- تبينا نوصله لبنتها في مونترو !!!!!!
بسم الله الرحمن الرحيم
اسفه على العنوان
معليش بس هذا هو إحساسي وأنا اقرأ تقارير الأعضاء عن رحلاتهم لسويسرا وأتذكر رحلتي
وعهدي على نفسي بإني ماأعيدها إلا إذا كبروا الأولاد وهم اللي يتحملون مسؤولية انفسهم ومسؤوليتي بعد لإني والله تعبت
آآآآآآآآآه بس
بتكلم معكم بكل صراحة حتى تشاركوني إحساسي ومشاعري وحتى استفيد من أرائكم وتساعدوني اعوضها ..
وهل أنا ابالغ في مشاعري واعتقد ومارح يحس فيني إلا الي جرب يشيل المسؤولية لحاله
في صيف 2004 قررت اتمرد على وضعي وأقهر ظروفي واسافر إلى اوربا اللي نفسي اسافرها من زمان
مشكلتي تبدأ من والدي الله يحفظه وصولاً إلى زوجي
كلهم مايحبون السفر وإذا.. إذا فكروا بالسفر يالله بس مصر!!
وانا طبعا ماأملك من أمري شي من وصاية الوالد إلى وصاية الزوج :112:وياقلبي لاتحزن
العجيب حبي الشديد للسفر وتعاكس ظروفي مع هالحب اختي ماتحب تسافر وزوجها يعشق التنقل !! سبحان الله
المهم
قررت إني أكسر هالقيود واحقق حلمي وصار عندي قناعة إذا انا ماحققت لنفسي اللي احلم به واللي يسعدني محد بيحققه لي (قوية )
ومن هنا صار عندي تحدي خاصة مع زوجي اللي كان مستخف بقدرتي على تحقيق هذا
لحالي ........ ومعي طفلين ......... ولغة إنجليزية ضعيفة
قررت اسافر اوربا واخترت جنيف ومنها إلى باريس
واخترت هالمدينتين بالذات لإن فيها ناس أعرفهم
وبصطحب معي محرم وهو ولد اخوي عمره 18 سنة
حبيبي مايعرف كوعه من بوعه
وعجاز
ويموت في التسدح
وبس يفكر في تسجيله في الجامعة
المهم محرم:m9:انا اخاف من ربي ومابي اشيل ذنوب اما زوجي فما عنده مشكله اني اسافر لحالي
قد يسأل احد طيب ليش ماترافقين احد تعرفينه ؟؟
في الواقع اخواتي يسافرون مع ازواجهم وماعندهم اطفال وظروفهم مختلفه عني تماما ..
وفيه قريبات لي جدا يسافرون سنويا لحالهم من غير ازواجهن لكن نظامهم ما يعجبني أبدا :thumbdown.. هم لهم برنامج وعيالهم مع المرافقين برنامج ثاني
وانا حرمة مااروح مكان من غير عيالي (دقة قديمة)
:36_1_33::36_1_33:غير كذا ميولهم غيري بالمرة يحبون التكشخ وجلسة قهاوي :36_9_4:وانا اموت في الطبيعة والبساطة
يعني كل سفرتهم تكون بين السوق في النهار وسهر على قهاوي الشانز بالليل
اما العيال فمع المرافقين يتنقلون بين المتنزهات والملاهي من الصبح
وإذا جالليل رجعوا الأوتيل ناموا بدري واهلهم سهرانين
و كل سنة نفس النظام .........
نفس البلد ..........
نفس الأماكن ......
نفس الوجوه
وإذا برافقهم بسفره لازم التزم معهم لإن العيال يتعلقون ببعض
وهذا مايناسبني أبداً لاماديا ولا معنويا ...
ا
لمهم قررت إني أعتمد على نفسي و أسفر نفسي محد بيسفرني
:27:وقتها ماكنت أعرف للنت واعتمدت في جمع معلوماتي على سؤال الأقارب عن الأماكن السياحية في جنيف وماحولها وبروشرات من السفارة السويسرية مدري الخطوط السويسرية نسيت والله آآآآآآه
وكان في جنيف وقتها قريبة لي وهذا كان مريحني علشان لو احتجت شي
واثناء التخطيط للرحلة تعبت تعب ماتصدقون
كل شي اسويه لحالي ... افكر فيه لحالي ..... احتار لحالي ...
