اولا:مشكلة الفيزا
المشكله انه فيزنا منتهيه ماعدا بوعيسى
أخذت الجوازات عند الموظفه اللي اتعامل معاها في المكتب السياحي ، وعطيتها الجوازات والفلوس ع اساس يقدمونهم
وطاف اليوم والاول واليوم الثاني وانا اسمع تبريرات مالها معنى
قلت لبوعيسى ، الافضل بروحك تقدمهم ولا بيضيع الوقت ومابنقدر نسافر
بوعيسى تولى موضوع الفيز وسار وقدم الطلبات وخبروه انها بتحتاج 10 ايام ، يعني ممكن نستلمهم قبل سفرنا بيوم
لكن الحمدالله سلمونا ياهم عقب اسبوع ، يعني قبل سفرنا بأيام
وخلصنا الفيز وارتاح قلبي
ثانيا:مشكلة حجز الطيران
طبعا في المده اللي كنا ننتظر تخلص الفيز كنا أنا وبوعيسى نرتب حجوزات الطيران والسكن..
أول بلد فكرنا نزورها هي حبيبة قلبي سويسرا
بس للأسف ماحصلنا سكن في المكان اللي نباه ، ولاحجز ع مطار زيورخ في الوقت اللي نباه
اللي صار انه حصلنا في السيره ع البزنس بس ماحصلنا حق الرده ع البزنس
وانا لازم أيلس ع البزنس في المسافات الطويله
غيرت الخطه وقلت بنسكن في المانيا ع الحدود السويسريه وبكون قريبه من سويسرا
وبعد بحث عن الطيران المناسب حصلت عن طريق فرانكفورت ذهاب وعوده ع البزنس في الوقت اللي نباه
معلومات عن حجزنا
حجزنا ع طيران الامارات
سعر التذكره ع الدرجه السياحيه = 4535 للكبير
وسعر التذكره للصغير = 3505
وتم ترفيعنا ع درجة رجال الأعمال بفضل نقاط سكاي وورد
وخلصنا حجز الطيران وارتاح قلبي
ثالثا:مشكلة السكن
بعد مراسلات وبحث قررنا نسكن في بادن بادن مدة اسبوع ، وفي فرانكفورت 5 أيام حق التسوق
وفي جزء بتكلم عنه في البوابه السويسريه
يعني الجزء الالماني اللي بتكلم عنه هو ...
بادن بادن+ فرانكفورت
وحجز السكن كان من موقع بوكينج
طبعا تختلف الاسعار بحسب الشهور والمواسم
تفاصيل السكن في بادن بادن
سكنا في فندق BATSCHARI SUITE HOTEL
(( بتعرفون تفاصيل أكثر عن الفندق في الاجزاء اليايه ))
موقعهم الاكتروني
وسكنا عباره عن سويتين وكل سويت عباره عن..
غرفة نوم وصاله منفصله ، ومطبخ متكامل ، وحمام أكرمكم الله
وسعر السويتين في المده كلها ( 5 أيام ) = 1865 يورو
شامل الافطار والنت وسرير اضافي في سويت واحد ، بالاضافه لرسوم الباركن مدة يومين
لأنه عقب ردينا السياره واعتمدنا ع مواصلاتهم العامه
موقعهم الاكتروني
وخلصنا حجز السكن وارتاح قلبي
رابعا : مشكلة حجز السياره
كل يوم بوعيسى ماعنده شغله الا يدور في النت ع سياره نقدر نستلمها من مطار فرانكفورت وكنا نبا ام 7 راكب كبيره او 9 راكب ..
وبعد بحث طويل ومراسلات في الأخير حصلنا سياره بس بنستلمها من بادن في ثاني يوم لوصولنا..
الخطه..
بننزل مطار فرانكفورت وبنحجز سياره من طيران الامارات وهم عندهم خدمة التوصيل المجاني للي ع درجة البزنس
ولكن المشكله انهم يوصلون داخل فرانكفورت مجاني اما خارجها فبرسوم
قلنا ممشكله
بعد مانطلع من فرانكفورت يحسبون كم كيلو لبادن ويحاسبونا عليه ، وطلع علينا ب 150 يورو
والحمدالله ثاني يوم وصولنا استلمنا السياره
تفاصيل السياره
الشركه اللي أجرنا منها هي شركة يورب كار
نوع السياره : فولكس فاجن مالتي فان
VW MULTIVAN
حق 7 راكب
سعرها في اليوم الواحد = 110 يورو تقريبا
الحمدالله وايد توفقنا في السياره ويمكن احسن سياره نركبها ع سفراتنا اللي طافت
لأنها اتوماتيك وكبيره والكراسي تلف وتنفتح طاوله في الوسط ، وعيالي وايد استانسوا عليها
وخلصنا حجز السياره وارتاح قلبي
خامسا : مشكلة الخدامه
الله يسلمكم شغالاتي شردوا قبل لا اسافر وعيشوني أزمه حقيقيه ، وعقب جبت غيرهم
وبما انه مايقبلون يعطون فيزا لشغاله يديده ، فمكان جدامي الا اسافر بدون شغاله مع عائلتي واتحمل المسؤوليه كامله بمساعد منهم
بوعيسى كان وايد مبسوط أنه بنسافر بدون شغاله ،لأنه دايما يقوللي العيال كبرواومافي داعي منها
وانا كنت اصر على وجودها ، بس السنه غصب عني بسافر بدونها
في نهاية الرحله بتعرفون رأي بوعيسى وقراره النهائي اللي لارجعه في بعد تجربة السفر بدون شغاله
(( ذكروني في نهاية التقرير اخبركم ، ولاتسألوني الحين ما اقدر اخبركم الا بعد ماتعيشون وياي احداث السفر ))
وماخلصنا من هاي المشكله بس اتقبلت الفكره

