1. المهم

مرحبا اخواني وخواتي
باختصار راح اعطيكم تقرير عن رحلتي الى تركيا ( اسطنبول )
1- حجز الفندق عن طريق موقع booking .. حجزت في فندق مرمرة تقسيم ..
الفندق خمس نجوم لكن في الواقع لايستحق نجمتين ..
2- حجز التذاكر تم اون لاين في موقع الخطوط الجوية القطرية ( خطوط راقية وروعه ولاغبار عليها ..)
نبدأ الرحلة .. انا و زوجي
تم الاقلاع من مطار الدوحه الدولي الساعه الثامنة صباحا
وقت الوصول الى اسطنبول 12 وربع ظهرا
في المطار عند الجوازات بعد مايختمونها لنا يحذفون الجواز علينا ومستحيل احد يبتسم في وجهنا
كانت في انتظارنا سيدة من شركة سياحة وانها بتكون المرشد السياحي لنا ( مانصحكم فيهم ابدا .. اسم شركتهم هيلين تور )
ومن المطار لين الفندق تقريبا اخذنا نص ساعه وكانت تشرح لنا عن تركيا والاماكن السياحية فيها
واتفقنا معاها انه ثاني يوم بنروح جزيرة الاميرات وتكلفة الشخص الواحد خمسين دولار.. وقالت لنا لازم الساعه تسع نكون موجودين عن باب الفندق عشان الباص ماراح ينطرنا
وثالث يوم بنروح بورصه ولازم نكون موجودين عند باب الفندق سبع الصبح
واخذت علينا انا وزوجي 300 دولار ثمن الرحلتين
وخذنا الوصل و وقعنا ..
المهم .. وصلنا الفندق ( مرمرة اسطنبول ) كانت الساعه وحده وربع الظهر تقريبا
قالولنا غرفتكم مب جاهزه .. انطروا نص ساعه .. قلنا اوكي .. والنص ساعه .. صارت اربع ساعات ونص واحنا قاعدين ومحد معطينا وجه .. واذا كلمناهم يقولون انطروا ..
والمشكله يوم حاولنا انكسل الحجز ماقدرنا لانه الحجز كان عن طريق موقع بوكنج وغير مسترجع ..

المهم

الساعه اربع ونص رحنا الغرفه .. كانت دون المستوى .. اثاث قديم .. ممرات الفندق وايد قديمه .. المنظر يطل على مباني مكسرة .. والمكيف خربان .. وكل ماقلنالهم صلحوه او عدلوه او غيروا الغرفه .. محد يرد علينا ..
حاولنا نتأقلم مع الوضع .. كلمنا المرشده السياحية انه كنا نبي مظعم نتعشى فيه ..
قالت لنا روحوا مطعم يلداز اعتقد اسمه .. رحنا المطعم .. موقعه عالبحر والمناظر روعه والجو كان يهبل ..
المهم
طلبنا واحد استاكوزا ( لابوستر) واربع حبات ربيان واثنين كولا .. طلع حسابنا 1120 ريال قطري ..(وايد غالي طبعا) والاكل عادي مب لذيذ وايد ..
المهم دفعنا ورجعنا الفندق المأساوي .. بس قبل ماندخل الفندق تمشينا في شارع الاستقلال التجاري .. حلو الشارع بس وايد زحمه ..
ثاني يوم كان الاتفاق انه انروح اول رحلة وهي الى جزيرة الاميرات ..
نروح تسع الصبح ونرجع 5 او ست العصر .. وعلى كلام المرشده انه لباص بيكون موجود تسع ..
كنا انا وزوجي جاهزين الساعه ثمان ونص الصبح وقاعدين تحت ننطر الباص .. وصل الباص الساعه تسع الا ربع.. قمنا بنركب .. قال لنا راعي الباص لا .. هذا مب باصكم انتوا باصكم تسع ..
رجعنا اللوبي ..
وصل الباص الثاني تسع وخمس دقايق .. قلنا بنركب .. قالولنا .. لا .. زحمه وماتقدرون تركبون .. قلنالهم طيب احنا دافعين وهاي الفاتورة .. قالوا انطروا الحين بيجي الباص الثاني ..
نطرنا لين 11 و وصل الباص الثالث .. كنا وقتها خلاص مقفلين حدنا وكرهنا الرحله .. والمكان والفندق والبلاد بكبرها ..
وكلمت المرشدة وقلت لها نبي فلوسنا .. الحمدلله من 300 دولار رجعولنا 250
اتصلت على اهلي ف قطر .. غيرت موعد الرجوع اللي كان المفروض بعد عشر ايام .. الى نفس اليوم
يعني قعدنا في تركيا بس يوم ونص ..
ولانه حجز الفندق كان عن طريق البوكنج مارجعولنا ولا ريال .. 6000 ريال قطري راحت عالفاضي
وصلنا تركيا الاحد الساعه وحده الظهر .. ورجعنا قطر ثاني يوم كان الاثنين الساعه سبع ونص..
الفندق : ( مرمرة اسطنبول 3 من 10 )
معاملة الشعب التركي ( 2 من 10)
الخطوط الجوية القطرية ( 9 من 10 )
بشكل اجمالي :: البلاد بس جوها حلو .. بس مافيها طعم نهائيا ..
انا اشوفها نفس سوريا بالضبط .. بس الشعب السوري وايد احسن من التركي ..
ونصيحة .. يفضل عمل الحجوزات عن طريق مكتب سفريات .. لانه في حال اذا ماعجبكم الفندق هم يتحملون التكاليف وتقدرون تغيرون الفندق او تسترجعون فلوسكم