:sad1:واخاف اتكلم مع زوجي في أي شي علشان مايقول لي إيه انت وش يحدك ...وشوله .....ماله داعي تروحين انت وهالصغار .....ترى خطر ت........ مو سهلة انت لحالك..........الخ
انا بنفسي مسؤولة من ادق التفاصيل إلى اكبرها
وانا معدومة الخبرة ... خايفة .... وقلقانه
التأشيرة ..الحجز ..حجز الأوتيلات .. السيارة.. السواق ...الخ
كل شي من اكبر شي لأصغر شي
ومافيه حتى من امون عليه بكثر الأسئلة اثق فيه واستشيره
وهذا شكل ضغط نفسي كبير علي انهكني بصراحة
حجزت الطيارة سياحي انا وعيالي (7سنوات و4سنوات) و ولداخوي
و ولدي الصغير تركته عند جدته عمره سنه..
وكل يوم وانا في السفر احمدالله انه مومعي
طايح عني بهمه و
نفس الوقت اصيح مشتاقه له:36_1_44:وقبل السفر بعشرة ايام قاعده اسولف انا وعمة أولادي (وهي من اهل السفر السنوي لباريس)
ويوم عرفت إني رايحة سياحي إنتفضت وارتعدت
قالت : منتيب صاحيه تروحين 6 ساعات في هالكراسي الضيقة حرام عليك العيال
لا وبتمرون جدة بعد !!!!!!
يعني إحسبي 8 ساعات إنت صاحيه؟؟
والله إن تموتين إسأليني أنا لاعمرك تفكرين تركبين سياحي ..
ارتعت وخفت وقلت انا وش بغيت اسوي بهلك نفسي وعيالي
قلت :طيب وش اسوي ؟؟؟ الحجز وشلون ؟
قالت: يدبر المهم من بكره غيري تذاكركم
وحست حوسه في الحجز وبالواسطات لين خلو حجزنا أولى بدل سياحي وصلحنا التذاكر
وجهزت الشنط ومافيه شي في الرياض مااخذت عينه منه
من اكل ل منظفات (صابون وغيره) ل ملابس
مدري ليه؟؟
أي احد يقول لي شي اشيله علطول ان نقصت على الطيارة اللي بتشيل
(مادريت إن كله بيطيح في كبدي)
حتى حافضات الأكل اخذتها معنا
وحده نصحتني قالت فيه مطعم لبناني لو بغيتي تاخذين منه اكل مكرونه او رز للعيال!!
(طيب ليش ماناكلها في المطعم وخلاص)
شنط ... شنط مليانه
ولا الملابس والله إني اتذكر شهر كامل وانا اشتري ملابس لي و لعيالي وجزم عشان هالسفره مدري بس وش هالعقل كأني رايحه مكان مقطوع
هذا كله غير الوصايا اللي جتنا :اليوم اللي قبل السفر جانا كرتون رطب من خالة زوجي
تبينا نوصله لبنتها في مونترو !!!!!!
وجتنا شنطة فيها اشرطة ومدري وش بعد من اختي تبيني اوصلها لأخت زوجها في جنيف عيالها ازعجوها ولا لقت لهم اشرطة عربي في جنيف!!!!!!!
اما اخت زوجي فأرسلت لي عربية بناتها (اللي بمقعدين متلاصقين جنب بعض مو ورى بعض) قالت بتستفيدين منها لعيالك وإذا خلصت منها اتركيها عند فلان ( قريب لنا مقيم في باريس) في باريس لإنها كانت بتجي لباريس لكن بعد ماارجع انا في سبتمبر ...
وهالعربية هي اكثر ذكرى مؤلمة ومضحكة كنت إذا مشيت بها سدت الشارع وفي الكرنفال مغير اصدم بخلق الله وسوري ...... سوري
حسرتني وابشعتني في التنقل بها وحتى في الشقه ماخذه نص المكان من زينها وفي القطار لباريس بغت تكسر يدي من ثقلها ... :112:
انا ماادري وش كثر العفش لكن اللي اعرفه ان السواق كلمني من المطار وقال في وزن زياده!!!!!!
قلت وجع إحنا حجزنا أولى
قال والله العفش كثيير
اغراض والله مااحتجت إلا لربعها والباقي مصعني بس في الشيل ..