أخيرا : عملية البحث
كعادتي دايما ايلس افرفر ع التقارير سواء في منتدانا او في منتديات ثانيه ، واجمع معلومات وارتب افكاري
وكعادتي اعطيكم كل اللي جمعته وعقب أخبركم عن كل مكان زرته
والسموحه من كل اللي اقتبست منهم معلومه وماذكرت اسمه ، ولكن..
ادعوا من الله انه يجعله في ميزان حسناتكم وجزاكم الله الف خير عنا
اولا: بادن بادن
شكر خاص لصديقتي وحبيبتي ام مبارك ( Najla )
اللي استفدت وايد من تقريرها عن بادن وبادن ، والصراحه تقريرها هو اللي دخل الفكره في راسي وخلاني اقرر ازور بادن
جزاج الله الف خير يا أحلى صديقه

• مبنى Trinkhalle

فيه مكتب المعلومات السياحية الرسمي في بادن بادن
وهذا المبنى اللي فيه المكتب السياحي للمعلومات
موقع بادن بادن الرسمي
http://www.baden-baden.de/en/index.html

• شارعLichtentaler

هذا الشارع الذي يعتبر العنوان الذي يفضلها لكثير من الأثرياء ليحمل اسم متجرهم أو مقر سكنهم
المطاعم في بادن

• مطعم تركي

موجود في سنتر المدينه امام النافوره يوجد امامكم مكدونالدز ..
امشي بجانب مكدونالد وعقب
تطوفونه وتمشون مسافه جدام وبيقابلني مطعم وسوبرماكت تركي
( الصراحه يوجد أكثر من مطعم تركي بخبركم عنهم عقب )

• محل آيس كريم

ورا مكدونالد محل ايسكريم لا يقاوم
( فعلا جربته ووايد لذيذ ، عموما الايس كريم في اوروبا وايد لذيذ )

• نورد سي
• بيتزا روما

Roma Pizzeria

• بقاله يبيعون فيها مسلمون اتراك

( شفت بقالتين )

• مطعم ومخبز ليو

على جانب ساحة ليو بولدس بلاتس
مناسب لوجبة الفطور
(هاي توصيه من صديقتي ام مبارك)

• كافيه Kong

يصلح للأفترنون تي يعني شاي العصر
(هاي توصيه من صديقتي ام مبارك)
أماكن سياحيه في بادن وحواليها

• حديقة لشتنتالر اليه Lichtentaler Allee

هي من أروع الحدائق في بادن وأكبرها مساحه

• جبل مركيور Merkur

يمكنكم القيام بها بواسطة السيارة الخاصة او الباصرقم205أو204
الباص رقم205من محطة
Hindenburgplats
والتي يمكن الوصول لها من خلال السير في شارعLuisenstr
خلف المطعم الصيني
يفضل أخذ تذاكر الباص + القطار الجبلي من سائق الباص
قيمة التذكرة للكبار4يورو والصغار من6 - 14سنة2يورو
تستغرق الرحلة إلي محطة Merkur قرابة20دقيقة في طرق رائعة الجمآآآل
ينقلك بعدها القطار الجبلي الذي يصعد كل15دقيقة إلى القمة بمسافه5دقائق
ويعتبر من أحدث القطارات الجبلية في أوروربا
( عقب بخبركم انطباعي عنها )

• بحيرة المملسي

هي احدى بحيرات الغابات السوداء وتقع في شمالها على سفح الجبل الغربي من
Hornisgrinde
يقلك إليها الباص رقم245من مركز بادن بادن في مسافه تبلغ 27.6كم
استغرق الطريق لها قرابة45دقيقة ، يتوقف الباص خلالها عدة محطات
( عقب بخبركم اكثر عنها )

• بحيرة تيتيسي titisee

الاحداثيه...
N 47 53.990
E 8 8.807
فيها تجديف قوارب ، ومطاعم اسلاميه
( دورت وماحصل أي مطعم اسلامي فيها )

