهم ومشينا حالنا في هذي النقطة كان نفسي اعرف انجليزي ههه
بس يالله هالمنظر مستحيل نحصله في السعوديه علشان نتحلطم هناك خ
المهم ركبنا الى غرفتنا وجابوا لنا الشنطة وماعرفت انام من الفرحة بس نومة حالي غصب وقعدنا على الساعه 2 ونص الظهر علشان مايفوتنا هلليوم وكان من حظنا وصولنا الساعه 6 الصباح يعني استغلينا اليومين كاملين
انا تعبت بكمل بعدين بحط لكم صور الفندق والغرفة