1. نجي لسووق وهو قلب الحريم


2. المهم كان همي الاول ابي شنط تقليد درجه اولى


3. طريقتهم في البيع

السلام عليكم ورحمة الله وبركاته
انا عضوه جديده واتمنى اكون اخت بينكم وللامانه الي خلاني اتسجل الاخ ابو ضرار ونصحه للاخوان الله يوفقك اخوي ويسهل دربك
بعلمكم عن رحلتي وبعدين ابطلبم من الي عنده خبره يساعدني الله يفتح ابواب الخير بوجيهكم وعلى راسهم ابو ضرار ولاهانوا الاخوان كلهم
رحلتنا كانت بعد راس السنه انا وزوجي وولدي صغير من الرياض جده دبي بكين على الخطوط الاماراتيه
الرحله كانت درجه اولى السعر مادري الخدمه ممتازه الوقت بالنسبه للاقلاع فيه بعض التاخير بس ماحسينا فيه
وصلنا لبيكين الجو برد وثلج كانت درجة الحرارة -12 اول يوم حسينا بالبرد بعدين تعودنا صار عندنا عادي
نزلنا بفندق جنب السفاره السعوديه اسمه kunlun حلو اخذنا غرفه ديلوكس على مااظن كذا اسمها سعرها بالياوان 1200 وبعد 3ايام غيرناها لسويت سعره 2200 معه خدمه غسيل الملابس مجانا + في الدور 29 المطعم القهوة والشاهي وكل شي مجانا لمدة 24 ساعة الغذاء والعشاء ماله دخل
المهم اخذنا سواق لمدة 12 ساعه ب550 ويوم رحنا لصور العظيم كان سعره 750 واي ساعه زياده يحسبها ب50 يوان
سعر ال 100 دولار = 675 يوان
افضل مطعم بالنسبه لي مطعم الصفا على انه صغير وعلى قده بس اكلهم حلو ونظيف الطباخ مصري اسمه رامي واللي يشرف على الطلبات مصري بعد اسمه احمد وحيل محترمين وخدومين وكان عندهم نظام غرف عوائل
في مطعم الكل طايح فيه وغالي نوعا ما اسمه الف ليله وليله ماعجبني لحمهم قاسي
في محل حق المساج مره حلو رحنا له انا وزوجي ساعه و45دقيقه جسم ورجول ب250 يوان لانه فتره عصر واذا ليل السعر 500 يوان جنبه مطعم اكله خرافي بس ماقدر اخذ راحتي فيه لانه زحمه حيل وفيه راقصات ياويل حظي بس

نجي لسووق وهو قلب الحريم

كانت معنا بنت صينيه لاهي مترجمه ولا شي بس تابعه لسفاره وكانت تساعدنا وانا صرت اطلبها كل يوم صدق لزقه وماانعطى وجه
المهم توصل للفندق على الساعه 10 اكون فطرنا وخلصنا تدق تقول السواق تحت ننزل انا وزوجي وابني ونطلع لسوق اول يوم اخذنا جزم وانتم بكرامه لان الثلج ذبح رجولي سعرها كان 150 يوان يعني 75 ريال سعودي يعني ببلاش بالنسبه لجودتها والي تقليد منها ارخص
بعد ماعرفنا نتكاسر معهم او بمعنى اصح بعد ماصار زوجي مايطلع معي لسوق صرت اخذ الجزمه على 120 يوان عشان الهدايا
بقولكم وش صار معي في الاسواق وكل شي حتى لو كلامي مو منتظم استحملوني الله يوفقكم
اكثر سوقين عجبوني ياشو ماركت وسوق ماركت
سوق هذا اصلا اسمه سيلك بس هم يقولون له سوق
ياشو من ناحيه الملابس اكبر تشكيله والجزم والشنط قليله اما سيلك الشنط والجزم اكثر من الملابس
صرت يوميا بين السوقين ذول على اني صرت معروفه
اول يومين زوجي وولدي معي الصينيات لعبوا بوجه ولدي لعب مادري وش فيهم كانهم ماقدهم شافوا اطفال وبصراحه ماارتحت بالتسوق مع زوجي لان زوجي مايحب الزحمه ولا يتكاسر معهم

المهم كان همي الاول ابي شنط تقليد درجه اولى

رحت لكذا محل تقولك السعر 1600 وبالاخير يصير 350 انا اتكلم عن الشنط غير الملابس
وجهة نظري على البائعات كذابات او لعابات من الدرجه الاولى مثلا مره طلبت شنطه درجه اولى وقلت تكفين مافيني حيل اعور راسي هاتي السعر من الاخير الكلام معهم انجليزي ومعي البنت الي قلت لكم عنها الصينيه تقولي البائعه اوكي بجيب لك درجه اي يعني الاولى ورب البيت تنصب علي وتجيب لي الدرجه 70 وتقولي اوكي ب250 اقول ابي الاولى تقول هذي هي يوم شافتني قلت الي معي يالله قالت اوكي بجيب لك الاولى بس زودي السعر بالاخير طلعت الاولى تركتها وطلعت قلت من اول اقولك الاولى وانتي تلعبي علي خلاص ماعدت ابيها

طريقتهم في البيع

تدخلين او هي تناديك تقولك عشانك فرندا يعني صديقتي هذا سعر الجزمه وانتم بكرامه وترمي الالة الحاسبة يعني ترى هذا اخر سعر ولا انزلك يوان واحد وتروح انا اطلع من المحل تصير تناديك ويروح الزعل الي فيها ياليت فهمتم علي بوضحها اكثر