• منتزه steinwasen park

يبعد عن فرايبروغ 18 كلم ، وعن رست 55 كلم
فيها العاب والزحليقه الصيفيه وتلفريك

• مدينة ستراسبورغ الفرنسيه
• يوربا بارك
• الزحليقه الصيفيه Hasenhorn Coaster

N 47 49.751
E 7 56.875
هي الأطول والأكثر إثارة بمسافة تبلغ2.9 كيلو متر
بعد زيارة الزحليقة الصيفية يستطيع السائح زيارة شلال تودتنا والقريب

• شلال تودتناو

N 47 50.529
E 7 56.026

• فرايبورغ الالمانية

FREIBURG IN GERMANY
N 47 59.915
E 7 50.979
التمشي في مدينة فرايبروغ وعقب نصعد التلفريك

• تلفريك الى قمة فرايبورغ

N 47 56.189
E 7 51.880

• شلال تريبيق بلدة مصنع ومحلات ساعات الكوكو المشهورة

N 48 7.714
E 8 13.841

• متحف ومصنع مرسيدس في شتوجارت

N 48 47.324
E 9 13.940

• سوق الاوت لت في متزيجين بالقرب من شتوجارت

N 48 32.172
E 9 16.828
ثانيا :فرانكفورت
موقع فرانكفورت الرسمي...
تفضل http://www.frankfurt.de/sixcms/detail.php?id=stadtfrankfurt_eval01.c.317693.en&template=hp_flash هنا

• حديقة الحيوان
• Main Tower

هذا البرج الجميل للركوب له ب 4 يورو ونصف ..
جميل التصوير من الاعلى والجلوس بالكوفي شوب

• هوليدي بارك

تبعد عن فرانكفورت بالسياره ساعه وكذالك بالقطار وهي وتقع بمدينة HASSLOCH

• هالديبرغ

Heidelberg
تبعد ساعه عن فرانكفورت
مدينه غايه بالجمال وانصح الكل بزيارتها ..
وتعد واحده من اجمل وارقى المدن بالمانيا واسواقها الجميله وتقع المدينه على امتداد نهر نيكر Neckar
وتتميز ايضا بالهدوء والاجواء الرومانسيه على جسرها الشهير ..
وايضا لا انسى قلعة هالديبرغ الرائعه
CastleHeidelberg
التسوق في فرانكفورت
المجمع الساحر.. الحديث الرائع والذي لا يفوت ابدا ..
MyZeil

• اشهر اوت ليت هو

Wertheim Village
ببلدة Wertheim

• فيس بادن

Wiesbaden
مدينه رائعه جدا ومثاليه للاسترخاء والراحه تمتاز بمنتجعات متخصصه للتدليك وعلاج العظام والمياه الساخنه ..
وتتميز ايضا بالاسواق والقلاع التاريخيه والمتاحف والحدائق الجميله ...
وتعتبر فنادقها ذات الخمس نجوم فاخره وهي كمنتجع صحي فاخر ...
تبعد عن فرانكفورت فقط 30 دقيقه ...
هاي كل المعلومات اللي قدرت أجمعها في وقتنا القصير قبل السفر
تابعوني في الجزء الثاني يوم الوصول لفرانكفورت ،..
والمشكله الكبيره اللي أول مره تصيرلنا وماتوقعناها

يشرفني اني اول الواصلين بتقريرج
و ناوي اعيش وياج باحداث السفرة اولا باول

مساء الخير
انتظرنا هذا التقرير من مده طويله ... بدايه رائعه جدا
كالعاده متألقه بتقاريرج المميزه
متابعين حتى النهايه .. دمتي انتي والعائله الكريمه بخير

واخيرا نزل التقرير
جدا كنت متشوقة له
ومستمتعة اكيد

السلام عليكم
الله يا فرحتي يوم شفت تقرير لج يديد اندمج بتقاريرح بطريقه مو طبيعيه .. الله يديم عليج السفر و الرحلات و يزيدهم و تتحفينا اكثر ..
تعجبني جدا نقاط السكاي ووردز اللي تستفيدون منها و صراحه بسبتج قررت ارسي علي طيران واحد حق كل رحلاتنا .. نسافر بالسنه اكثر من مره بس كل مره طيران مختلف و النقاط متبعثره بالطيارانات بدون فايده بس خلاص بنحذو حذوكم
علي فكره نطالبج بزياره للكويت و كتابه تقرير عنها و لندن ديرتي الثانيه
لا تبطين علينا يا ام عيسى .. متابعين

متابعين للاخر
تقرير من بدايته مرتب ورائع ماشاء الله

واخيرا نزلتي تقرير ياهداوه ياروح البي انتي ... تدرين كل مره اشيك على بوابة سويسرا اقول يمكن هداوه نزلت موضوع وانا ماادري..ودخلت بوابة المانيا وبالصدفه لقيت موضوعك ومن حسن حظي انو بالبدايه ...ياحبي لك وياحبي لتقاريرك يااختي
تابعي ياحلووه ...تابعي واحنا معاك ....

اهنيك على التقرير الممتع جدا