- بسم الله الرحمن الرحيم
- 5 ليالي في فندق موتيارا كوالا لمبور
- منظر للمسبح من بلكونة الغرفه
بسم الله الرحمن الرحيم
في البداية احب اشكر كل الاخوان في المنتدى لاني بصراحة استفدت كثير جدا من خبراتهم والحمدلله حسيت اني رحت ماليزيا من قبل من شدة ابداعهم في الوصف والصور الجميلة اللي كانوا يعرضونها .. وردا للجميل اضع بين ايديكم رحلتي الى ماليزيا وبالتفصيل الممل عسى احد يستفيد منه ...
رحلتي انا وابن عمي استغرقت 14 يوما وقد قمت بعمل الحجوزات بنفسي عن طريق مكتب سفريات في جدة اعتمادا على نصائح الاخوان في المنتدى بالنسبة للفنادق وكان الجدول كالتالي
2 ليلة في فندق الخيول الذهبية
2 ليلة في فندق هوليدي فيلا لنكاوي
4 ليالي في فندق بي فيو بيتش بينانق
5 ليالي في فندق موتيارا كوالا لمبور
وكانت تكلفة الرحلة للشخص الواحد شاملة التذاكر الدولية والداخلية والفنادق 5300 ريال
كانت المغادره الى ماليزيا على الخطوط الماليزية رحلة رقم 150 .. وعند وصولنا الى الصالة الدولية في مطار جدة لقينا المطار مره زحمة وقمة في الفوضى .. والناس ماتدري وين تروح .. لا يوجد لوحات ارشادية ولا موظفين للمساعدة والعالم فوق بعض خصوصا عند التفتيش في مدخل الصالة .... بصراحة وصمة عار ... والله ان الواحد يستحي من شكل المطار .... لا ودولي بعد ......
لما وصلنا الى كاونتر الخطوط الماليزية ماكان فيه زحام .. وكان قبلي شخص سعودي بعائلتة .. ولاحظت ان الموظفين رفضوا يقصون له البوردنق بحجة وجود خطاء في اسم ولده الصغير في جواز سفره وطلبوا منه مراجعة جوازات المطار ... وقتها بداء قلبي يدق ... ليش لان لما رحت اجدد جوازي في جوازات جده (( الله لايذكرهم بالخير )) ضيعوا جوازي الجديد قبل مااستلمه ... وجلست اراجعهم يوميا ولمدة اسبوعين كاملين ومرات اقعد عندهم لحد الساعة 11 بالليل وهم ماهم راضين يطلعون لي جواز بديل ولاهم لاقين جوازي اللي ضيعوه .. لحد ما كادت تضيع السفره لكن فرجها الله في اخر لحظة .. وقابلت مدير الجوازات وطلب منهم يصدرون لي جواز جديد .. والحمد لله طلعوا لي جواز جديد وبرقم جديد غير الاول .... عشان كذه كانت خائف من اي مشكلة تصير من الجوازات وماصدقت خبر لما عديت جوازات المطار ووصلت صالة الانتظار ... وجلست انتظر الرجال اللي صارت له مشكلة لكن مع الاسف ماجاء يعني راحت عليه الرحلة هو وعياله بسبة الجوازات ... وبصراحة الفتره اللي قعدت اراجع فيها الجوازات شفت العجب ... مرو واحد معطينة جواز لبنته والصورة لوحده مايعرفها ... وواحد ثاني الجواز باسم حرمة والصوره صورة رجال .... يعني من جد جوازات جدة كانها حلقة خضار .
انتظرنا الاعلان عن الرحلة وبعدين ركبنا باصات خط البلدة عشان توصلنا الطائرة .. وطبعا المقاعد انا حاجزها من اول جنب الشباك.. وبصراحة الخطوط الماليزيه في رائي اجمل من الخطوط السعوديه
الرحلة طبعا كانت لمده تسع ساعات .. وبرغم اني كنت مرهق الا اني ماقدرت انام ومضيت الوقت في مشاهدة الافلام واللعب في العاب الفيديو في الطائرة.
وصلت الرحلة حوالي الساعة 11 صباحا بتوقيت ماليزيا .. وطبعا ماراح اوصف مطار كوالا لمبور .. لان اكيد الكل صار عارفه .. بس حقيقة شي يزعل ان مطار جده اكبر مطار في السعودية يستقبل ركاب اسواء بكثير حتى من مطار لنكاوي ... والكل يعرف ان مطار اي مدينة هو اول انطباع لاي شخص عن تللك المدينة ...
تمت اجراءات العفش والجوازات بسرعة وخرجنا من المطار واخذنا تاكسي الى فندق الخيول الذهبية ب 92 رنجنت عن طريق مكتب التكاسي في المطار .. وكان الطريق الى الفندق ممتع جدا خصوصا للي توه جاي من صحراء ويروح لديره كلها خضراء
وصلنا الفندق وعملنا التشيك ان وكان حجزنا موجود ومافيه اي مشاكل .. لكني للاسف ضيعت الفاوتشر الخاص بالفندق والظاهر اني نسيته في جدة .. ولما طلبوه الفندق قلتلهم في العفش .. طلبوا مني اجيبه لهم بعدين .. قلت لهم طيب .. وانا عارف انه مهو موجود بس قلت اذا جيت ماشي تفاهمت معاهم
منظر للفندق من القارب
طلعنا الغرفة واللي كانت مطلة على المسبح وكنا تعبانيين جدا من السفر فقررنا الاستسلام للنوم حتى الساعه 6 مساء
منظر للمسبح من بلكونة الغرفه
لما صحينا اتجهنا على طول الى القارب اللي يودي للسوق (( 3 رنجنت للشخص )) ومن زين الطبايع ركبت قدام في اول القارب .. قال ايش قال عشان اشوف زين .. وبعد ماتحرك القارب وخرج من جهة الفندق الى البحيرة الكبيرة الظاهر انه اخذ مطب مائي !!! وجات المويه كلها علي وتغرقت على الاخر .. وصار كل اللي في القارب يضحكون واولهم خويي ..( يعني الزبدة صرت مسخرة ) .. بعدين نزلنا القارب في فندق الماينز ومنه اتجهنا الى السوق .. وطبعا اكيد الكل صار يعرف انه ممكن تتمشى في السوق بالقارب ..
السوق من الداخل
لفلفنا شوي بالسوق وتعشينا في كنتاكي وطلعنا .. وبعدين فكرنا ندخل ملاهي الوندرلاند بس غيرنا رائينا لان شكلها ملاهي اطفال اكثر عشان كذا رجعنا الفندق عشان نرتاح لان ورانا اليوم الثاني ملاهي السن وي لاقون
يتبع
هل تعلم أخي الكريم إن قصص الأخوة القادمين من ماليزيا وسردهم لمجريات رحلاتهم أصبحت من الأشياء المحببة لدي , وأصبحت استمتع بكل ما يسجلوه من أحداث حتى وفي مرات كثيرة بمجرد دخولي مكتبي في العمل ابدأ بقراءة القصص قبل قراءة ايميلي الخاص بالعمل , وزي ما أنا ابدأ العمل بقراءة القصص انت بديتها بالخيول الذهبية والمايز يعني بديتها صح وانا بديت عملي صح
نحن بانتظار مغامرات هباش في صنواي لاجون العجائب, على وزن مغامرات أليس في بلاد العجائب
وفعلا ماليزيا أصبحت بلاد العجائب وأصبحنا نقرأ قصص الأعضاء في بلاد العجائب
سفرة ممتعة اخي الكريم ونحن بانتظار جديدك
نصيحة لك : في صن واي لاجون اركب وراء لا تتبلل