والرحلة في الطيارة الحمدلله كانت تمام لولا بعض حركات ولدي (4 سنوات ) يقبص البنت اللي قدامنا وابوها مصرقع مغير يهاوش في وليدي
والأم ماشاءالله مسترخية ماسمعت لها صوت جالسة وتاركة الحمل كله على ذا الأبو المصرقع
وجع ولدي صغير بشويش قله عيب يابابا وخلاص
وشوله هالتكشيرة بسم الله علي والتهديد (وحده حاقده)
انا ناقصة بعد يكفيني الهم اللي شايلته لحالي:36_1_48:كانوا تقريبا 4عيال من بنات واولاد والأم والاب ومعاهم رضيع كانوا ماخذين الصف الأول في الدرجة الأولى وانا اللي بعدهم علطول
والابو يحاكي عياله ويبتسم وإذا التفت على ولدي كشر ... وجع ...
وطول الرحله ماهجع اما يطلب شي لعياله يصلح كراسي عياله يلحفهم يوم نامو مخترش ... والحرمة ماشاالله عليها سكينة ماشفتها تحركت من مكانها
ويوم وصلنا المطار سمعت واحد واقف يتكلم مع 4 فلبينيات شغالات مدري جايين لمين يقول لهم وشلون انتم فيزتكم شنغل ماينفع وموقفينهم على جنب ما مرروهم
طاح قلبي في رجولي إحنا بعد فيزتنا شنغل إن شاالله بعد مايدخلونا
هيء :bounce8:واقفه في الطابور مركزه مع الرجال وما امشي لين نبهوني اللي وراي
ويوم وصلت عند الموظفة من كثر الرعبه ماشفتها تختم الجواز اعطتني اياه وانا واقفه ماتحركت قاعده اجمع الكلام اللي بقوله انا مكلمه السفاره السويسريه بالرياض وقالوا لي تدخلين بالشنغل متأكده
وتأشر لي الموظفة عشان امشي واحسبها تبيني اوقف على جنب(وحده متنحه)
المهم انها لحظات مرت كأنها دهر
لين قال ولد اخوي عمتي امشي خلاص
قلت اصبر خل أتأكد (على بالي فهيمه)
قال خلاص ختمت الجوازات امشي
وصارت تطالعنا بإستغراب وإمتعاض تبي تخلص شغلها وانا واقفه متنحه
ويوم جينا عند سير الشنط وبناء على نصيحة قريبتي رحت اركض عند العربيات قبل ماتخلص والقى ذاك الوليد وش حليله بس مشكلته مايعرف انجليزي نتفاهم بالإشارة واتله
ونوقف عند السير اول ناس
ولا نخلص إلا اخر ناس !!!!
من البلاوي اللي معي
كل المسافرين خذو شنطهم وراحوا وانا ماخلصت شنطي وكراتيني تقول وحده مهاجره
اشيل واشيل مع الولد راعي العربيه وش حليله اما ولد اخوي سند على الجدار ويقول تعبت متى نخلص
قلت تعال طيب ساعدني
قال هو وش شغله خليه هوياخذها
قلت طيب يالدلخ هو شلون بيعرف شنطنا؟؟ تعال
وعيالي كل شوي تعبنا متى نخلص
وزوجي على الجوال يدهر من الرياض :وينكم فيه؟؟ (يعني وينا فيه اسئلة غريبه)
وصلتوا؟؟
ايه وصلنا ( الحين اقول له احنا في مطار جنيف يقول وصلتوا)
ليش ماكلمتوني؟؟
تونا الحين واصلين وانا واقفه على العفش الله يعافيك خلني اخلص
عصب:112:عطيني العيال بس
شوي تجي بنتي
ماما ماما بابا يقول جاكم السواق عشان ياخذكم من المطار؟؟
ياماما خلينا نخلص العفش الحين ثم نطلع للصالة برا نلقاه ينتظرنا
ثم مرة ثانية
ماما ماما بابا يقول الشقة وينها فيه بعيده او قريبه؟؟
ياماما مدري مدري تونا خليني اخلص العفش الحين
ثم ثالثة
ماما ماما بابا يقول اول ماتوصلون الشقة كلموني طمنوني
واعطتني التلفون
المهم سافرنا وكان على ماأعتقد 1 او2 اوغست والله نسيت
ومن زين الحظ كان هذاك الصيف الله لا يعيده أحر صيف مر على أوربا درجة الحرارة في جنيف 42 تخيلوا والله العظيم مافرقت الجو عن الرياض موت وكانوا وقتها جايبين في الأخبار ناس ماتو من الحر في أوربا
(طبعا مو متعوديين )
احنا والله اللي ماكلينها
وانا المسكينة ماكلتها في ديرتي ويوم كتب الله لي وسافرت كلتها بعد معهم ...
حر حر حر
للتشكي بقية
بس شنو اللي خالك تكتبين التقرير بعد أربع سنوات
تحياتي لكي ..,,